هر ایل بایرام قاباغی خیاوان‌لاری گزیب دولانارام، لاپ سئودیییم مشغولیتلریمدن بیریدیر. سانکی کیتاب اوخویور کیمی خیاوان‌لارا دیقت‌ ائدرم.

بایرام حال هواسی‌، جاماعاتین های کویو، چرچی‌لر، تونلو پیاده‌رو‌لار، شهره یئنیجه دؤنموش کؤچمن ایشچی‌لر، بیر بیرلری ایله دانیشارکن دیزلرینه ووروب آغیز دولوسو گولن اؤیره‌نجی‌لر، اوزون بویلو او تکمچی، (دئییرلر مشکینده فقط بیر تکمچی قالیب)، دؤورونه حلقه ووروب هیجانلا باخان قیز اوغلان‌لار، لبه‌دارلی کیشی‌لر، قارا چادرالی قوجا قادین‌لار، ویترینه الینی اوزادیب آتالارینا بیر شئی‌لر گؤرسه‌دن بالاجا اوشاق‌‌لار، آشی بوللایان کیمی مالاغا ایله قیرمیزی بالیق‌لاری تونگ‌ده یوخودان اویادان ساتیجی‌لار، فطیرچی‌لر(خییوودا دونیانین هر یانیندان چوخ فطیر توکانی، و البته کی قفه‌خانا وار)، ساری کؤهنه تاکسی‌لار، نایلون جعبه‌لرده پاریلدایان پورتاغال‌لار، بسته‌لره باغلانمیش بیر کیلویلوق قورو شیرنی‌لر و...

و شاد اینسان‌لار، هارا گئتدیلر اونلار، هامیسی بیردن بیره یوخا چیخدیلار‌. من بایرامین گلیشینی هر شئیدن چوخ بونلارین گولر اوزلرینده سئزیردیم.

دونن خیاوان چوخ داریخمالی ایدی، هامینین اوزونده بیر آغ یئکه ماسک یئرلشمیشدی، هامی الکل، ماسک، قارا دنه، ویتامین c، ساریمساق، دالیسیندایدی. توکان‌لار آرادا سیرادا باغلامیشدیلار، هئچ یئردن های قیی سسی گلمیردی. بیرینین قیچی بیر یئره ایلیشیب ییخیلسایدی هامی کرونا دئیه وحشتله چیغیریشیب آرا آچاردیلار. دونن بایرامین یئرینه کرونا گلمیشدی شهریمیزه.

دالی‌یا باخدیم، بیر کیشی ال‌لرینی بیربیرینه چالیب اوجادان قیی‌لاییردی: گل بالام، بایرام قاباغی‌دیر، گل حراج ائله‌دیم، آغ کفن، قارا کفن، قیرمیزی کفن، هر رنگ‌ده، هر طرح‌ده، گل آپار....

گؤزومو اووکالاییب بیر سری ده باخدیم، کیشی یوخ اولموشدو، گئریده هئچ زاد گؤرونموردو...