حوصه‌له‌سیز قلمی الینده اوینادیردی. تاپشیریق یازماغا حالی یوخ ایدی. معلملری صاباحا چوخلو تاپشیریق وئرمیشدی، آنجاق تئللی بیر سطر یازار-یازماز سیخیلدی. او، قلمی آغزینا سالیب چئینییردی. بیردن قلم قیشقیردی:
-وااای! نه خبردی، قیز؟ ناهار یئمه‌ییبسن، بو جور منی آغزینا سالیب چئینییرسن؟
تئللی بو سسی ائشیدیب تئز قلمی آغزیندان چیخارتدی. گؤردو قلمین باشیندان آغ قان گلیر. تئز قاچیب بیر یارا بانتی گتیریب قلمین باشینی اونلا ساریدی. سونرا دئدی:
-نه ائدیم؟ نه ائتمه‌لییم؟ کیمی اینجیدیم؟ کیمله دانیشیم؟ هاردا اویناییم؟ هارا گئدیم؟
بیردن بیره کیتابین آراسیندان بیر قیز باشینی قالدیریب دئدی:
- گل منله اوینایاق.
تئللینین گؤزلری تپه‌سینه چیخدی. سونرا تپه‌سیندن قالخیب گئتدی دی‌دی تاوانا و قاییتدی دوشدو اؤز یئرینه. قیز دئدی:
- منیم آدیم کبری‌دیر. باخ ایندی ایستییردیم کی، تاپشیریغیمی یازاسان.
تئللی آز باخدی چوخ باخدی، نهایت یادینا گلدی. هه بو قیز کبری‌دیر. قیزدان سوروشدو:
- گلیرسن منله اوینایاق؟
- بیر شرطیم وار. گرک اؤنجه دفتریمی آختاریب تاپاق. دفتریم تاپیلاندان سونرا اوینایارام، آخی صاباح معلمه تاپشیریقلاریما باخاجاق. تئللی ایله کبری گئتدیلر کبری گیلین ائولرینه. اورادا هر یئره باش چکدیلر، ماسانین آلتینا گیردیلر، ایشکافین، چانتانین ایچینی آختاردیلار، قازانلاری داغیتدیلار، خالچالاری قاهاردیلار،یورغانلاری آچدیلار. آز آختاردیلار، چوخ آختاردیلار، آنجاق دفتری تاپا بیلمه‌دیلر.
یورغون-آرغین دوشدولر یئره. کبری دئدی:
- گل، گئدک پئتروسدان سوروشاق، بلکه، او دفترین یئرینی بیلر.
دوردولار گئتدیلر پطروسون یانینا. داغلاری قالخدیلار، دره‌لری ائندیلر، دوزه‌نلیکلری کئچدیلر، گئدیب چاتدیلار پطروسون یانینا. گؤردولر پطروس دنیزده چیمیر. تئللی دئدی:
- بس سن نیه الینی بندین دئشیینه سوخمامیسان؟
پطروس دئدی:
- یاشار منیم یئریمه الینی بندین دئشیینه سوخموشدو. چوخ ایستیریدی گیره کیتابین ایچینه. دونه‌ن صینیفده منیم ناغیلیمی اوخویاندا باشین سوخموشدو کیتابین ایچینه. دئدیم، نیه بئله ائدیرسن؟ دئدی، آخی ایستییرم گیریم کیتابا، گلیم سنین یئرینه. اوندا داها مجبور دئییلم تاپشیریق یازام، مکتبه گئدیم، چؤرک آلیم.
من‌ده دئدیم، نه ائدک، گل، منیم یئریمه. سونرا الیمی دئشیکدن چیخارتدیم اودا گیردی کیتابا. او زاماندان بو یانا ائله اوردا قالیب.
تئللی دئدی:
- منه باخ کی، هر دفعه سن تاپشیریق یازاندا سنه اورییم یانیردی. دئییردیم، یازیق پطروس نئچه ایلدی آج-یالاواج یورغون-آرغین اوردا قالیب. اما، دئمه، سن بورادا اویناییب کئف ائدیردین. کبری دئدی:
- یاخشی ایش گؤردون، پطروس. نه معناسی وار ایدی، نئچه ایل سفهلر کیمی بوش-بئکار الینی بندین دئشیینه سوخموشدون .آدام سنین ناغیلینی اوخویاندا حوصله‌دن گئدیردی.هله بونلاری قوی قیراغا، سن منیم دفتریمی گؤرممیسه‌ن؟
پطروس دئدی:
- ینه دفترینی ایتیرمیسن، پینتی قیز؟
کبری دوداقلارینی پطروسا بوزوب دالین اونا چئویردی. تئللی دئدی:
- کبری نین دفترینی آختاریریق. سن بیزه یاردیم ائدرسن؟
پطروس:
- نه ائدک، داها من‌ده سیزینله بیرگه آختارارام. اما بیر شرطیم وار. منه سؤز وئریرسیز کی، سیزه دئدییم سؤزلری و بورادا اویناماغیمی آناما دئمه‌یه‌جکسیز؟
تئللی:
- یاخشی، دمریک. سونرا اوچو یولا دوشوب گئتدیلر کبری نین دفترینی آختارماغا. داغلاری قالخدیلار، دره‌لری ائندیلر، دوزنلیکلری کئچدیلر. گلدیلر چاتدیلار داغین اتیینده بیر چوبانا.
