بوتون دیللرده اولدوغو کیمی، آنا دیلیمیزده ده ائله سؤزلر واردیر کی، اونلار انسانلارین، حیوانلارین سسلرینی و یا طبیعتدن ائشیدیلن تقلیدی- یامسیلاماسی یولو ایله یارانیر.

بو یوللا یارانان سؤزلرین بعضیسی آرتیق معین وارلیق بیلدیرن اسملر کیمی ایشلنیر. مثلا: "میغ" سسیندن "میغمیغا" سؤزو، "قا- غا- قور" سسلریندن "قورباغا" سؤزو، "تیس" سسیندن "تیسباغا" سؤزو، "جیر" سسیندن "جیرجیراما" سؤزو، "پیس" سسیندن "پیس- پیسا" سؤزو، "شاق" سسیندن "شاققیلداماق" سؤزو... مئیدانا گلمیشدیر.

دیلیمیزده گئنیش شکیلده ایشلنن "دودک، توتک، شاپالاق، قهقهه، تپیک...کیمی اسملر، ائله جه ده خورولداماق، قیشقیرماق، باغیرماق، زیریلماق، زاریلداماق، کیشنه مک، فیسیلداماق، گورولداماق... کیمی مصدرلرین هامیسی یامسیلاماقدان تؤره نن کلمه لردیر.

یامسیلامالار دیلیمیزده چوخ ایشلنن سؤزلردن حساب اولا بیلر، اونا گؤره کی، سؤز یارادیجیلیغیندا اونلاردان چوخ استفاده اولور. مثلا: "باغیرماق" مصدری عادی بیر فعل کیمی تام تصریف اولماقلا برابر، اوندان مختلف اسملر، صفتلر و ... دوزلتمک مومکوندور. مثلا: باغیردان- باغیرارکن- باغیریب- باغیرتی- باغیر...

١- ساده یامسیلامالار: ساده یامسیلامالار تکجه بیر سؤزدن عبارت اولور. مثال: فیس- شاپ-هام-قور-مع- پیچ- قار- شیر

٢- دوزلتمه یامسیلامالار:

دوزلتمه یامسیلامالار بیر سؤز، ساده یامسیلاما بیر سؤز دوزلدیجی شکیلچیدن دوزه لیر. مثال: فیشقیریق- فیسیلتی- شیریلتی- پیچیلتی- خیریلتی- زیریلتی- گورولتو- نریلتی- هنیرتی.