گؤرکملی تورکیه لی شاعری اؤزدمیر اینجه ۱۹۳۶-جی ایل سنتیابر آیینین ۱-ده مرسینده آنادان اولموشدور. ۱۹۶۰-جی ایلده آنکارا قاضی ایتیم اینستیتوتونون فرانسیز دیلی بؤلمهسینی بیتیردیکدن سونرا پاریسده - ساربون اونیورسیتتینده تحصیلینی داوام ائتدیرمیشدیر. بدیعی یارادیجیلیغا لیسیده اوخودوغو زامان باشلامیشدیر.
فرانسادا ۵، بولغاریستاندا ۴، یونانیستاندا ۲، ایتالییادا و ماکدونییادا ۱ شعر کیتابی چاپدان چیخمیشدیر. آیری-آیری شعرلری آلمان، چوواش، هیند، یهودی، اینگیلیس، ایسپان، ماجار، رومین، پرتقال، روس و صرب دیللرینه ترجومه ائدیلمیشدیر. بیر سیرا شعر آکادمییالارینین (پاریس، بروکسل، استراسبورگ، کازابلانکا، لوکسنبورگ و س.) عضوودور.
اومید ائدیریک کی، شاعرین ۲۰۱۲-جی ایلده درج اولونموش ۵ جیلدلییندن گؤتورولموش بو شعرلر آذربایجان اوخوجولاریندا دا ماراق دوغوراجاق.
شاعر اولسان...
ای اوغول،
اگر بیر گون
شاعر اولسان،
گؤزون گؤزلرینده،
اوریین اورکلرینده،
اللرین اللرینده -
اینانجین دادینی آنلات
اؤلکهمین چوجوقلارینا.
ای اوغول،
اگر بیر گون
شاعر اولسان،
یعنی،
اومدوقلاریمیزین و
گؤزلدیکلریمیزین شاعری اولسان،
ساکین
ماسال آنلاتما
اؤلکهمین چوجوقلارینا.
زامان آخیب گئتمکده،
داغ-داش دییشمکدهدیر،
دمیر پاسلانماقدا،
بونؤوره چورومکدهدیر،
آل قلمی،
ان دوغرو بیلدیین
سؤزو یاز -
بودور، آتش،
بودور، آغاج،
بودور، آیاغیمیزداکی بوخوو،
بودور کورییمیزدهکی خنجر!
بودور، امییمیز -
آلین تریمیز،
بودور اؤلکهمیز...
قادینلاریمیز وار،
آلمانین بیر یاریسی -
هر آن اورییمیزده،
هر آن بؤیروموزده،
هر آن آلنیمیزین قیریشیندا...
قادینلاریمیز وار،
یازیلمامیش شعر،
آغزی باغلی کیتاب...
کیشیلریمیز وار،
آلمانین او بیری یاریسی -
بیر آز سرت،
بیر آز صبیرلی،
بیر آز قاراجا اوغلان،
بیر آز پیر سلطان...
ای اوغول،
اگر بیر گون
شاعر اولسان،
سئوگینی چوخالت،
اوریینی آچ،
اونو -
گؤزل اؤلونو آنلات
اؤلکهمین چوجوقلارینا...
قوش
بیر قوش اوچوردو
سیساملا قوشاداسی
آراسیندا.
آنلایا بیلمدیم
تورکییهلی ایدی،
یوخسا یونانیستانلی؟
کیم بیلیر،
بلکه ده قریبدی،
بامباشقا بیر مملکتدن
گلیب...
دنیزدن سوروشدوم،
دئدی، بو بیر دجل قوشدور.
سحر-آخشام دئمدن
دیمدیکلییر کؤکسومو...
گونشدن سوروشدوم،
دئدی،
بو بیر سرگردان روحدور -
یئرله-گؤیله اللشیر...
بالیقلاردان سوروشدوم،
قاییقلاردان سوروشدوم -
بیر دوروست سؤز دئمهدیلر.
بیر قوش اوچوردو
سیساملا قوشاداسی
آراسیندا.
آنلایا بیلمدیم
تورکییهلیدی،
یوخسا یونانیستانلی؟
کیم بیلیر،
بلکه ده قریبدی،
بامباشقا بیر مملکتدن
گلیب...
سوروشدوم،
ای قوش،
هانسی مملکتدنسن،
کیملردنسن؟
دئدی،
من بیر قاغایییام،
کاینات یاشیندا،
مملکتیم:
یئر اوزو و گؤی اوزو،
سرحددیم: تورپاق و هاوا...
****
کیچیک قیزا
خیالیمدا
هیکلینی
دوزلتدیم سنین،
قویدوم
بنؤوشیی دان یئرینین
ساحلینه،
گلیب
ساچلاریندا یووا قوردو آی،
قوشلار تکجه سنینله دانیشدیلار،
چیچکلر تکجه سنینله دانیشدیلار -
آنلادین دردلرینی،
گؤردون یارالارینی...
