آخار. آذ ایلقار رسولون «همیشکی زنگ» حکایه‌سینی تقدیم ائدیر.

-یاخشی، بیلدیم، ناراحات اولما!

- من زنگ ائد‌ن‌ده ده، الین‌ده نه ایشین اولسا، ساخلا، جاواب وئر، بیلیرسن کی، ناراحات اولورام!

- اولدو، آنلادیم. هله‌لیک....

جاواب گؤزله‌مه‌دن تلفونو قاپادیب جیبینه قوی‌دو. چانتاسینین کمرینی چینین‌ده راحتلادی. شهادت بارماغینین اوجو ایله عینکینی بورنونون اوجوندان گؤزلرینه قالدیردی. هئچ کیمه دییب-دولاشماماق اوچون سکینین لاپ کناری ایله یولونا داوام ائد‌رک، کینایه قاریشیق تبسسومله باشینی ییرغالاییب اؤز – اؤزونه دئییندی:

- دوغولوروق، آیاغیمیز یئر توتونجا اورییمیز آتا-آنامیزدا قالیر، بیر آز دا باجی-قارداشیمیزدا. بؤیویوروک، اول اورییمیز سئودییمیزده قالیر، سونرا دا ائولندییمیزده. یاش‌لانیریق اورییمیز اوشاقلاریمیزدا قالیر، بیر آز دا ایشده-گوجده. یالنیز سونوموزدا اورییمیز یئرینه گلیر. او دا دؤیونمه‌یه یوخ، دایانماغا. بیز بو ایللر عرضین‌ده اورییمیزی یئرینده تاپیریق کی، هله بیر قورویاق دا؟! سن ده هر دفعه کیمینسه اورک توتماسیندان اؤلدویونو ائشیتدیینده، تلسیک زنگ ائدیب دئییرسن کی، اوریینی قورو...