ادات

کمکچی نطق حصه لری آراسیندا اؤز خصوصیتلری ایله فرقلنن سؤز قروپلاریندان بیرینی ده اداتلار تشکیل ائدیر. تبریز دیالئکتینده ده اداتلارلا باغلی خصوصیتلر فونتیک جهته عایددیر.

١- ادبی دیلدکی داها اداتی تبریز دیالئکتینده – داهی شکلینده ایشلنیر. مثلا: بابا، داهی نیناخ .. بو ادات "ها" سسینین دوشمه سی ایله علاقه دار" دا " فورماسیندا دا اؤزونو گؤستریر. مثلا: دا موننان آرتیق نئینییه بوله رم.

٢- خیر، یوخ. بونلار تبریز دیالئکتینده ده انکار اداتلارینی تمثیل ائدیرلر. مثلا: یوخ، ایندی باشیمی قاشماغا وختیم یوخدی. خیر، یایلاخدا درس اوخیمیللار.

٣- دا، ده. تبریز دیالئکتینده ان گئنیش یاییلمیش اداتلاردان حساب اولونور. مثلا: نه یاخچی اولار کی، گلن هفته ده ائله بئله بو جور اوتوراخ.

٤- تبریز دیالئکتینده " کی" ادات کیمی فعال موقع یه مالکدیر. مثلا: ایندی کی، ایستیروخ قوناخلیخ وئراخ، اوندا گرح تویوخدان- زاددان آلاخ.

۵- لاپ. بو اداتا دا تبریز دیالکتینده تئز تئز تصادف اولونور. مثلا:من یورقونلوخدان لاپ خوردی-خمیرم.

۶- تبریز دیالئکتینده هم آخی، همده "آحی " شکلینده اؤزونو گؤستریر. مثل: بو توپین حرکتیننن بیر توپچی دا بیردا یاتیپ آحی..

۷- ها،هه. ایکی فورمادا مشاهده ائدیلن بو ادات تبریز دیالکتی اوچون خاراکتریکدیر. مثل: رمزی اوستا گلسه ها هش غمیمیز یوخدی.

٨. مه یه. مگر اداتینین تبریز دیالئکتینده ایشلنن فورماسیدیر. مثل: مه یه حاج داداش گیلدن گتممیسیز؟

٩- نه. تبریز دیالئکتینده مشاهده ائدیلن اداتلاردان بیری ده "نه" دیر. مثلا: باخ گؤرگینن بو آلما نه قشه دی.