چوباندان سوروشدولار:
- سن کبری نین دفترینی گؤرمه‌میسن؟
چوبان اونلارا باخیب-باخیب دئدی:
- بلی گؤردوم، دونن پارکدا قاچا-قاچا گئدیردی.
اونلار گلدیی یولدان قاییدیب شهره چاتدیلار. قاچا-قاچا گئتدیلر پارکا. اورانی گزدیلر، اما دفتری تاپا بیلمه‌دیلر. بیردن بیره تئللی دئدی:
- وااای! بیلیرسیز، نه اولدو؟
او چوبان یالانچی چوبان ایدی. بیزه یالان دئییب باشیمیزی آلداتدی. کبری:
- گلین پلیسه زنگ ائدک، دئیک کی، یالانچی چوبان بیزی آلدادیب.
سونرا گئتدیلر بیر تاکسافوندان پلیسه زنگ ائتدیلر. پلیسلر ده گئدیب چوبانی توتوب گتیردیلر. یالانچی چوبان دئدی:
- واللاه یالان دئمیرم. کبرینین دفتری پارکدا ایدی. قاچا-قاچا گئدیردی. دئدیم هارا گئدیرسن؟ دئدی، گئدیرم بالیقلی چاییندا چیمیم. او، قدر منیم ورقلریمه تاپشیریق یازیبلار کی، اوزوم قارالیب. آز قالیب پیسدیکلییه اوخشایام. تئللی، پطروس و یالانچی چوبان گئتدیلر بالیقلی چایین قیراغینا. چایین او بیری تایینا باخدیلار، بو تایینا باخدیلار. بیردن کبری قیشقیردی:
- اوردادی، اوردادی دفتریم، - و الی ایله چایین اورتاسیندا اولان بیر یئکه داشی گؤستردی. دفتر دونیادان خبرسیز داشین اوستونده اوتوروب آیاقلارین ساللامیشدی سویا. کبری دفترینی چاغیردی. دفتر کبری و دوستلارینی گؤرن کیمی اونلارا محل قویمادان یئریندن قالخیب شاپپیلتی ایله توللاندی سویون ایچینه. ورقلرین آچیب سویو چیپچیلاتدی.
کبری دئدی:
- نئجه دفتریمی توتوم؟
یالانچی چوبان آغاجینی اوزاتدی دفتری توتسون، آنجاق آغاجی قیسا ایدی دفتره چاتمادی. پطروس دئدی:
- بیر قوش لازیمدی گئدیب دفتری دیمدینه آلیب گتیره بیزه.
اونلار یئنه یولا دوشدولر. پارکی آختاردیلار، گؤیه باخیب قوشلاری سسله دیلر. آنجاق هئچ قوش اونلارین هایینا های وئرمه‌دی. بیردن گؤزلری آغاجین اوستونده اوتورموش بیر قارغایا ساتاشدی. قارغا قانادین چینینه دایامیش یوواسیندا اوتورموشدو. تئللی دئدی:
- آی قارغا خالا، نه اولوب بئله فیکیره دالیبسان ؟
قارغا کدرلی حالدا دئدی:
- نه دئییم آخی، منیم بیر بالام وار. او نئچه گوندو داها قاریلدامیر. چیلچیلی جوجه ایله دوست اولاندان بری بئله اولوب. جو-جولدویور.
تئللی دئدی:
- بیز بیر ایش گؤرسک، بالان قاریلداسا، اوندا سن ده کبرینین دفترینی سودان چیخارا بیلرسن؟
قارغا دئدی:
- هه، یقین بو ایشی ائدرم. سیز بیر بو ایشی گؤرون، تئز بالام قاریلداسین.
تئللی، پطروس، کبری و یالانچی چوبان باشلادیلار دوشونمه‌یه. یالانچی چوبان دئدی:
- من یولونو بیلیرم، قارغانین بالاسی نئجه قاریلداسین .
