ایش، حال و حرکتین مقدارینی، کمیتینی بیلدیرن ظرفلره مقدار و یا کمیت ظرفلری دئییلیر. بو ظرفلر نئجه؟ نه قدر؟ سواللاریندان بیرینه جواب وئریر. قورولوشلارینا گؤره بو ظرفلر اوچ جور اولور.

الف- ساده مقدار ظرفلری:

بیر سؤزدن عبارت اولان مقدار مفهومو داشییان ظرفلره ساده مقدار ظرفی دئییلیر و ان چوخ ایشلننلری بونلاردیر: آز- چوخ- خیلی- تام- تامام

ب- دوزلتمه مقدار ظرفلری:

دوزلتمه مقدار ظرفلری دیلیمیزده آزدیر. ان مهملری بونلاردیر:

١- "ایله- له" سؤزلرینین مقدار مضمونلو سؤزلره آرتیریلماسی ایله دوزلنلر. مثلا: تمامیله- بوتونلوکله- دفعه لرله..

٢- "جا- جه" شکیلچیلریله دوزلنلر. مثال: ذرجه- آزجا- دنیالارجا- بیر قاریشجا..

٣- "دان- دن" شکیلچیلریله دوزلنلر: آزدان- چوخدان..

ج- مرکب مقدار ظرفلری:

ایکی سؤزدن دوزلن و مقدار آنلامی داشییان ظرفلره مرکب ظرفلر دئییلیر. بو ظرفلری دوزلدن مهم یوللار بونلاردیر:

١- ایکی ساده مقدار ظرفیندن دوزلنلر. مثال: آز- آز، چوخ- چوخ، آز-چوخ..

٢- مقدار سایلارینین تکراریله دوزلنلر. مثال: بیر- بیر، اوچ- اوچ..

٣- "بیر" سؤزونون واسطه سیله مختلف کلمه لردن دوزلن مرکب مقدار ظرفلری. مثال: بیر قدر- بیر آز- بیر آغیز- بیر نئچه..

٤- "دفعه- یول" سؤزونون واسطه سیله سایلاردان دوزلنلر. مثال: بیردفعه- اون دفعه- مین دفعه، یوز یول..

۵- ایکی سایدان دوزلنلر. مثال: بیر- ایکی، بئش- اون، اون- اون بئش..

۶- ایکی سؤزون تکراریندان دوزلنلر. بونلارین آراسیندا خط یازیلمالیدیر. مثال: دؤنه- دؤنه، تکرار- تکرار، برک- برک، قات- قات...