فعل

تبریز دیالکتینده بو نطق حصه سی ایله باغلی خصوصیتلر اؤزونو گؤستریر. بئله خصوصیتلر ایندیکی و غیری- قطعی گلجک زامانلاردا، امر و واجب شکیللرینده، باجاریق فورماسینین انکاریندا و فعلی باغلاما شکیلچیلرینده داها چوخ نظره چارپیر.

فعلین شکیللری

تبریز دیالئکتینده فعلین اساسن امر، خبر، آرزو، واجب و شرط شکیللری ایشلنیر. لازیم شکلینه ایسه تصادف اولونمور. تبریز دیالئکتینده ده لازیم شکلینین مضمونو گلجک زامانلا افاده اولونور.

امر شکلی.

امر شکلینی عمله گتیرن شکیلچیلر دیالئکت و لهجه لریمیزده مختلف فونتیک ترکیبده ایشلنیر. تبریز دیالئکتینده امر شکلینین بیرینجی شخص تکینده شخص شکیلچیسی ایکی فورمادا اولور:" ایم، اێم." مثل: باغلی ییم، اوتیریم، گؤریم.. بعضا ایسه امر شکلینین بیرینجی شخص جعمینده " آخ" شکیلچیسی ایشلنیر. مثل: گؤروشاخ، یییاخ، گئداخ، دولاناخ.. بعضن ده امر شکلینین ایکینجی شخص تکی "گینن" شکیلچیسی ایله افاده اولونور. مثل: گتیگینن، قالدیرگینن..

تبریز دیالئکتینده بو شکیلچینین اختصار اولونموش "ایینان، ایینن، ینان، ینن" شکلی ده مشاهده ائدیلیر. بقیشلینن، یئینن، دوزیینن.. دیینه کی، آلا قارقا، بالا قارقا، بالالاری یئتیم قالان قارقا وای!1 صاباح گینه گلسه دئینه وئرمیرم، قولاخ وئر دئینمه: رمزینین آتاسی گؤندریپ..

امر شکلینین ایکینجی شخص جعمی "اون، اۆن" شکیلچیسی ایله افاده اولونور. مثل: یاپیشون، دانیشون، سازلییون، ایچون..

تبریز دیالئکتینده ایکینجی شخص تک و جعمینده شخص شکیلچیسینین "ن" سسی دوشموش "سی، سێ، سو،سۆ فورماسیدا اؤزونو گؤستریر. مثل: شاهی آداملاری قویمیردیلار بیزیم داواررار اوردا اوتلاسی.. بیلار باشلاسیلا بیشماقا، بیز ده گؤزدییاخ نه تر اولور..