شمالی کیپر تورک رسپوبلیکاسینین لفکه آوروپا اونیورسیتتینین امکداشی، ادبیات شناس ناظیم مورادوون محمدحسین شهریار حاقیندا Kult.az-آ مصاحبه‌سی:

- ناظیم بی، گونئی آذربایجان ادبیات تاریخینده محمدحسین شهریارین رولوندان دانیشاردینیز...

- گونئی ادبیاتینین انکشافیندا شهریارین رولو حقیقتا ده عوض‌ائدیلمزدیر. او، «حیدربابایا سلام» اثری ایله گونئیده آنا دیلینده شعر عنعنه‌سینه میثل‌سیز تحفه وئریب. شاعرین اسلوبو، طرزی، خالق ادبیاتینا حاکملیگی، ائلجه ده خالق مثللریندن، آتالار سؤزلریندن، دئییملردن بؤیوک باجاریقلا استفاده‌سی دیگر شاعرلر اوچون اؤرنک اولوب. اؤزللیکله، ۲۰-جی عصرده، ۱۹۵۰-جی ایللردن سونرا آذربایجان ادبیاتینا تأثیری چوخ بؤیوکدور و بو، تکجه گونئی آذربایجان ادبیاتینا عائد دئییل، هم ده گوزئی آذربایجان ادبی عالمینه ده عائددیر.

- بس، ایستر دؤورونون ادبی جامعه‌سینده، ایسترسه ده سونراکی دؤورون ادبیاتچیلارینین شهریارا مناسبتی نئجه اولوب؟

- شهریارین بیر آز جکیمسل طرزی، سیاسی جهتدن چوخ دا جسارتلی اولمایان طرزی بؤیوک آذربایجان شاعری بولود قاراچورلو سهنده تأثیر ائدیب و او شهریارا بیر منظوم مکتوب یازیب. شهریار ایسه جاوابیندا اونا «سهندیم» آدلی شعرینی اتحاف ائدیب. بو شعر گونئی آذربایجان ادبیاتیندا بؤیوک عکس-صدا دوغوروب. بوندان علاوه، جواد هیئتین چیخاردیغی «وارلیق» درگیسی شهریار حاقیندا چوخلو سایدا یازیلار وئریب، اونون شعرلرینی واخت‌آشیری درج ائدیبدیر. شهریار بؤیوک بیر شاعر اولاراق همیشه سایغی و حرمت گؤروب، لاکین اؤز کاسیب و متوازی حیاتینا داوام ائدیب.
شهریار جنوبلو-شماللی بیر چوخ صنعت آداملارینی – یحیی شیدا، حمید نطقی، جواد هیئت، غلامحسین سیدی، اسمائیل اولکر و سایر شاعر و ادبیات‌شناسلارا جدی تأثیر ائدیب.

- شاعرین بو قدر سئویلمه‌سینی نه ایله ایضاح ائتمک اولار؟

- شهریاری شعر دیلینین ساده‌لیگی، خالق دیلینه داها یاخین اولماسی دیگر همکارلاریندان، دؤورونون ادبیات‌چیلاریندان فرقله‌ندیره‌ن اساس خصوصیت ایدی. بونا گؤره ده اونون شعرلری کیچیکدن بؤیویه هامینین سئویملیسی، دیللر ازبری ایدی.

- شاعرین دنیا ادبیاتینین نادر اثرلری ایله مقایسه ائدیله‌ن «حیدربابایا سلام» پوئماسی آذربایجان ادبیاتینا نه وئردی؟

- ۱۹۵۰-جی ایللرین اورتالاریندان سونرا یازیلان بو پوئما شاعرین گؤز آچیب گؤردویو دوغما ائللر، یعنی، جنوبی آذربایجان، ملی حیاتیمیز، معیشتیمیز، پسیخولوگیامیز حاقیندا وسعتلی شاعرانه انسیکلوپدیادیر. اون ایللر بویو دوغما یئرلردن، عزیز آداملاریندان آیری دوشموش شهریار حدربابا محیطی باره‌سینده اوریینده گزدیردیی، دوشوندویو متلبلری بو اثرینده یوکسک درجه‌ده طبیعی و ضریف بویالارلا ترننوم ائدیب. باشدان-باشا آذربایجان شفاهی خالق ادبیاتینین روحو ایله آشیلانمیش «حیدربابایا سلام» آخار-باخارلی، زنگین آذربایجان دیلینین اؤزونه‌مخصوص اوریژینال آهنگی اولان جنوب دیالکتینده یازیلیب. اثر حیدربابا داغینا مراجعت شکلینده قورولوب. بونون اؤزو ده اونون خالقین روحوندان قیدالاندیغینی گؤسته‌دن بیر علامتدیر. «حیدربابایا سلام»ین مختلف یوللارلا باکیا گلیب چیخماسی، دفعه‌لرله نشر ائدیلیب یایلماسی اؤلکه‌ده عمله گلن کهنه، کمونیست پارتیالی شعرین افلاسینی سرعتلندیردی. اونون اؤز طبیعی آخارینا دوشمه‌سی پروسسینه ائله قوتلی بیر تکان وئردی کی، همین تکانین تأثیریندن شعریمیز اؤز وارلیغیندا، خالقین چاغداش حیاتینا، تاریخینه مناسیبتینده، بدیعیلیک آختاریشلارینین استقامتینده بو گون ده اؤز سؤزونو دئییر.