کانادادا مهاجیرتده یاشایان سیاسی فعال، جنوبی آذربایجان میللی آزادلیق حرکاتینین (جاماه) باشچی‌سی پیروز دیلنچینین Axar.az-آ مصاحیبه‌سی:

- سون واختلار رضا پهلوی و اونو دستکله‌یه‌ن جریانین فعالیتی گئنیشلنیب و خصوصاً خاریجده اولان فارسدیللی مئدیا طرفیندن تبلیغ اولونور. بونو نئجه ایضاح ائدیرسینیز؟

- رضا پهلوینین سون واختلار یئنی‌دن اوزه چیخاریلماسینین و آلترناتیو کیمی سیرینماسینا چالیشیلماسینین بیر نئچه سببی وار. مسئله بوراسیندادیر کی، ایران رژیمینه مخالیف عموم‌ایران تشکیلاتلاری، او جمله‌دن "خالق مجاهدلری تشکیلاتی"، سولچو و باشقا بو کیمی سیاسی جریانلار حاضردا تکباشینا حاکمیته گلمک اقتداریندا دئییللر. ایران‌دا اعتراض آکسییالارینین باشلاماسیندان ۳ آی کئچدیکدن سونرا خاریجده فعالیت گؤستره‌ن فارس‌دیللی مئدیا و بعضی دؤولتلر رضا پهلوینین تبلیغینه و اونون مخالیفت نماینده‌سی کیمی اورتایا آتیلماسینا چالیش‌دیلار.

باخدیلار کی، اعتراض نماییشلری داوام ائدیر، آنجاق جریانا باشچی‌لیق ائد‌ن کیمسه یوخدور. دوشوندولر کی، اعتراضلارین نتیجه وئرمه‌سی و باشقا جریانلارین قارشی‌سینی آلاراق، واحید بیر پلاتفورما اطرافیندا بیرلشدیریلمه‌لری اوچون رضا پهلوی داها اویغون کادردیر.

- پهلوینین و عمومیتله، شاه‌چیلارین حاضیرکی حاکمیته آلتئرناتیو اولماق امکانلاری هانسی سوییه‌ده‌دیر؟

- او، آلتئرناتیو کیمی هئچ بیر اوغور قازانا بیلمز. اونا گؤره کی، اوندا هانسی‌سا جریانا رهبرلیک ائد‌جک ایستعداد و پوتنسیال یوخدور. عینی حال‌دا ایران‌دا یاشایان خالقلارین اکثریتی اونو قبول ائتمیر. خصوصیله ایران‌دا یاشایان غیری-فارس خالقلار، او جمله‌دن بیز آذربایجان‌لیلار اونون آتاسی و باباسینین ائتدیی ظلملری یاخشی بیلیریک و اونوتمامیشیق.

رضا پهلوینین آلتئرناتیو کیمی خالقا سیرینماسی اصلینده خاریجده اولدوقجا گوجلو اولان فارس‌دیل‌لی مئدیانین ایشیدیر. نظره آلاق کی، قید ائتدییم فارس‌دیل‌لی مئدیا، خصوصاً "آمریکانین سسی"نین فارس بؤلومو و «ایران اینترناشنال" جدی تأثیر ایمکانلارینا مالیکدیر. بو مئدیا اورگانلاری پهلوی باره‌ده آلتئرناتیو تصورو فورمالاشدیرماغا چالیشیرلار.

- ایران‌داکی اعتراض نماییشلرینین تام‌میقیاس‌لی انقلابا چئوریلجیی گؤزلنیلیرمی؟

- فیکریمجه، ایران‌دا باش وئره‌ن اعتراض آکسییالاری هله‌لیک انقلاب دئییل. بو، داها چوخ بیر سیرا خاریجی دؤولتلرین ایرانلا راضیلاشدیرا بیلمدیکلری مسئله‌لری تضییق یولو ایله قایداسینا سالماق جهدلریدیر. بورادا ایرانین نووه پروگرامی ایله باغلی مسئله‌لر اهمیت‌لی درجه‌ده رول اویناییر. قید ائتدییم خاریجی دؤولتلر ایرانی سیخیشدیریب ایمتیاز آلماق اوچون بعضی حرکتلرین باش وئرمه‌سینه زمین یاراتدیلار، آنجاق بو دفعه ایپین اوجو اونلارین الین‌دن چیخدی. او دؤولتلرین اؤزو ده ایشین بو یئره گلیب چیخاجاغینی دوشونموردولر. بیلدیینیز کیمی، ایراندا یاشایان خالقلار ۴۰ ایلده‌ن چوخدور داوام ائد‌ن عدالتسیزلیک، ظلم و دیکتاتورلوقدان بئزیب و یورولوبلار. همین او کسیم یارانان شرایط‌دن ایستیفاده ائد‌رک حاقلی اولاراق اعتراض نماییشلرینه قوشولدو. آنجاق بو نماییشلرده کوتلویلیک اولمادیغی اوچون اونو انقلاب آدلاندیرماق دوغرو دئییل.

