معصومه جبارپور تبریزده دونیایا گلیب. آنا دیلیمیزده یازیب-اوخوماغی اؤز امگی سایه‌سین‌ده الده ائدیب. جبارپورون ایلک شعیرلر کیتابی فارس دیلین‌ده چیخیب. یازدیغی شعیر و یازیلارینی «معصوم» تخل‌لوسو ایله ایمضالاییب.

کولت. آذ گونئی‌لی شاعره معصومه جبارپورون «قوروماز کسیلن دیللرین قانی» شعرینی تقدیم ائدیر:

چارمیخا چکیلن آغریلاریم تک
قابارلی سؤزلریم کیتابلاریمدا.
ایللردیر یانیری بیر اوووج اورک،
گؤز یاشی بویلانیر قابارلاریمدا.

قلملر، آسیلی بیر شهید کیمی
اوخشاییر، سیزلاییر آغ واراقلاری.
کؤرپه اوشاقلارین اورکک خیالی
اویادیر ایچیمده اؤتن چاغلاری.

کؤهنه یارالاریم آذر آییندا
سیخیر اورییمی یئنی درد اولور.
۱۳۲۴ اولایلاریندا
بیری نامرد اولور، بیری مرد اولور.

هله ده گؤزوده یانان کیتابدا
ادیپات‌دی اوینایان اوشاقلار یانیر.
بیر جئیران بالاسی الین‌ده کیتاب
سلاح‌لی عسگری بیر قارداش سانیر!

قوروماز کسیلن دیللرین قانی،
آخی وطن بویدا قفس اولارمیش؟
یاراشمیر اینیمه یادلارین دونو
وطن گول آچارمیش، وطن سولارمیش!

تکجه الیفبا یوخ ،تکجه لؤحه یوخ،
گئجه‌دن گوندوزه یئتن یانیردی
تکجه معلم یوخ، تکجه سؤزلوک یوخ،
تبریز آلوولانیب، وطن یانیردی.