یوخاریدا اؤیرندیییمیز شکیللرین هر بیرینده اؤزونه مخصوص شکیلچیسی واردیر.

بونا گؤره ده او شکیللرین هامیسینا خصوصی شکیللر دئییلیر. دیلیمیزده بو خصوصی شکیللردن علاوه فعلین ائله شکیللری ده واردیر کی، فعلین گؤردویوموز بوتون شکیللری، زامانلاری، شخصلری و نوعلرینده ایشلنه بیلر. فعلین بو شکیللرینه عمومی شکیللر دئییلیر. فعلین باجاریق و سوال شکیللری بونلاردیر.

١- فعلین باجاریق شکلی:

بو شکلی دوزلتمک اوچون هر بیر فعلین کؤکونه، اگر سس سیزله قورتارارسا، "آ- ه" و اگر سسلی ایله قورتارارسا "یا- یه" علاوه اولار و اوندان سونرا "بیلمک" فعلی گلیب تصریف اولار، بو تصریفده اصل فعل ثابت قالار. مثلا: یازا بیلیرم+ گؤره بیله جه یم+ آلا بیلمیشدیم..

فعلین بوتون شکیللرینین باجاریق شکلی ده اولا بیلر. مثاللار:

مصدر شکلی : یازا بیلمک

امر شکلی: یازا بیل

شهودی کئچمیش: یازا بیلدیم

نقلی کئچمیش: یازا بیلمیشم

دواملی کئچمیش: یازا بیلیردیم

اوزاق کئچمیش: یازا بیلمیشدیم..

ایندیکی زمان: یازا بیلیرم

قطعی گلجک: یازا بیله جه یم

غیر قطعی گلجک: یازا بیلرم..

غیر شهودی: یازا بیلرمیشم..

لازیم شکلی: یازا بیله سی یم..

واجب شکلی: یازا بیلمه لی سینیز..

داوام شکلی: یازا بیلمکده یم..

شرط شکلی: یازا بیلسم..

باجاریق شکلینین اینکار علامتی"بیلمک" فعلینه علاوه اولان "ما- مه" دیر. مثلا: یازا بیلمیرم- یازا بیلمه سم – آلا بیلمه میشدینیز...

فعلین سوال شکلی: فعلین سوال شکلینین علامتی "می- مو" دور کی، فعلین استثناسیز بوتون زامانلاری، شکیللری و نوعلرینده فعلین آخرینا آرتیریلیر. مثلا: یزدین می؟، گؤرموشسونوزمو؟... بونلار اسم، صفت، سای و عوضلیکلرله ده ایشله نه بیلر. یاددا ساخلاماق لازیمدیر کی، امرین ایکینجی شخصلرینده "می؟" سوال علامتینی ایشلتمک اولمور.