«جوجه‌لریم»این غریبه تالعیی اولوب. ماهنی یازیلاندان دوز ۱۰ ایل سونرا مشهورلاشیب.

دئمک، ۱۹۴۹-جو ایلده بسته‌کار قنبر حسین‌لی شاعر توفیق مطللیبووا بیر موسیقی دینله‌دیر و اوندان خواهیش ائدیر کی، بونا سؤز یازسین. او دؤنه‌ملر اوشاق شعیرلری یازان توفیق مطللیبوو موسیقییه سؤز یازیب وئریر قنبر حسین‌لییه. ماهنینین ایلک ایفاچی‌سی، دئیی‌لنه گؤره، ایندی مغام تئاترینین دیرکتورو چالیشان عاریف قاضییئو اولور. عاریف معلمین ماهنینی نئجه اوخودوغو بیزه گلیب چاتماییب. هر حال‌دا یاخشی اوخوماسایدی، مؤلفلر ماهنینی اونا وئرمزدیلر. بئله‌جه، ۱۰ ایل ماهنی آذربایجان‌دا اوخونماسین‌دا اولسون، سیزه خبر وئریم موسکوا دکاداسین‌دان…

ماهنینین اولدوزو دوز ۱۰ ایل سونرا پارلاییر. ۱۹۵۹-جو ایلده موسکوادا کئچیریلن آذربایجان اینجه‌صنعتی دکاداسین‌دا «جوجه‌لریم»ی ایندی هامیمیزین تانیدیغی آکتریسا و رسام-فلوریست سغرا باغیرزاده اوخویور. ماهنی «اورا »یلا قارشی‌لانیر و تئزلیکله دیللر ازبرینه چئوریلیر، سووتلر مکانینی آشاراق بوتون دونیایا یاییلیر. موختلیف دیللره (۱۰۰-دن چوخ دیله !) چئوریلیر. حتی «دونیانین ان یاخشی اوشاق ماهنیلاری» آلبومونا داخیل ائدیلیر. مشهور سووئت جیزگی فیلمی «نو، پاقادی!»نین بیر بؤلومونه ده سالینیر. اؤزو ده، ماهنی جیزگی فیلمین‌ده آذربایجان دیلین‌ده سس‌لنیر!..

«ویکیپئ‌دیا»دا بو ماهنییلا باغلی ماراق‌لی بیر دئتال وار. واختیله آذربایجان کینو خادیملری فرانسادا اولارکن، دونیا شهرت‌لی چارلی چاپلین گلنلرین آذربایجان‌دان اولدوغونو بیله‌ن‌ده پیانو آرخاسینا کئچیب «جوجه‌لریم»ی ایفا ائدیب و قوناقلارا اوز توتوب دئییب: «دئمک، سیز بو مئلودییانین وطنیندنسینیز؟! من‌دن او بختور بستکارا سلام یئتیرین!».

«بختور بستکار»سا باکی‌دا عادیدن-عادی، ساده‌دن-ساده حیاتینی یاشاییردی… نه شهرت، نه ده ثروت دالینجا قاچیردی. هئچ ائله بیل او دونیا شهرت‌لی ماهنینی یازمامیش‌دی… یئنه ده گؤزل ماهنیلار بستلییردی. اونون «آی ایشیغین‌دا» ماهنی‌سی اؤز اؤلکه‌سین‌ده سئویله-سئویله اوخونوردو. «موغانا جئیران» ماهنی‌سی ایسه نینکی بؤیوکلرین، ائله اوشاقلارین دا (منیم ده س. ای.) سئویملیسی‌دی.

۱۹۱۶-جی ایل آپرئلین ۱۶-دا گنجه‌ده دمیرچی عائله‌سین‌ده دوغولموش‌دو قنبر. کیچیک یاشلارین‌دان آتاسی مشهدی مختاری ایتیرمیشدی. او دؤنه‌ملرین گنجه موسیقی موحیطی چوخ زنگین ایدی. افسانوی مشه‌دی جمیل امیرووون شهرین‌ده تئز-تئز آدلی-سان‌لی خواننده‌لر – جبار قاریاغدیوغلو، سید شوشینسکی، بولبول، مالیبیلی حمید، خان شوشینسکی، قوربان پیریموو قوناق اولوردو. قنبر حسین‌لی ده بئله بیر موحیط‌ده بؤیویور و طبیعی کی، موسیقی‌چی اولماغا قرار وئریر. ۱۹۲۷-جی ایلده گنجه اورتا ایختیصاص موسیقی مکتبینین تار صینفینه، ۱۹۲۹-جو ایلده گنجه پئداقوژی تکنیکومونا داخیل اولور. سونرالار آذربایجانین بؤیوک بسته‌کاری اولان فیکرت امیروو و میثیل‌سیز تارزن ظریف قاییبوولا بیرگه تحصیل آلیر. «راست»ı، «شور»او، «زابول سگاه»ı تاردا محارتله ایفا ائتمه‌سی ایله شهرده تانینیر. تلبیکن آشیق و ائل هاوالارینی توپلاییب نوتا آلیر…