«آزادلیق، عدالت و میللی حکومت» آکسییاسینین کووردیناتورو، برلین یوروشونون مئدیا کومیته‌سینین رهبری صالح کامرانینین Axar.az-آ موصاحیبه‌سی:

-بروکسل آکسییاسین‌دان قیسا مدت سونرا یئنی یوروشله باغلی قرار وئرمیسینیز. بئله قیسا زامان عرضین‌ده هان‌سی تشکیلاتلانما مدئلینی قورموسونوز؟

- اؤتن دفکی تجروبه‌میز و قوردوغوموز تشکیلاتلانما مدلی سایه‌سین‌ده بو دفکی یوروشوموز ده جدی تأثیر بوراخاجاق. بئرلین یوروشونون هدف و مقصدلری قبول اولونان ۱۴ مادده‌لیک ایش پلانینا اویغون حیاتا کئچیریلیر. گروپ عضولرینین عمومی سس‌وئرمه‌سی ایله برلین آکسییاسینین مایین ۲۰-ده کئچیریلمه‌سی قرارا آلینیب. بیرینجی یوروش زامانی تشکیلاتلانما سیستمین‌ده عمومی شورانین تشکیل ائتدیی قروپ‌دا ۳۵ نفرلیک کووردیناسییا مرکزی فورمالاشدی. مرکزده مالییه، مئدیا و لوگیستیکا کومیته‌سی یارادیلمیشدی. یوروشون سؤزچولرین‌دن بیری من ایدیم، دیگری ایسه خانیم شاعره شریفه جعفری ایدی. گروپ عضولرینین سس‌وئرمه‌سی ایله ۱۴ ماده‌لیک ایش پلانی تصدیق اولوندو. چالیشمالاریمیز و فعالیتیمیز ده بو پلانا اویغون شکیل‌ده کووردیناسییالی حیاتا کئچیریلیردی. آکسییا بیتدیک‌دن سونرا، مالییه کمیته‌سینین حساباتی شفاف شکیلده آچیقلاندی. ۲۰ مایدا کئچیرجییمیز برلین آکسییاسی ایله باغلی قرار ایسه آپرلین ۱۵-ده وئریلیب. بروکسل آکسییاسینین سؤزچولرینین ۱۴ ماده‌لیک ایش پلانینا اویغون اولاراق وظیفه‌سی ایکینجی آکسییانین کووردیناسییا مرکزینی و کومیسییالارینین سئچیلمه‌سینی حیاتا کئچیرمکدن عبارت‌دیر. اودور کی، آپرلین ۱۵-ده عمومی شورا حساب ائتدییمیز گروپدا هر کس طرفیندن کووردیناسییا مرکزینین یئنیدن قورولماسی قرارا آلینیب.

-برلین یوروشو ایله باغلی کووردیناسییا مرکزینده هانسی دییشیکلیکلر وار؟

-کووردیناسییا مرکزینده آذربایجان تورکلری ایله یاناشی، تورکمن، قاشقای، خراسان تورکلری و دیگر تورک خالقلاری دا تمثیل اولونور. ۱۸ آپرئلده سئچکیلر اولوب. ۳۵ نفردن عبارت کووردیناسییا مرکزی فورمالاشیب و ۴ کومیته یارانیب: مالییه، تداروکات، مئدیا و گووه‌نلیک. بروکسل یوروشون‌دن فرقلی اولاراق برلین آکسییاسی اوچون ایکی سؤزچو اوزینه، ۳ کووردیناتور سئچیلیب. من، سهیلا عزیزی و محمود بیلگین آکسییانین کووردیناتورو تعیین اولونوب. کووردیناسییا مرکزینده ۹ نفردن عبارت ایداره هئیتی فعالیت گؤستریر کی، اونلار تشکیلاتلانمایا اؤز دستیینی وئریر. بیزیم تشکیلاتلانما مدلیمیز بودور.

- یوروشون آدی و گئدیشاتی ایله باغلی دانیشاردینیز...

- کئچن یوروشوموزون آدی «آزادلیق، عدالت»، شعاریمیز ایسه «آزادلیق، عدالت، میللی حکومت» سئچیلمیشدی. بو دفعه ده آنا شعاریمیز اولدوغو کیمی قالیر و آکسییانین آدی ایسه «آزادلیق، عدالت و میللی حکومت» اولماسی قرارا آلینیب. ۱۸ آپرئلده یئنی آکسییانین مسئول شخصلری سئچیلدیکدن سونرا ایشلره باشلامیشیق. تداروکات ایشلری داوام ائدیر. بایراقلار، بانرلر حاضرلانیر. مالییه کمیته‌سی مادی دستک توپلاماغا داوام ائدیر.

