کیچیک فونتیک دییشیکلیکلری نظره آلماساق، آذربایجان ادبی دیلینده دیالئکت و لهجه لرده منصوبیت شکیلچیلری ائینیدیر. تبریز دیالکتینده ده منصوبییت فورماسینا خاص اولان گراماتیک واسطه لر معاصر آذربایجان ادبی دیلینده اولدوغو کیمیدیر. لاکن بعضی فرقلنمه لر نظره چارپیر.

تبریز دیالکتینده هر اوچ شخصین جعمینده سونو "خ" سسی ایله بیتن سؤزلره منصوبیت شکیلچیسی علاوه ائتدیکده "خ" سسی جینگیلتیلشیر و "ی" سسی ایله عوضلنیر. مثل: اورییز، اورییمیز..

تبریز دیالئکتینده بیرینجی شخصین تکینده (ن، ین، ێن) شکیلچیسی ده اؤزونو گؤستریر.مثل: منیم بی گؤزین او وخدن خسده اولوپدی.

تبریزین "دوه چی" محله سینده دوداقلانمایان صایتلی سؤزلر منصوبیت شکیلچیسینین دوداقلانان واریانتینی دا قبول ائدیر. مثل: خاطیرون، قرده شون، شاماخون(کله یاغی)، خالون..

ایکینجی شخصین جعمینده منصوبیت شکیلچیسی (ز، یز، ێزاوز،اۆز) شکلینده اولور. مثل:باجیز، هاممیز، قوناقیز، گؤزوز، دوشمنیز.. بوندان علاوه تبریزین آخماقایه لهجه سینده ایکینجی شخصین جعمینده (ییز، ییز، یێز، ییوز،ییۆز، ویوز، ۆیوز) منصوبیت شکیلچیسینه ده تصادف اولونور.مثل: زیلیییز(خالچا نوعو)، قسمتیییز، گولویوز

تبریز دیالئکتینده نادر حاللاردا صامتله بیتن سؤزلر ایکی قات منصوبیت شکیلچیسی قبول ائدیر. مثل: قیزلارین ساییسی اوغلانناردان آرتیخدی.. اوشاخلارین چوخوسو بی اوینی اویناللا...