تبریز دیالکتینین مورفولوژی خصوصیتلری آذربایجان ادبی دیلی ایله مقایسه ده داها آیدین گؤرونور. بورادا اسمین حال و منسوبیت فورمالاریندا، صفتین درجه لرینده، فعلین شکیل و زامانلاریندا، کمکچی نطق حصه لرینده فرقلی خصوصیتلر نظره چارپیر. بیر سیرا دؤرد جور ایشلنن شکیلچیلرین آز واریانتلیغا دوغرو اینکیشافی، سیرا سایلارینین – مینچی، - یمینچی شکیلچیسی ایله ایفاده اولونماسی، "نه مه نه"، "بیله"، " بوقیبیل" عوضلیکلرینین و فعلی باغلاما شکیلچیلرینین ایشلنمه سی و بونا اوخشار بیر سیرا خصوصیتلر بو دیالکتین اؤزونه مخصوص مورفولوژی خصوصیتلره مالک اولدوغونو گؤستریر.

سؤزدوزلدیجی شکیلچیلر.

آذربایجان دیلینده مورفولوژی یوللا سؤز یارادیجیلیقی پروسئسینین اؤیرنیلمه سینده، قدیم سؤزدوزلدیجی شکیلچیلرین آشکارا چیخاریلماسیندا دیالکت و لهجه ماتئریللاری یازیلی عابیده لر قدر مهم دور. بعضا بیر و یا ایکی نمونه ده اؤزونو گؤسترن شکیلچی دیگر دیالکت و لهجه لرده، ائله جه ده یازیلی عابیده لرده باشقا سؤزلرده مشاهده ائدیلیر. بئله لیکله، شکیلچینین منشا یی و یاییلماسی باره ده گئنیش معلومات الده ائتمک اولور. تبریز دیالکتینده ده بئله شکیلچیلره راست گلمک ممکندور. بونلار دیلیمیزین قدیم خصوصیتلرینین قورویوب ساخلاماق باخیمیندان قییمتلیدیر. تبریز دیالئکتینده سؤزدوزلدیجی شکیلچیلر ایکی گروها آیریلیر.١ سؤزدوزلدیجی شکیلچیلر. ٢. فعل دوزلدن شکیلچیلر.