-یوروشله باغلی هدفلرینیز ندیر و اونا نئجه نایل اولماق ایستییرسینیز؟

- بروکسل آکسییاسیندان سونرا گونئی آذربایجان مسئله‌سی جدی قبول اولونماغا باشلادی. مایین ۲۰-ده بئرلینده کئچیرجییمیز «آزادلیق، عدالت و میللی حکومت» آکسییاسی دا بو باخیمدان بیزیم اوچون واجیبدیر. حاضردا کئچن دفعه‌کی آکسییادا اولان چاتیشمازلیقلارین آرادان گؤتورولمه‌سینه چالیشیریق. ایستر بین‌الخالق، ایستر آذربایجان و تورکدیللی مئدیادا کووردیناسییالی شکیلده بو یوروش باره‌سینده داها اطرافلی و دولغون شکیلده معلومات وئرمه‌یه احتیاج وار. مقصد و هدفلریمیز داها چوخ اینسانا یئتیشه بیلسین دئیه بیرگه ایشلر گؤرولمه‌لیدیر. ایستییمیز بودور کی، آذربایجان مئدیاسی هماهنگ شکیلده بو مسئله‌یه اؤز دقتینی یئتیرسین. بوتون خالقیمیز - آذربایجانلیلار، ایراندا یاشایان تورکلر اؤز معنوی و مادی دستیینی اسیرگه‌مه‌سینلر. مینلرله اینسانین آکسییادا اشتراکینین تعمین اولونماسیندا بیزه یاردیم ائتسینلر.

-بو آکسییالار میللی حرکاتین گوجله‌نمه‌سینه نئجه تأثیر ائدیر؟

-بروکسل یوروشو مثبت معنادا اؤز تأثیرینی گؤستردی. ایکی هفته عرضین‌ده چوخلو جدی مسئله‌لر اورتا چیخدی. «تراکتور»اون و دیگر کوماندالارین یاریشلارین‌دا، میللتیمیزین ایچین‌ده بونون شاهدی اولدوق و میللی حرکاتا یاخشی معنادا تکان وئردیینی گؤردوک. آکسییامیز آذربایجان مئدیا اورگانلارین‌دا جدی شکیلده تبلیغ اولوندو. دونیا سوییه‌سینده اؤز تأثیرینی قویدو. حتی ایسرایل پارلامنتین‌ده ۳۲ میللت وکیلی گونئی آذربایجان مسئله‌سینده دستیینی گؤستردی. ایران‌دا یاشایان باشقا میللتلر ایچریسینده آذربایجان، آرتیق داها جدی قبول اولونماغا باشلاندی. بعضی رقیب، مرکزچی، آذربایجانا مخالیف اولان جریانلار، فارسدیللی مئدیالار بیزیم آکسییامیزی تمامیله بایکوت ائلسه‌لر ده، ایسرایل پارلامنتینین مذاکیره‌لریندن سونرا قارایاخما و تخریبات کومپانییالارینا باشلادیلار. بو ایسه یوروشون نتیجه‌سی اولاراق باش وئریردی. میللی فعاللاریمیز، داخیلده یاشایان اینسانلاریمیز، سوسیال شبکه واسطه‌سی ایله و مختلیف یوللارلا بیزه مراجعتلر ائدیردیلر کی، بو یوروشلر دایانماسین، داوام ائتسین.

-یوروشون محض مایین ۲۰-ده کئچیریلمه‌سینین سببی ندیر؟

-۲۲ مای خورداد فاجعه‌سینین ایلدؤنومودور. گونئی آذربایجان‌دا خالقیمیز ایندیدن خورداد گونونو یاد ائتمک اوچون حاضرلیقلارا باشلاییب. مختلیف بانرلر، شعارلار یازیلیر. داخیلده یاد اولوناجاق. بیز ده اینسانلاریمیزا دستک اولسون دئیه ۲۰ مای تاریخین‌ده - خورداد قیامینین آنیم گونونده آکسییانی بئرلینده کئچیرمه‌یه قرار وئردیک. دوشونوروک کی، بو، میللتیمیزه انرژی وئره‌جک، خالقیمیزین ایچریده و خاریجده روحلانماسینا، تشکیلاتلانماسینا جدی تأثیر گؤستره‌جک.

- برلین یوروشونون گؤزلنتیلریندن دانیشاردینیز...

- ایران و آذربایجان رسپوبلیکاسی آراسیندا اولان مناسیبتلر، او جمله‌دن ایرانین آذربایجان دولتینه قارشی یاراتماق ایستدیی مانعه‌لر - بونلارین هامی‌سینی نظره آلاراق ۲۰ مای‌دا داها گوجلو آکسییانین اورتایا چیخماسی واجیب مسئله‌دیر. ایسرایل پارلامنتین‌ده اولان مذاکیره‌لردن سونرا دونیانین دقتی آذربایجانا چوخ یؤنلیب. او جهتدن، برلین یوروشو یاخشی تشکیل اولونمالی و کئچیریلمه‌لیدیر. حتی میللی فعاللاریمیز کانادادا، بیزدن بیر هفته سونرا یوروش کئچیره‌جکلر. عینی آدلا و عینی مقصدله اونلار دا آکسییا تشکیل ائد‌جکلر.

- بو آکسییالار نه زامانا کیمی داوام ائد‌جک؟

- بیزیم هدفیمیز کووردیناسییا مرکزینی ساغلام و داواملی توتماق، تشکیلاتلانما مدلینی دونیایا و گونئی آذربایجانا یایماقدیر. گونئی آذربایجانلیلاری و ایران‌دا یاشایان تورک خالقلاری اؤز مقدراتینی تعیین ائدیب، اؤز حاقلارینا یئتیشه‌نه کیمی بو داوام ائد‌جک. ایندیدن نئچه یوروش اولاجاغینی دئمک چتیندیر. لاکین بیز حاقلاریمیزا یئتیشه‌نه کیمی بو فعالیتیمیز هم گوجلنه‌جک، هم ده داها کیفیت‌لی اولاجاق.