عادی جمله لرین بوتون عضولری مختلف علاقه لرله بیری- بیرینه باغلی اولور، لاکن جمله ده ائله سؤزلرده اولور کی، جمله نین او بیری عضولریله باغلی اولمور او بیری عضولرین عکسینه هئچ بیرسوال جواب وئرمیر. بئله سؤزلره "آرا سؤزلر" و یا "مودال سؤزلر" دئییلیر.

آرا سؤزلر اوچ گروپدور. ١- آرا سؤزلر. ٢- خطاب ٣- جمله نین اولینده ایشلنن "بلی-یوخ- خئییر- یاخشی" سؤزلری.

آرا سؤزلر: آرا سؤزلر دانیشانین سؤیلدییی فکره مناسیبتینی بیلدیریر. معنا خصوصیتلرینه گؤره آرا سؤزلرین آشاغیداکی نوعلری وار:

١- یقین بیلدیرنلر: البته- البته کی- شبهه سیز- حقیقتا- دوغرودان- دوزو- سؤزون دوغروسو، سؤزسوز کی، معلوم اولدوغو اوزره..

٢- شبهه، گومان و احتمال بیلدیرنلر: بلک- بلکه ده- احتمال کی- دئیه سن- گومان کی- یقین کی..

٣- غیر معینلیک بیلدیرنلر: نئجه دئیرلر- نه تهر دئیرلر...

٤- تاسف بیلدیرنلر: تاسف- تاسف کی- حئییف- حئییف کی..

۵- دئییلمیش فیکرین منبعیینی بیلدیرنلر: منجه- سنجه- سیزجه- ظنیمیزجه- روایته گؤره- فیلانکس دئمیشکن..

۶- نتیجه و عمومیلشدیرمه بیلدیرنلر: خلاصه- دئمک- دئمک کی- دئمه لی- بئله لیکله- سؤزون قیساسی- مختصر- عمومیتله- آخیر کی...

۷- فیکرین سیرا و سلسله سینی بیلدیرنلر: اولا- بیرینجیسی- ایکینجیسی..

بیر سیرا سؤز بیرلشمه لری ده جمله ده آرا سؤز اولا بیلر. مثلا: " بو آخشام، اولا بیلسین کی، دوستلاریملا گؤروشه جیم" جمله سینده "اولا بیلسین کی" سؤز بیرلشمه سی جمله نین او بیری اساسی و غیر اساسی عضولرینه هئچ بیر علاقه سی یوخدور و بونا گؤره ده بو جمله ده " آرا سؤز بیرلشمه سی" حساب اولور.