کولت. آذ تبریزلی یازار اومید نجارینین «بیرجه من ایسلانیردیم» حکایه‌سینی تقدیم ائدیر.

دولو یاغیردی.

بیر ایت دؤردیولدا، پیادا زولاغیندان آخسایا-آخسایا کئچیردی.

اما کوچه‌لر، دیوارلار، دیلنچیلر، حتی او آخسایان ایت بئله ایسلانمیردی.

«یاغیش آلتیندا بیرجه من ایسلانیردیم... بیرجه من!» – بو سؤزلری او دئییردی!
داریخماق داغ باشیندا دوران عسگرین تلفن آرزوسویدو، داریخماق همین «نیه یوخسان» سؤزویدو!

سیرا بیزه چاتاندا، چتیرلر آچیلمادی!

سیرا بیزه چاتاندا «سئوگی» تئاتریندا بیلطلر قورتاردی!

بیز دیوارین بو طرفیندیدیک... یاغیشلی طرفینده!

بو شهرده ایشسیزلییمیز بئله وئجیمیزه دئییلدی، اللریمیزی جیبلریمیزده بوغوردوق!

خوشبختلیک گنجلیک کوچه‌سینده باغلی بیر ماغازایدی، قاپیسی قیفیللی.

موشتریسیزلیکدن پنجره‌لرینی توز باسمیشدی.

من ایسه قارانلیق ائوده اوتوروب ایشیق پولونو اؤد‌ه مکدن یورولموشدوم.

سن دئمه، گئجه‌لر اولدوزلار دا بیزیم ائوده‌ن الکتریک آلیب یانیرمیش... – بو سؤزلری او دئییردی!

حیاتیمیز کربلا یولو، آجی باغیرساق کیمی، آجی... هم ده اوزون!

گوناهیمیز ایسه بیزدن نئچه یاش بؤیوک ایدی. کئچیلمز اولموشدو.

لاپ دوز چؤره یی آیاقلامیش کیمی، لاپ آنانی آغلاتمیش کیمی، یا دا آتانین اوزونه آغ اولموش کیمی!

بیز هله ده دیوارین بو طرفیندیدیک... یاغیشلی طرفینده! – باشی چینیمده، بو سؤزلری او دئییردی.

بیز یوخ ایکن، اؤلوم پاییزدا گلمیشدی. اؤلومون آیاق ایزلرینی گؤرموشم دئییب، آند ایچیردی او.

دونیا بیر پالید آغاجییدی، بالتالاندی. بو شهرده قاپیمیز تاپیلمادی، بیز کیمسه‌سیزلیکدن اؤنجه کوچه‌سیزلیکدن یورولموشدوق.

منیم اللریم، قوللاریم پالتار سرمک اوچون زیوه اولا بیلردی. قوللاریم قویون سورمک اوچون بیر دَیَنک، یا دا، بیر قوجانین قولتوغوندا چلیک اولا بیلردی. منیم قوللاریم تکجه قول اولا بیلمزدی کی، کیمسنی قوجاقلایا بیلسین!

نه یازیق کی، اؤزوموزو ایتیرمه‌یه داوام ائدیردیک. هر گون بیر پارچامیزی، هر گون بیر تیکه‌میزی سالیب ایتیریردیک و سونرالار اؤز ایتیردییمیز تیکه‌لریمیزی کوچه‌لرده یئریدیکجه گؤروردوک.

گوندن-گونه دیلنچیلرین اوووجلاری قدر یاشلانیردیق!

بیلیرسنمی؟ بیز اود توتمایاق دئیه، سو ایچیریک! – بو سؤزلری او دئییردی. آوتوبوسدا یانیمدا اوتوران قیزی دئییرم!

بیز دیوارین بو طرفیندیدیک... یاغیشلی طرفینده!

یاغیش دورمادان یاغیردی، اما نه آوتوبوس، نه اوتوراجاقلار، نه کوچه‌لر، حتی دؤردیولدان آخسایاراق کئچن ایت بئله ایسلانمیردی.

یالنیز او قیز ایسلانیردی، بیر ده من!

نهایت آوتوبوسون سون دوراغیندا هامی ایگیرمی قپیینی اؤد‌ه ییب دوشوردو.

اما یالنیز او قیز ائنمه‌دی، بیر ده من!

بوتون بو سؤزلری دئیه‌ن قیز، قوللاریمدا دونیاسینی دییشدی.

او قیزین آخیرت ائوی قوللاریم اولدو.

او قیز قوللاریملا بیرگه اؤلدو!