کولت آذ گونئی‌لی یازار داوود عبدی‌نین یازیسینی تقدیم ائدیر:

کیمی/ کیمین

تکی/ تکین

ـ یازیلاریمیزدا چوخ زامانلار بو سؤزلری یانلیش اولاراق بیرـ‌‌بیری‌نین یئرینه ایشله‌دیریک

٭)کیمی/ کیمین:

سنین کیمین یالانچی آدام، یئر اۆزونه گلمه‌ییبدیر

بو جۆمله‌ده کیمین سؤزجویو مثل، مانند آنلامیندا ایشله‌نیبلیب و یانلیشدیر

کیمی: مثل، مانند

یاراشیق و اوخشارلی‌لیق اداتی اولاراق دیلیمیزده ایشله‌نیلیر.

سنین کیمی یاخشی آدام، گلمز داها بو دۆنیایا...

اسکی تۆرکجه‌ده:

کیب، کیپ،گیپ: مودئل، تای،اوخشار، بنزَر آنلامیندا وارایمیش، آنادولو تۆرکجه‌سینده ده گیبی اولاراق ایشله‌نمکده‌دیر [دیل دنیز سؤزلوگو: ایسماعیل هادی، ص‌ـ‌۶۹۰]

کیبی gibi: اوخشاتما سؤزو، مثل، سؤزلرین سونوندا گلر [سنگلاخ،خلاصه‌ی عباسی، میرزا مهدی‌خان‌استرآبادی، کتاب‌الکاف، ص‌ـ‌۲۸۴]
کیمی: مانند، مثل، بسان، همچون [شاهمرسی، تۆرکجه‌ـ‌فارسجا سؤزلوک، ص‌ـ۸۷۹]

کیمی: یاردیمچی دانیشیق بؤلمه‌لریندن اولان قوشمالاردان ساییلیر: مثل، مانند [سس‌ـ‌صرف، پروفسور زهتابی، ص‌ـ۳۳۱]

ـ کیمی سؤزجویو؛ مثل، مانند، تای، تک، آنلاملاریندان قیراق، سورغو اداتی و سورغو ورلیگی اولاراق دا ایشله‌نیلیر
کیمی گؤردون؟ آرازی

تانیشلاردان کیمی گؤردون؟ قونشوموزو

کیمی سؤزو، کیم ورلیگی‌نه ی آرتیریلیب یارانارکن، تا، دک، جان، جن آنلامی وئریر

ساعات دؤرده کیمی

اۆچ گۆنه کیمی، مندن سس چیخماسا، سیز ده گلین.

دۆننه کیمی آجیندان اؤلوردو، ایندی میللتی لوغازا قویور.

ـ‌کیمین: مال چه کسی

بو بؤرک کیمین بؤرکودور؟

البتته سایین شاهمرسی، ۸۷۹‌ ـ‌جو صفحه‌ده، کیمین سؤزجویونو،مانند اولاراق آچیقلاییبدیر و تام یانلیشدیر.

٭٭)تکی/تکین:

یئر اۆزونده سنین تکین گؤزل آدام وار می؟

ـ بو جۆمله ایچره تکین سؤزونو مثل، کیمی، مانند، همچون یئرینده ایشله‌تمک یانلیشدیر.

تکی: مثل، همچون، مانند،

سنین تکی یالان باشارماییرام دا.

تکی: تنها، تکجه، فقط،

تکی، بیر ساواشچی آیاق اۆسته قالمیشدی

[شاهمرسی، ص‌ـ۴۱۳]

تکی:

ربط اداتیندان اولاراق، تا، الی، کیمی... آنلامیندا گلیر.

سحره تکی(دک، تک) اویاق قالدیق

جرالد کلاورزن، تکی سؤزونو، تک سؤزونون اسکی فورمو بیلیب و تکمک، دگمک: دَیمک(بیر چاغین باشقا چاغا دَیمه‌گیندن یاراندیغینی دئییر).

[دیل دنیز ائیتمولوژیک سؤزجوگو، ایسماعیل هادی، ص‌ـ ۲۹۹].

تکی: مثل، مانند [سه سنگیاد باستانی، دؤهتور حسین محمدزاده صدیق، نشراختر، ص‌ـ ۱۴۸]

تکی: تک: دیب، آشاغی، تَحت باشد، ضدّ فوق،

قازانین تکی قارالمیشدی

چای چوخ دریندیر، تکی گؤرونمه‌ییر.[سنگلاخ، ص‌ـ۱۷۴]

تکین: تگین، تیگین، tigin ؛

شاهزاده، خوش‌ترکیب، زیباشکل، پهلوان، دلاور، موغولجادا چیگین دئییلیر [شاهمرسی، ص‌ـ۴۱۳]

تکین təkin ؛نیکو صورت باشد [سنگلاخ، ص‌ـ ۱۷۴]

تکین: تگین؛ شاهزاده، امیر

تاریخی امیر و بؤیوکلرین آدلارینین سونوندا گؤرونوردو.

آلپ‌تکین، سۆبای(سۆبگ‌تکین: سبک‌تکین) [دیل دنیز، ص‌ـ ۳۰۱]

تکین: تگین tigin ؛ شاهزاده [سه سنگیاد باستانی، ص‌ـ ۱۴۸]

گۆل تیگین: kül tigin؛ ائلداریز قاغان‌ین اوغلو، گؤی‌تۆرک شاهزاده‌سی. [سه سنگیاد باستانی، ص‌ـ ۳۸].

تکین آلپ: شاهزاده‌ی دلیر [تۆرکجه اینسان آدلاری، ایکینجی کیتاب، فرهاد جوادی، ص‌ـ۶۰۷]

تکین اَر: دلیر مرد بی همتا [آدلارـ۲، جوادی، ص‌ـ۶۰۷]

تکین سوی: از نژاد بی همتا(شاهان) [آدلارـ۲، جوادی، ص‌ـ۶۰۷].

گؤردویوموز کیمی، تکین سؤزجویو: مثل، مانند آنلامیندا یوخ، شاهزاده و بؤیوک آنلامیندا( چوخلوقجا غزنوی شاهلاری‌نین آدلاری‌نین آردیندان) گلیر و تکی سؤزجویونون یئرینه ایشله‌نیمه‌سی یانلیشدیر.