قاراداغ مئشه‌لرین‌ده بیر نئچه گون داوام ائد‌ن یانغینین سؤندورولدویو ادعا اولونور.

بیر نئچه گون داوام ائد‌رک ۳۰۰ هئکتار مئشه‌نی کوله دؤندره‌ن شدت‌لی یانغینلارلا باغلی بیر نئچه مقام دقت چکیر.

بیرینجی قاراداغ: ایللر اؤنجه ضیالیلاریمیز قزل یازماق، یاخود قرب دؤولتلرینین هازیرلادیغی ۲۵۰۰ ایللیک تاریخین موختلیف کونجلرینی آختارماقلا مشغول اولدوغو بیر حال‌دا، پلانین باشقا بیر طرفی ساکیتجه ایجرا اولونوردو:

آذربایجانین بؤلگه‌لری، شهر و کندلری، مئشه و محللارینین آدی دییشدیریلیردی. بئله‌لیکله، قاراداغ ارسباران اولدو، هئچ کیمین سسی ده چیخمادی. چوخ تأسف کی، اینقیلاب‌دان سونرا شاه سؤزو اولان شهرلرین آدی دییشدیریل‌سه ده، بو سیاست اولدوغو کیمی داوام ائتدی. ایندی تورک میللتینین اویانیشی نتیجه‌سین‌ده گنجلر یئنی طلبلر اورتایا قوی‌دو، کؤکونه قاییتماق ایسته‌دی و بیل‌دی کی، بورا قاراداغ‌دیر، ارسباران دئییل. بو قوندارما پروتئز آذربایجانا یاراشمیر. ایندی گؤروروک اؤلکه مئدیاسی (او جمله‌دن فارس مئدیالاری) «قاراداغ» سؤزون‌دن ایستیفاده ائتمه‌یه باشلاییب.

ایکینجی: سون زامانلار نیه مئشه‌لر و اوتلاقلار یانیر؟ سون زامانلار دئمک اولار اکثر بؤلگه‌لردن یانغین خبرلری گلیر. خبرلرین هامی‌سینی ایشیقلاندیرساق باشقا خبرلره یئر قالماز. مئشه‌لر و اوتلاقلار تاریخ بویو اینسانین ایستیفاده‌سین‌ده اولوب و یئرلی اهالی اسیرلر و مین ایللر بویو اورادا اود یاندیریب اوجاق قوروب، لاکین هئچ بیر یانغین اولماییب. سون زامانلار مئشه‌لره و اینسانین آیاغی دیمه‌یه‌ن یئرلره تورلارین تشکی‌لی اولدوقجا دبه مینیب. تئز-تئز تورلار تشکیل اولونور، یئرلی مسئول شخصلر ده اونلار اوچون لازیم اولان بوتون حاضرلیقلاری گؤرور. او جمله‌دن، یول چکیر، اعتراضلاری اؤرت-باس‌دیر ائدیر، اونلارا دلیل تاپیر و بئله گلیر کی، اؤزلری ده همین بؤیوک پلانین بیر پارچاسی‌دیر. مثال دئمک ایستسک، آینالی مئشه‌سینه یولون چکیلمه‌سینی قئید ائتمک اولار (azaranjoman.ir سایتینین ۱۷ آوقوست = ۲۶ مورداد تاریخین‌ده یایدیغی خبر). مئشه‌نین و یایلاغین نه اولدوغونو بیلمه‌یه‌ن توریست آدی ایله بؤلگه‌یه گلنلر تأسف کی، سیقارئت‌سیز، قلیان‌سیز مئشه و یایلاقلارا گئتمیر. نتیجه‌ده بئله حاللار باش وئریر.

اوچونجو: یانغین باش وئره‌ن‌ده نه اوچون آذربایجانین یاردیمینا هئچ کیم گلمیر؟ میللی مجلیس‌ده کیچیک بیر مسئله اوچون باغیریب ال قول اوزادانلار، گؤره‌سه‌ن، هارادا گیزلنیب، سسلری چیخمیر؟ بونا بیر نئچه سبب وار: اساس سبب آذربایجانین ویلایت (اوستان) آدلی موختلیف پارچالارا بؤلونمه‌سی و همین بؤلگه‌لر آراسین‌دا رقابتلرین گئتمه‌سی‌دیر. مثال اوچون، قیزیلوزه‌ن چایینین چوخو زنجان ویلایتین‌ده آخدیغینا باخمایاراق میانا شهرین‌ده سو آنباری تیکیلیر. سو آنبارین‌دا آوارچکمه (قاییق سورمه) اویونلاری تشکیل اولونور. تاریم ایسه قیزیلوزه‌ن سویونا هسرت قالیر… بئله‌لیکله، زنجان ویلایتین‌ده ایش باشین‌دا اولان مسئول شخص یانغینین آذربایجانین قاراداغین‌دا یوخ، قونشو ویلایتین مئشه‌لرین‌ده باش وئردیینی زنن ائدیر. هان‌سی کی، اسیرلر بویو چایلارین‌دا آخان سویو اوندان اسیرگه‌ییب. وضعیتی بئله گؤره‌ن مرکز البته کی، کمکه گلمز. ایراقا وئرتولیوت (هئلیکوپتئر) گؤندرمیی اؤزونه فرض بیله‌ن تئهران (ایسنا خبر آگئنتلیینین ۲۰ ایول ۲۰۱۸-جی ایل) بیزی بئله پراکه‌ن‌ده، اینام‌سیز، اؤز میللی سروتینین اهمیتینه وارمایان گؤره‌ن‌ده البته کی، هئچ بیر حرکت ائتمه‌یه‌جک.

نتیجه‌ده، یئرلی اهالی آدینی یانغین سؤن‌دوره‌ن بریقاداسی قویان بیر نئچه شخص اللرین‌ده اولان محدود آلتلرله (بئل، کورک …) قاراداغین اودونو سؤن‌دورمه‌یه چالیشیر.

دؤردونجو: یانغین سؤنوب، یا سؤنمه‌ییب؟ بیر سیقارئت و یا قلیان کؤزو ایله یانان مئشه البته کی، یئرده قالان اود اوجاقلارینین یئنی‌دن آلوولانماسی نتیجه‌سین‌ده بیر داها یانا بیلر. توستونون اولماماسی اودون سؤندویو آنلامینا گلمیر و بیر داها ان اساس یئری اهالی آذربایجانا و قاراداغا اوریی یانان ایسته‌نیله‌ن شخص اولدوقجا دقت‌لی اولمالی، هفته‌لرله بو یئرلری دقیق نظارت آلتین‌دا ساخلامالی‌دیر کی، بیر داها بئله یانغین باش وئرمه‌سین.