سحرین
ساعت بئشی
قارداشیندیر سنین،
چؤلون
چاکیل داشی
قارداشیندیر سنین،
گون باتارکن -
بنؤوشه اولاجاقلار،
ایینلرینه
رنگلی کؤینک گئیهجکلر.
تک سن آنلادین
اونلارین دردلرینی،
تک سن گؤردون
اونلارین یارالارینی...
یئنی بیر سؤزلوک یاراتدین،
اؤزون اوچون،
قوشلار اوچون،
چیچکلر اوچون،
چاکیل داشلاری اوچون...
ائو -
نفسی کسیلمیش،
بنیزی سولموش آت،
مکتب - سورگون یئری،
گؤی اوزو - یوخدو، یوخ،
کوچه - گئدر-گلمز،
دونیا - آشیلماسی زور دیوار،
یوخو - تک سیغیناجاق...
- اؤلومدن قورخمادینمی،
کیچیک قیز؟
- یوخ، چونکی چوخ اؤلو گؤردوم:
گؤیدن یاغان قوشلاری،
جان چکیشن پیشیی،
سسی کسیلن آغاجلاری...
بیر شهرین اؤلدویونو گؤردوم،
اؤلومون اؤلدویونو گؤردوم.
خیالیمدا
هیکلینی
دوزلتدیم سنین،
قویدوم
بنؤوشیی دان یئرینین
ساحلینه...
پای
دوغولماق اوچون - بیر واخت،
بؤیومک اوچون - بیر واخت،
یاشاماق اوچون - بیر واخت.
اکین اکمک اوچون - بیر واخت،
ائو تیکمک اوچون - بیر واخت،
سئویشمک اوچون - بیر واخت.
باخماق اوچون - بیر واخت،
گؤرمک اوچون - بیر واخت،
آنلاماق اوچون - بیر واخت.
نه؟ اؤلمکمی دئدین؟
اؤلمهیه واخت یوخدو.
بو ایل ائرکن گلدی قیش
بو ایل ائرکن گلدی قیش.
یاغیش یاغیر،
یاغیش یاغاندا
داها چوخ سئویرم سنی.
قار یاغیر،
قار یاغاندا
داها چوخ سئویرم سنی.
سولار دوناندا،
آغاجلار اوشوینده،
اومیدیم قیریلاندا،
اورییم سیخیلاندا
داها چوخ سئویرم سنی.
دونموش سودا - دمیر تامی،
آغزیمدا - توتون آجیسی...
هر صاباح
پای-پیادا دولاشیرام
آنکارانین کوچهلرینده، -
باخیرام
دیوارلارا یاپیشدیریلمیش
اعلانلارا،
موغننیلرین رسملرینه،
بؤیرو-باشی جیریلمیش
آفیشالارا.
هارا گئتسهم،
ایچیمده بیر گئجیکمیشلیک
دویغوسو وار -
سانکی گئجیکمیشم هر شئیه:
اومیده،
اوغورا،
سئوگییه...
بو ایل ائرکن گلدی قیش.
سانکی
سونو اؤلومله بیتن
معناسیز بیر رومانین
قهرامانلاریییق...
بو ایل ائرکن گلدی قیش.
گؤی اوزونو وئریب،
عوضینده اوزونو آلیرام،
اللریمله سیلیرم
دردلرینی،
آجیلارینی...
گؤزلرینی قویورام
اومیدسیزلیین یئرینه،
اینتظار دولو،
حسرت دولو
نم گؤزلرینی...
چرشنبه گونو
اولکر چرشنبه گونو گلهجک،
کیتابلار، درگیلر گتیرهجک،
تمیز آلت پالتارلاری گتیرهجک...
اولکر چرشنبه گونو گلهجک،
اوزونده گونش،
گؤزونده ابدی یاز،
بیر ده دنیز،
بیر ده یاشیللیق،
بیر ده تسللی، اومید...
بو گون بازاردی
یوردومون هبسخانالاریندا،
صاباح بازار ائرتهسی،
سونرا چرشنبه آخشامی،
سونرا چرشنبه.
چرشنبه گونو
اولکر گلهجک.
چرشنبه گونو
اولکر گلهجک -
اوزو قار بیازی،
گؤزلری یوسون یاشیلی،
اما
کؤلگهده و گونشده
دییشیر رنگی،
دییشیر
اوزو ده،
گؤزو ده...
اوزو قار بیازی،
گؤزلری یوسون یاشیلی
اولکرین...
اولکر
زیتون آغاجلارینین
آراسیندان کئچیب گلهجک،
اللری
داغلارا،
دنیزلره،
بولودلارا توخوناجاق،
ساچلاریندا رئچینا اتری
دوراجاق
دمیر بارماقلیقلارین آرخاسیندا
آللی-گوللو یاز مؤوسومو کیمی...
بو گون بازار،
اولکر
چرشنبه گونو گلهجک
بیر ایرماغین دنیزلشمهسینی
دوشونه-دوشونه...
