ایران پارلامنتینین بیجاردان سئچیلمیش میلت وکیلی حمدوللا کریمی حیات یولداشینی تحقیر ائد‌ن پلیس امکداشینی تپیک آلتینا سالاراق کلله ضربه‌سی ایله اونون بورنونو سیندیریب.

آخار. آذ خبر وئریر کی، تهرانین مهراباد هاوا لیمانین‌دان بیجار شهرینه اوچماق ایسته‌یه‌ن و شخصی آوتومبیلینده خانی‌می ایله بیرلیک‌ده آئروپورتون اؤزل منطقه‌سینه داخیل اولماغا چالیشان میلت وکیلی پلیس امکداشی دایان‌دیراراق اوندان کیملیک طلب ائدیب. اوزرین‌ده کیم‌لیک سندینین اولمادیغینی بیلدیره‌ن حمدوللا کریمی دئپوتات اولدوغونو بیل‌دیره‌رک یولونا داوام ائتدیرمک ایسته‌سه ده، پلیس اونون آوتومبیلینی دایان‌دیراراق هاوا لیمانینین اؤزل منطقه‌سینه داخیل اولماسینا مانع اولوب.

نتیجه‌ده، دئپوتات خانیمی ایله خداهافیظلشدیکدن سونرا آوتومبیلیندن دوشه‌رک هاوا لیمانی تئرمینالینا قدر پیادا گئتمک مجبوریتین‌ده قالیب. لاکین آز سونرا حمدوللا کریمینین خانی‌می اونا زنگ ووراراق همین پولیسین اونو تحقیر ائدیب سؤیدویونو و آوتومبیلین هاوا لیمانین‌دان چیخماسینا مانع اولدوغونو بیلدیریب. بونو ائشیدن دئپوتات گئرییه قایی‌داراق پولیسله البیاخا اولوب و اونو تپیک آلتینا سالیب. پلیس امکداشینا کلله آتان دئپوتات اونون بورنونو سیندیردیق‌دان سونرا طیاره‌یه مینه‌رک بیجارا اوچوب. حادثه‌دن بیر نئچه ساعت سونرا ژورنالیستلره آچیقلاما وئره‌ن دئپوتات ناموسونو قوروماق اوچون پلیس امکداشینی تنبئه ائتدیینی آچیقلاییب.

دئپوتاتین بو حرکتینی کسکین پیسله‌یه‌ن تهران حقوق-محافظه قوه‌لرینین رسمیلری اونا قارشی جینایت ایشی آچیلدیغینی بیلدیریبلر.