تبریز دیالئکتینین آذربایجان ادبی دیلیندن، باشقا دیالئکت و لهجه لریمیزدن فرقلی خاراکتریک خصوصیتلری منصوبیت شکیلچیلی اسملرین حاللانماسیندا دا نظره چارپیر.

بیرینجی شخص شکیلچیسی قبول ائتمیش اسملر تاثیرلیک حالدا بیر واریانتلی (ی)، چیخیشلیق حالدا (نان، نن) شکیلچیلرینی قبول ائدیر. مثل: قولباخلاریمی، سؤزومی، الیمنن، قرده شیمنن، نه نه منن...

بیرینجی شخص منصوبیت شکیلچیسی قبول ائتمیش اسملرین حاللانماسیندا دیقتی جلب ائدن خصوصیتلردن بیری ده یییه لیک حالدا همین اسملرین حال شکیلچیسیز ایشلنمه سیدیر. مثل: جانیم پاراسی، بابام توکانی...

ادبی دیلده سونو صامتله بیتن ایکینجی و اوچونجو شخص منصوبیت شکیلچیلی اسملر حاللانارکن آدلیق حالدان باشقا، دیگر حاللار یالنیز متن دیلینده بیر بیریندن سئچیلیر. تبریز دیالئکتینده ایسه همین شخصلر حاللانما زامانی تام قرقلنیر. ادبی دیلدکی حاللانما فورماسی اوچونجو شخصده اولدوغو کیمی قالیر، ایکینجی شخصده ایسه (ن) منصوبیت شکیلچیسینین عوضینه (و) ایشلنیر. مثل: سه: آنت وئررم اؤز آتاوون روحونا. باشووا قورت داشلانیپتی..

قید ائتمک لازیمدیر کی، بو خصوصیتی بوتون جنوبی آذربایجان دیالئکتلرینه عاید ائتمک دوز دئییل. بو جهتدن اورمییه لهجه سی فرقلی موقع توتور. اورادا (ن) سسینین عوضینه (ی) ایشلنیر.مثل: قیزییین، قیزییا، ارییین..

تبریز دیالئکتینده ایستر سؤز کؤکلرینده، ایسترسه ده کؤکله شکیلچی سرحدلرینده تلفضله علاقدار یارانمیش ساده فورمالارا اوستونلوک وئریلیر. بئله حال تبریز دیالئکتینده ایکینجی شخصص تکین یؤنلوک حالیندا دا باش وئریر. بورادا (و) سسینین دوشمه سی سؤزون آسان تلفظونه امکان یارادیر. مثل: یادوا، جانوا، نظروه...