کولت. آذ گونئی‌لی شاعر کیان خیاوین "سورما ایستکلریمی!" آدلی شعیرینی تقدیم ائدیر:

سورما، نازلیم!
ایستکلریم بیر اوووج کوله دؤنرک،
سوورولوب گئتدیلر اوزاقلاردا.

بیردن بیره شاملار اوفلندی سانکی
و عمرومون هر چاغی آخشاما دؤندو.

نه زامان باخدیم کؤنلومه
تئلسیز بیر گیتارا گؤردوم سسله‌نمه‌یه‌ن.
کی یالانجا گؤزل اولدوغو قدر
گؤزلجه یالانمیش سئویب-سئویلمک.

سورما، نازلیم!
اوزاقلاردان
مینیاتور باغلارا بنزر ایستکلر
باغچیلاری
ان آدسیز، ان آدامسیز قالان شاعرلر.

منسه نه زامان ایستدیم سنی
گؤروشدن اؤنجه باشلاندی آیریلیق.

یوخ، سئوگیلیم!
سنسیز بو مینیاتور باغلار،
منیم دئییلدیلر آرتیق.

سورما، سورما!
ایستکلر بیر اوووج کوله دؤنرک،
سوورولوب گئتدیلر اوزاقلاردا.
منسه، سنله راستلاشدیغیم زاماندان
سوورولوب گئتمه‌یه چالیشمادایام.