دیلک
ایدریس پیغمبر،
درزیلرین پیری،
ایزن وئر،
گؤزل بیر شئیر یازیم
من ده.
یاشیم قیرخی کئچدی،
قوجالیرام آرتیق،
ایزن وئر،
گؤزل بیر شئیر یازیم
من ده.
آدیما، هئچ اولماسا،
بیر دفعه "اوزان" دئسینلر
اؤلمهدن اؤنجه.
ایدریس پیغمبر،
درزیلرین پیری،
ال توت،
کؤمک ائت،
بیر دوکان آچیم،
بیر کؤینک بیچیم
اؤزومه من ده،
آستاری سؤزدن،
اوزو سؤزدن،
ساپی ابریشیمدن.
من ده
گؤزل بیر شئیر یازیم آرتیق،
اوخودوقجا قیسقانیرام
او بیری جیزماقاراچیلاری.
شرابلاری بول،
ایلهام پریلری یانلاریندا،
بیلیرلر
گئجه نئچه ساعت سورور،
گوندوز نئچه ساعت -
اؤیرتمیش اوستالاری...
من ده
گؤزل بیر شئیر یازیم آرتیق،
جیبلرینه قوشوزومو،
لبلبی دولدوروم،
پارکا آپاریم،
کؤکه آلیم اونا،
قیویرجیق ساچلارینی
روزگارلا داراییم،
من ده
گؤزل بیر شئیر یازیم آرتیق،
قیامت گونونده
یالنیز قالماییم...
ایدریس پیغمبر،
درزیلرین پیری،
ائی اوستالار اوستاسی،
ایزن وئر،
تک بیر بئیت یازیم،
تک بیر بئیت،
آدیما هئچ اولماسا،
بیر دفعه "اوزان" دئسینلر
اؤلمهدن اؤنجه…
دؤرد دیوار آراسیندا
بیر شئیلر قاپانیردی
بیر یئرلرده،
بلکه بیر قاپی،
بلکه بیر مزار،
اما
تاوان اولماسینا
تاوان دئییلدی،
بلکه بیر یانغیندی،
آلوو-آلوو، توستو-توستو -
قوشلارین اوچوشوندان،
دووشانلارین تلاشیندان
ائله سئزدیم...
اما
تاوان اولماسینا
تاوان دئییلدی،
کیمسه
"بیر آزجا ایشیق، ایشیق وئرین،
بیرجه دقیقلیینه،
بیرجه دقیقلیینه،
بیچاق کیمی اوچوروملارا،
قایا کیمی دیوارلارا
هکک ائدجهیهم!" - دئیه هایقیردی...
بیر شئیلر قاپانیردی
بیر یئرلرده، -
کیمینین بختی،
کیمینین اوریی،
کیمینین قاپیسی،
کیمینین پنجرهسی...
اما
یاشاماسی اوچون
او بیر دقیقهنی
اونا وئرمهدیلر،
وئرمهدیلر،
وئرمهدیلر،
وئرمهدیلر...
بیر شئیلر قاپانیردی
بیر یئرلرده،
بلکه بیر قاپی،
بلکه بیر مزار،
اما
تاوان اولماسینا
تاوان دئییلدی...
یورغون دئییلهم
یورغون دئییلهم
نه سنی دوشونمکدن،
نه سنی گؤزلهمکدن...
یورغون دئییلهم
نه عشقدن،
نه دوستلوقدان،
نه اؤلوم تلاشیندان...
یورغون دئییلهم
نه آغری-آجیدان،
نه اومیددن،
نه قورخودان...
نه کئچمیشدن،
نه ایندیدن،
نه گلهجکدن...
بیر یالنیزلیغیم قالدی
آشیلمالی،
یورغون دئییلهم،
یورغون دئییلهم...
ساحلدهکی قادین
بلهدهم، بلهدهم
بوتون سیرلرینه،
بیر یئل دییرمانی
دنیزدن اسن روزگارا
بلد اولدوغو کیمی...
نه گتیردی
سنی بو ساحله،
چؤرک دردیمی،
سو دردیمی،
ساحلدهدیمی بوتون چارهلر؟
قاپقارا قارانلیغی
ایشیغین اوستونه -
بیلیرم، دؤزهجکسهن،
گونش
دار آغاجیندا
دوغانا قدر!..
* * *
بازار گونو کئچمک بیلمیر...
بیردن
بیر قوواق بوی وئریر
پنجرهمین اؤنونده،
قاپینی چیرپیر کولک،
آشاغیدا - باغدا
بیر قیز باخیر ساعتینا -
کیمدی، ندی گئجیکهن:
سئوگیلیسیمی،
باهارمی؟..
بازار گونو کئچمک بیلمیر...
تورپاغین آلتیندا
بوز کیمی اریگیر گونش،
سئودییم
گؤی قدر اوزاق،
یئر قدر یاخین،
آرامیزدا
آیریلیغین آمانسیز
توفانلاری -
آرتیق
اودوم-اودوم
آلیشیرام یارپاق
تؤکومونه...
