کولت. آذ گونئی آذربایجانلی شاعر اومید نجارینین شعرینی تقدیم ائدیر:

گئجه یوروش ائدیر شهره...
ظولمت بالکونلاردان بویلانیر ظلملره.
قولاقلاریمیزلا گؤروردوک چوجوقلاری
چوجوکلارین ولوسیپدلری آلوو گوللری،
اویونجاقلاری سیاسی محبوس !
چکدیی رسیملرینده گونش بومبوز...
دیوارلار عسگر کیمی آیاق اوسته،
دیوارلار-محاربه.

...کؤلگه‌لر ایکی قات بیزدن هوندور
دیزلریمیزی بوکوردوک،
دیزه چؤکوردوک سؤزون سسسیزلیینده.
...اووجوموز- سو ایچمک اوچون،
اووجوموز -قوش یوواسی،
اووجوموز -ان سونونجو دین...
بیر کره گؤزلرینله دینله
آنجاق اووجلارینلا دیله‌نمه !

...سئوگی‌لیلرین دوداقلاریندا قوراقلیق
اؤپوشلر مسجیدلرین منبرینده مییت.
میناره‌لرده مینا پارتلاییشی،
کیلسه‌لرده علیل آرابالاری،
خالچالاردا خزان...
کوچه‌نین قارانلیغی بیر ایت ده ایتیر…
قاپیلار بیربیریندن بوشانیر.
ائولر ییه سیز، ائولر یئتیم
اؤزون یا اؤزگه... فرق ائتمز !

بیز-گئجه،
بیز -عسگر،
بیز -دیوار...
هئچ اولماسا بیر قاریش پنجره،
هئچ اولماسا بیر اودوم سو اول
گونش سنزورادادیر،
مملکت !