آنا صحیفه ادبیات |
شاعره، مدنی فعال سمییه اسدی تبریزده دوغولوب. ۹ یاشیندان شعر یازماغا باشلاییب. شعرلرینی آذربایجان تورکجهسینده یازیر.
آخار. آذ سمیه اسدینین اؤز سسی ایله اولان شعرینی تقدیم ائدیر:
بیزلردن چوخ اؤنجه باشلاندی هر شئی
دوردو اؤنوموزده اوجا بینالار.
اوزاندی یول بویو قوووشماغیمیز
هله گؤسترمدی بیزی آینالار.
بیریمیز قوربتده، بیریمیز قریب،
سئوگی ایکیمیزدن داها چوخ اوزاق.
کیمسه آنلامیر آیریلیغیمیزی،
بیزی اوووتماغا تاپیلمیر قوجاق.
بیزلر اوچ آرزویوق، بیزلر اوچ اورک،
سئوگیدیر، وطندیر، بیر ده کی منم.
سئومهیه آلیشدیم وطنسیز یئرده،
وطنسیز آیاقدا دورموشام هله.
آلین یازیمیزدیر بئله یاشاماق،
قوووشا بیلمدن آیریلماق گرک.
حزنلو گئجهلر، دردلی گئجهلر
بومبوش بیر اوتاقدا باغیرماق گرک.
گناه منده دئییل، دوغولدوغومدا،
وطن بیر سو ایله چوخدان بؤلونموش
سئوگی ازیلمیشدی آیاقلار آلتدا،
اینسانلیق سادهجه آرزویا دؤنموش...
تاریخ
2017.05.08 / 19:42
|
مولف
آیتاج قدیراوا
|