- گونئی آذربایجان تشکیلاتلاری و سیاسی فعاللارینین فعالیتلری ایران‌دا باش وئرن حادثه‌لره نه درجه‌ده تأثیر گؤستره بیلیر؟ اونلارین خاریجده اولان ایران مخالیفتی ایله علاقه و امکداشلیقلاری باره‌ده نه دئیه بیلرسینیز؟

- ایران‌دا باش وئرن انقلابلار یا تبریزدن باشلاییب و یا سون سؤزو تبریز دئییب. ائله بونا ۱۹۷۹-جو ایل انقلابینی دا مثال گؤسترمک اولار. سونونجو انقلابین غلبه مؤهورونو تبریز وورموشدور. دئمک ایستییرم کی، ایران‌دا باش وئرن هر هانسی انقلاب تبریزسیز غلبه چالا بیلمز. غلبه قازانماق اوچون بو یا تبریزدن باشلامالی و یا تبریزده بیتمه‌لیدیر. گونئی آذربایجان خالقینین باش وئره‌ن دییشیکلیکلرده بؤیوک رولو اولوب و اولا بیلر. آنجاق خالقیمیز بو دفعه کوچه‌لره آخیشمادی. اونا گؤره کی، بوندان اؤنجکیلردن درس آلیب و بیر سیرا حادثه‌لرین اویون اولدوغونو آنلاییب. تبریز آرتیق اوولکی تبریز دئییل، آییلیب.

گونئی آذربایجان تشکیلاتلارینین خاریجده‌کی مخالیفتله امکداشلیغی و حادثه‌لره تأثیرینه گلینجه، دئمه‌لییم کی، بیر سیرا دؤولتلر بیزیم تشکیلاتلاری بو مسئله‌یه قوشماق ایستییرلر. آنجاق بیز بوندان سونرا آلدانماق ایستمیریک. مسئله ایله باغلی چوخ اهمیتلی و ۱۰ ساعت داوام ائد‌ن بیر توپلانتیدا دا بو باره‌ده دانیشدیق. بیر داها قید ائتدیک کی، بیزیم منافعیمیزی نظره آلمایان حرکتلره قوشولمایاجاغیق. گؤزوموزون قاباغیندا پیشه‌وری نمونه‌سی وار. اونون باشینا نه گتیریلدیینی گؤردوک. خاریجیلرین الی ایله قورولان حکومت ائله خاریجیلرین الی ایله ده چؤکدوروله بیلر. بو، پهلوی حاکمیتی مسئله‌سینده ده اؤزونو گؤستریب. رضا خان و اونون اوغلو محمدرضا شاه اینگیلتره‌نین دستیی ایله حاکمیته گتیریلدی و سونرا یئنه ده اینگیلیسلرین الی ایله حاکمیتدن اوزاقلاشدیریلدیلار.

آنجاق گونئی آذربایجان تشکیلاتلاری و اونلارین حادثه‌لره تأثیری باره‌ده فرقلی فیکیرده‌یه‌م. بو تشکیلاتلاری اوچ یئره بؤلمک اولار. بیرینجی دسته ساغا-سولا باخمادان خالقیمیزین ماراقلاری اوغروندا مباریزه آپاریر. ایکینجی دسته هانسی‌سا دؤولتلرین دستیی و گؤستریشی ایله اوتوروب-دورور و شخصی ماراقلار عمومی ماراقلاری اوستلییر. اوچونجو دسته‌یه عایید اولان تشکیلاتلارین ایسه اصلین‌ده مؤوجودلوقلاری یوخدور و اونلار ساده‌جه بیر-ایکی نفر واسطه‌سیله ویرتوال عالم‌ده تمثیل اولونورلار.

دئمک ایستییرم کی، گئرچکدن مؤوجود اولان گونئی آذربایجان تشکیلاتلارینین هئچ بیری فارس مخالیفتی ایله امکداشلیق ائتمه‌ییب و ائتمه‌یه‌جکدیر.

- داوام ائد‌ن اعتراضلار نه ایله نتیجه‌لنه بیلر؟ سونراکی مرحله‌ده نئجه بیر ایران تصور ائدیرسینیز؟

- ایران‌داکی اعتراضلار اصلین‌ده نتیجه‌له‌نمکده‌دیر. فئورال آیی عرضین‌ده نماییشلرین قارشیسی آلینسا و ساکیتلیک یارانسا، بو، تهران رژیمینین اوغورو کیمی دیرلندیریله‌جک، حاکمیت ده بیر نئچه کیچیک دییشیکلیکلره ال آتاجاق. آنجاق قید ائتدییم مدتده آکسییالار سنگیمه‌سه، ایران‌دا داخیلی محاربه باش وئره، اؤلکه‌ده گئنیش قارش‌یدورما یارانا بیلر. بئله اولدوقدا آمریکا، ایسرایل و باشقا دؤولتلرین اورا مداخیله‌سی گؤزله‌نیله‌ندیر.

ملا رژیمی ییخیلدیغی تقدیرده اوندان سونراکی مرحله‌ده گونئی آذربایجانین مستقیل اولما احتیمالی داها دا آزالاجاق. اونا گؤره کی، حاضیرکی توتالیتار رژیم‌دن سونرا مجبوری اولاراق داها مترقی، غرب‌مئییل‌لی و حمایه اولونان فارس مرکزلی داها فاشیست بیر حاکمیت ایش باشینا گله بیلر.

بونو صمیمی و آچیق شکیلده دئییرم کی، یوخاریدا قید ائتدییم سببلره گؤره من هله‌لیک ملا رژیمینین ییخیلماسینی ایستمیرم. بو قدر جاهیل و دیکتاتور بیر رژیمین هله‌لیک حاکمیتینی داوام ائتدیرمه‌سی بیزیم اوچون خیرلیدیر. اونا گؤره کی، آرتیق خالقیمیز آییلماقدا، حقوقلارینی باشا دوشمکده و تشکیلاتلاریمیز گوجله‌نمکده‌دیر. بو بئله داوام ائدرسه، قارشیداکی ایللرده ایران‌دا یاشایان باشقا غیری-فارس خالقلارلا بیرلیکده ال-اله وئریب بو رژیمی ییخماق و بیردفعه‌لیک اؤز میللی دؤولتیمیزی قورماق ممکوندور.