ایندیکی زامان

تبریز دیالکتینده فعلین ایندیکی زامانی مختلف فورمالارلا افاده اولونور. "ی، ێ، و، ۇ" شکیلچیلری تبریز دیالکتینده ایندیکی زامانین بیر فورماسی اولوب، اساسن اوچونجو شخصین تکینده اؤزونو گؤستریر. مثلا: پیشییین آغزی اته چاتماز، دییر ایی وئریری. اورا ان قدیم دمیرچی بازاری دئییلی..

تبریز دیالئکتینده "ی، ێ، و، ۇ" شکیلچیلری ایندیکی زامانین مورفولوژی علامتی کیمی چیخیش ائتمکله برابر، قدیم معنا خصوصیتیندن ده تمامیله اوزاقلاشمیش، فعلی باقلاما رولونو دا ساخلامیشدیر. مثل: هفده بازارا بیر ایکی قویین گلی ساتیلیری. گینه بولاری دیشینده آپاری، یوواسینا قویار..

"ی، ێ، و، ۇ" شکیلچیلری تبریز دیالئکتینده غیری قعطی گلجک زامان معناسی افاده ائتدییینه ده تصادف اولونور.مثل: گرخ گئدم، ننم نییاران قالی. آروات، بی گون گلی سن ده اوزینین تامام-کمال چیخاسان.

تبریز دیالئکتینده ایندیکی زامانین افاده واصته لریندن بیری ده " آ، ه" شکیلچیسیدیر. بو فورما تبریز دیالئکتینده ایندیکی زامان معناسیندا یالنیز اوچونجو شخصده ایشلنیر.مثل: ایندی ده گوننری سایاندا مه نیم ننم دییه کی، سوت گونی، دوز گونی..

تبریز دیالئکتینده ایندیکی زامانین افاده واصته لریندن بیری ده " ایی، ائی" شکیلچیسیدیر. بو شکیلچییه یالنیز اوچونجو شخصده تصادف اولونور. مثل: هاوا کی خوش اولیی، بیزدر باشلاروخ شیتیلین توخومون احمه یه. قید ائدک کی بو شکیلچی اردبیل دیالئکتی اوچون ده کئچرلیدیر.

تبریز دیالکتینده نظره چارپان خصوصیتلردن بیری ده فعلین زامانلاریندا، او جمله دن ایندیکی زامانین اوچونجو شخص جعمینده "لار،لر" شکیلچیسینین "لا، له" شکلینده ایشلنمه سیدیر. مثل: بیزده نوروز بایرامین چوخ طنطه نه لی توتیللا.