یالانچی چوبان گئتدی بالا قارغانین یانینا دئدی:
- وااای اورا باخ بیر تولکو گلیر بو یانا سنی توتوب آپاریب بیشیریب یئسین. تئز قاریلدا آنانینی سسله .
بالا قارغا چوبانی سایماییب دئدی:
- جیک جیک من سنی تانیییرام. دونن صینیفده معلمه‌میز ناغیلینی بیزه دئدی. سن یالانچی چوبانسان. هر سؤزون یالاندی، جیک-جیک سنین سؤزونه اینانمیرام.
یالانچی چوبان سوزوله-سوزوله قاییتدی یولداشلارینین یانینا. سونرا کبری گئتدی بالا قارغانین یانینا. کبری دئدی :
- بالا قارغا، نازلی قارغا، منه ده گؤروم او ندیر کی، قیش دا گؤیدن گلیر یئرین اوزونه؟ آغدی، هامینی اوشودور. قارغا دئدی:
- آا بو آساند تاپماجادیر، جیک-جیییک قاردیر. قیش دا گؤیدن یئره یاغیر، آغدیر هامینی دا اوشودور جیک-جیک...
کبری دئدی:
- یاشاسین، ایندی بیر ده اونون آدینی ده، گؤزلیم.
قارغا دئدی:
- قار جیک-جیک.
- تئز-تئز دالبا-دال دئنن، تئز اول.
- قار، جیک قار، جیک قار، جیگیک.
- یوخ، ائله دئمه، «جیک-جیک» دئمه، تکجه دئنن قار. باخ بئله «قااار، قااار، قااار».
اما بالا قارغا کبرینین سؤزونه های وئرمدن ائله هئی دئییردی: جیییک-جییک قار، جیییک-جییک قار.
کبری حیرصیندن الینی آتیب ساچلارینی یولدو تؤکدو یئره. سونرا اوردان چیخدی، گئتدی یولداشلارینین یانینا و اونلارا دئدی:
- اده، بو بالا قارغا چوخ مایماخدی ها! نه قدر چالیشدیم ائده بیلمدیم.
تئللی دئدی:
- سیز هئچ ایش باجارمیرسیز! من اؤزوم گئدیب بالا قارغانی قاریلدادارام.
تئللی گئتدی بیر حکیم گتیردی، بالا قارغانی معایینه ائتدی. حکیم بالا قارغانین گؤزلرینه باخدی. آغزینی آچیب چوبوغونو سوخدو بوغازینا. حکیم بالا قارغانی باشدان آیاغا معایینه ائلییب دئدی:
- وای! بونون اوریی دوشوب دابانینا، اوریی دابانیندا دؤیونور. ائله اونا گؤره اؤز دیلینده دانیشمیر. گرک اوچ گون اوچ گئجه بونو آغاجدان ترسه آساسیز، اوندا اوریی قاییدیب دوشر اؤز یئرینه.
تئللی تئز قارغانین قانادلاریندان یاپیشدی و سونرا بیر ایپ گتیریب قارغانین آیاغینا دویونله‌ییب اونو آغاجدان ترسه آسدی. اوچ گون اوچ گئجه کئچندن سونرا تئللی قارغانی آغاجدان ائندیردی، سونرا قارغادان ایسته‌دی کی، آناسینی چاغیرسین. قارغا باشلادی یئنه جوجول‌ده‌مه‌یه. تئللی اوزگون قاییتدی دوستلارینین یانینا. تکجه پطروس قالمیشدی گئدیب بالا قارغانی قاریلدادسین. پطروس بیر آز دوشونندن سونرا دئدی :
- هه یولو ائله بودور. بالا قارغانین قاریلداماسینین چاره‌سی من‌ده‌دیر. سونرا گئتدی بالا قارغانین یانینا. پطروس بالا قارغانین قارشیسیندان یوخ، دالیندان یاواش یاواش اونا یاخینلاشدی. بالا قارغا دونیادان خبرسیز آغاجین اوستونده اوتوروب جوجولدییردی.
بیردن-بیره پطروس قارغانین دوز قولاغینین دیبینده چوخ کوبود سسله میولدادی:مییووو، مییووو.
یازیق قارغا گؤیه اوچوب اوجا سسله قاریلدادی:
-قااار! قااار!
سونرا اوچوب قاچدی آناسینین قوجاغینا . قارغا دا سؤز وئردیی کیمی گئدیب کبرینین دفترینی سودان توتوب گتیردی. سونرا کبری، تئللی، پطروس، یالانچی چوبان، قارغا و بالا قارغا ال-اله وئریب اوینادیلار.
