ایش و حرکتین باش وئردییی یئری بیلدیرن ظرفلره یئر ظرفلری دئییلیر. بو ظرفلر هارا؟ هارایا؟ هارادا؟ هارادان؟...سواللاریندان بیرینه جواب وئریر. یئر ظرفلری ده قورولوشلارینا گؤره اوچ جور اولور:

الف- ساده یئر ظرفلری.

بیر سؤزدن عبارت اولان ویئر مفهومو داشییان ظرفلره ساده یئر ظرفلری دئییلیر. بونلارین بعضی سینده حال شکیلچیلری ده اولور، لاکن مضمونجا ساده دیر. مثاللار: آرخا- یان- کنار- بری- ایچری- ایچریده- یوخاریدا- بورادا- یاخین- آشاغیدا..

ب- دوزلتمه یئرظرفلری.

ساده یئر ظرفلرینه شکیلچی قوشولماقلا دوزلن ظرفلره یئر ظرفلری دئییلیر. بو ظرفلر دیلیمیزده چوخ آزدیر. بیر نئچه نمونه: آرالیق- آرالیقدا- اورتالیغا- اوزاقدان- یاخینلیقدان..

ج- مرکب یئر ظرفلری.

یئر مفهومو اولان ایکی سؤزدن دوزلمیش ظرفلره مرکب یئر ظرفلری دئییلیر. بونلارین مهملری آشاغیداکیلاردیر:

١- ایکی ضد سؤزدن دوزلن مرکب یئر ظرفلری. مثاللار: اورا- بورا- اوردا- بوردا- ساغا- سولا- دال-قاباق- ساغدان-سولدان- اوردان- بوردان..

٢- یئر معناسی اولان کلمه لرینن اولینه "او- بو" عوضلیکلریندن بیرینی آرتیرماقلا دوزلنلر: او طرفده- او یاندا- بو یاندا- او بوجاقدا- بو ائوده

٣- یئر مضمونلو سؤزلره "هر- هئچ" کلمه لرینی آرتیرماقلا دوزلنلر. مثال: هر یئرده- هریاندان- هر گوشه دن- هر کوجه ده..

٤- یئرمضمونلو کلمه لرین اولینه "بیر" سایینی آرتیرماقلا دوزلنلر. مثال: بیر یاندا- بیر طرفده- بیر طرفدن..