بو شکیلچیلرله عمله گلن فعلی باغلامالار بیر ایشین باشا چاتدیغی آن، فاصله ایکینجی ایشین باشلانماسینی بیلدیریر. مثلا: اوشاق آناسینی گؤرجک اوستونه آتیلدی.

بو شکیلچیلرین یئرینه، فعلین مصدریندن سونرا، "همان" سؤزو ایشلنه بیلر. مثلا: آتی مینجک سوردوم= آتی مینجک همان سوردوم.

بو فعلی باغلامالار دا ساده جمله ده زامان مضمونو بیلدیره رک ظرف اولور. مثلا: ائلناز ائوه یئتیشجک اوزانیب یاتدی.

بو فعلی باغلامالار دا ساده گئنیش جمله لر ده فعلی باغلاما ترکیبی یارادیر و مرکب زامان ظرفی اولور. مثلا: مکتب مودورو مکتبه چاتجاق زنگ وورولدو. جمله سینده "مکتب مودورو مکتبه چاتجاق" سؤزلری بیرلیکده مرکب زامان ظرفیدیر.

آندان- ه ندن/ یاندان- یندن/

بو شکیلچیلرله دوزه لن فعلی باغلامالار جمله نین اساس فعلینین کئچمیشده باشلاندیغی زامانی بیلدیریر. مثلا: قارداشیم دارفنونو قورتاراندان بری معلم ایشلنیر. ائلدار مکتبه گلندن من اونلارا تانیشام. آیاقدان دوشندن سونرا یول گئتمک دوغرو دئییلدیر. بونلاردا فعلی باغلاما ترکیبی و جمله نین اساس فعلینین مرکب زامان ظرفی اولور.

آن٢ /یان/

بو شکیلچیلر فعلی صفت شکیلچیلرینه ده اوخشاییر، لاکن فعلی باغلاما اولاندا بونلاردان سونرا "کیمی" یا دا نادیر حالدا "دک- جان٢ " قوشمالاری حتما ایشلنیر، حالبوکی فعلی صفتلر ده اونلار ایشلنمز. مثلا:"یئتیشن مسافیر استراحت ائتدی" جمله سینده "یئتیشن" فعلی صفتدیر. و "مسافیر" سؤزونو تعیین ائدیر. لاکن" یئتیشن کیمی مسافیر استراحت ائتدی" جمله سینده "یئتیشن" سؤزو فعلی باغلامادیر."یئتیشنه دک- یئتیشنه جن".

بو بو فعلی باغلامالار جمله نین اساس ایشینین باشلانماسیندان فاصله سیز قاباق بیر ایشین باشا چاتماسینی بیلدیریر. مثلا: اوشاق درسی اوخویان کیمی باشا دوشدو.