زامان ظرفلری ایش و حرکتین اجرا اولوندوغو زامانی بیلدیریر. بو ظرفلر "هاچان؟- نه وقت؟ نه زامان؟" سواللاریندان بیرینه جواب وئریر. بو ظرفلرده قورولوشلارینا گؤره اوچ جور اولور.

الف- ساده زامان ظرفلری:

بیر سؤزدن عبارت اولان و زامان آنلاییشینا مالیک اولان ظرفلره ساده زامان ظرفی دئییلیر. مثاللار: ایندی- سحر-آخشام- همیشه- تئز- گئج..

ب- دوزلتمه زامان ظرفلری:

بیر سؤز و بیر شکیلچیدن دوزه لن ظرفلره کی، زامان مفهومونا مالک اولار، دوزلتمه زامان ظرفلری دئییلیر. چوخ ایشلنن نوعلری بونلاردیر:

١- "لیک" شکیلچیسی آرتیرماقلا دوزلنلر. مثال: همیشه لیک- هله لیک- ایندیلیک..

٢- "جه" شکیلچیسیله دوزلنلر. مثال: ایندیجه- اولجه-اؤنجه..

٣- "دان- دن" شکیلچیسیله دوزلننلر. مثال: سحردن- آخشامدان- گئجه دن- چوخدان..

مرکب زامان ظرفلری:

ایکی سؤزدن دوزلن و زامان بیلدیرن ظرفلره مرکب زامان ظرفلری دئییلیر. بو ظرفلری دوزلتمک یوللارینین مهملری بونلاردیر:

١- ایکی زامان ظرفیندن دوزلنلر، آرالاریندا خط یازیلیر. مثال: تئز- تئز، سحر- سحر، تزه- تزه،..

٢- زامان آنلامی داشییان کلمه لرین اولینه "بو- او" عوضلیکلری گتیرمکله دوزلیر. مثال: او گون- او ساعت- او ایل- بو دفعه..

٣- ساده زامان ظرفلرینه "چاغی- اوستو- باشی- وقتی" سؤزلریندن بیرینی علاوه ائتمکله دوزلیر. مثال: آخشام چاغی، آخشام اوستو، گئجه وقتی..

٤- زامان بیلدیرن کلمه لرین اولینه " بیر- هر- هئچ" سؤزلرینی علاوه ائتمکله دوزلیر. مثال: بیر گون- هر وقت- هئچ وقت- هر گون..

۵- زامان بیلدیرن اسملرین تکراری و اونلارین آراسیندا "با- به" یازماقلا دوزلیر. بو کلمه لرین آراسیندا تیره قویولماز.مثال: ایل به ایل، گون به گون..