کولت. آذ گونئی‌لی یازار و آراشدیریجی "ایواز طاها"نین یازیسینی تقدیم ائدیر:

“خ” ” و “غ” حرف‌لری بير هجالی سؤزلرين سوْنوندا و بوٍتون سؤزلرين اوْرتالاريندا اؤز سسی ايله يازيلير: آخ، يوخ، اوْخودوم.

آمما چوْخ‌هجالی سؤزلرين سوْنوندا «ق» حرفی ايله يازيلمالی‌دير: قالماق، بوداق.

بو سؤزلرین سونونا سسلی حرف آرتیریلیرسا اوندا “ق” حرفی “غ” حرفینه چئوریلیر: قالماغی /قالماغا، بوداغی /بوداغا.

سایت‌لارین بیرینده، نسیمی‌نین بیر بئتینده گئتمیش “ایراق” سؤزجویو یانلیشجا “ایراغ” یازیلمیشدیر:

تا اوزون شؤوقوندن “ايراغ” اولموشام پروانه تك؛

يانيرام ليل و نهار ای نور و ناريم هارداسان؟

“ایراق” سؤزو “اوزاق” و ظرف اولدوغوندان “اوزاقدا” آنلامینی داشیسا دا بعضن “دا” أکینی ده قبول ائدیر: ایراقدا. اؤرنک:

گول أکدیم شاختا ووردو؛

نه یامان واختا ووردو؛

او ظالیم اووچو منی؛

یاردان ایراقدا ووردو.

“گلمک” و “قالماق” کیمی سؤزلرین دئییلیش و یازیلیشیندا سس اویومو [آهنگ] قانونونا رعایت اولونمالی‌دیر. اؤرنه‌یین، “گلمک” مصدری “گلماخ” تلفظ اولوندوقدا و یا “قالماق” مصدری “قالمق” کیمی یازیلدیقدا آهنگ قانونو پوزولور. اؤرنه‌یین “بشر دئماق اولماز منه، اینسانام” کیمی میصراعدا “دئماق” مصدری یانلیش یازیلیب، دوزگون واریانت “دئمک” دیر.

سونوج:

یانلیش (اشتباه): ایراغ، بوداغ، قالماخ، گلماخ.

دوزگون: ایراق، بوداق، قالماق، گلمک.