آخار. آذ نیلوفر شیخلینین " سئوگیدن هئچلییه" حکایه‌سینی تقدیم ائدیر:

ق- یاریقارانلیق اوتاق‌دا، آچیق پنجره‌نین اؤنون‌ده اوتورموشدو. خاطره‌لر باش آلیب گئدیردی...
بیر واخت، اونلار بیر-بیرینی آغلاسیغماز درجه‌ده چوخ سئویردیلر. گؤزل و ایده‌آل بیر چوتلوک!
چوخلاری اونلارا هسد آپاریردی: اؤز عشقینه قوووشمایانلار، قوووشوب آیریلانلار و هله سئوگینین نه اولدوغونو بیلمه‌یه‌نلر...
اما بو چوخ‌دان اولموشدو... ق-یا حتی ائله گلیردی کی، خاطیرلادیقلارینین هئچ بیری باشینا گلمه‌ییب، هامی‌سینی اؤزوندن اویدوروب.
...اونلار سویوق بیر پاییز گونون‌ده، تصادفه‌ن قارشیلاشمیش‌دیلار و ائله او آندان بیر-بیرینه وورولموشدولار، دلیلر کیمی...
ایلک باخیش‌دان محبت! – هانسینا کی، ک هر زامان اینانمیشدی، ق ایسه قلبینین ان مبهم گوشه‌لرینده آرزولامیشدی.

ک - اونو ملک سانیردی، اونون گؤزون‌ده ان گؤزل و ان مئهریبان قادین ایدی؛ باشینا دولانیر، بالاجا آغ اللرینی دؤنه-دؤنه اؤپوردو. ق ایسه، اونو اؤز خیاللارینین قهرمانی حساب ائدیردی – خیرخواه و گوجلو.

سئوگیلرینی سؤزله ایظهار ائتمه‌یه گرک یوخدو، باخیشلاری سؤزلردن داها دولغون و داها معنالی ایدی. بیر-بیرینین گؤزونده دونیانی گؤروردولر. بیر-بیرین‌دن باشقا دا، هئچ کیمسه‌نی گؤرموردولر. بیرلیکده کئچن ساعتلار آن کیمی اوچوب گئدیردی، آیریلیق دقیقه‌لری ایسه ایللردن ده اوزون اولوردو. هر شئی ناغیللارداکی کیمی اعجازکاردی! اصلین‌ده، ائله بو اؤزو بیر ناغیل ایدی – اونلارین اولوی و سماوی محبتلری حاق‌دا ناغیل!

اما بوتون بونلار کئچمیش‌ده قالمیشدی... ایندی نه محبت واردی، نه اینام، نه ده اومید. اومید ایسه ان سون‌دا یوخ اولدوغونا گؤره ...
غصه و یورغونلوق ق-نین بوتون وارلیغینا حاکم کسیلمیش‌دی. کؤورک قلبینی منگنتک سیخان آمان‌سیز سوکوتدا ایلشیب دوشونوردو...

«گنجلیک! اؤمرون بو چاغین‌دا، گله‌جک – جازیبدار، خومار بیر اولدوزا بنزییر. اینسان، بوتون سرحدلری آشا بیله‌جک، بوتون چتین‌لیکلرین عهده‌سین‌دن گله بیله‌جک بیر گوج حس ائدیر اؤزون‌ده. هر دوغان گون اوولکین‌دن داها ماراقلی اولور. اب‌دی محبته اینانیر و اونون گلیشینی گؤزلییرسن. ایچین‌ده ائله بیر دویغو اولور کی، سانکی سنه هئچ بیر بدبخت‌لیک اوز وئره بیلمز؛ نسه اولسا بئله، سونو موطلق یاخشی‌لیقلا بیته‌جک. دوشونورسن کی، حیاتا هانسیسا بؤیوک بیر میسییانی یئرینه یئتیرمه‌یه گلمیسن. ایشیقلی صاباحا، حکیملرین خرچنگ خسته لیینین درمانینی تاپاجاغینا، عالیملرین زامان محرریکینی ایجاد ائدجیینه، یادپلانتلیلرین بیزیمله علاقه یاراداجاقلارینا و داها نلره اینانیرسان...

اما زامان اؤتور، گونلر کئچیر، ایللر بیر-بیرینی اوز ائدیر و گئتدیکجه آنلاییرسان کی، دوشوندویون کیمی دئییل؛ هر شئی داها مورککب، داها غلیظدیر. ماراقسیز گونلر، جاوابسیز آرزولار، یئرینه یئتیریلمه‌ین ودلر و اونودولان سؤزلر ده وار حیاتدا...

ان دوغما، ان یاخین بیلدیین آدام سندن اوزاقلاشا، یادلاشا بیلر. بو ایسه بیردن-بیره اولمور... نه بیر گونه، نه بیر ایله... یئکسنکلیکلر اوزوندن دقت یایینیر، آزالیر، گئتدیکجه حیاتا رنگ قاتان شئیلر یوخا چیخماغا باشلاییر: پارکلاردا گزینتیلر، بیرلیک‌ده کونسئرتلره، فیلملره گئتمکلر... بونلارین یئرینی گون‌ده‌لیک قایغیلار، میشت پروبلملری توتدوقجا، هر شئی دییشیر، رنگلر بوزومتوللاشیر، دونیا آدیلشیر...

چالدیغین مئلودییالار داها اونو افسونلایا بیلمیر، سنی قوجاقلاییب اؤپوشلره قرق ائتمیر، ساده‌جه، مورگولییر... سؤز-صحبتلر، موباحثه‌لر چوخالیر... اینجیکلیکلری اونودوب باریشا بیلمک گئتدیکجه داها چوخ زامان آپاریر. هر آجی سؤز ایتی بیچاق کیمی اوریی داها درین یارالاییر...

ان دهشتلیسی اودور کی، بیر گون آییلیب گؤرورسن کی، تانیدیغین، سئودیین اینسان داها یوخ‌دور، اونون یئرینی هئچ زامان سئوه بیلمیجیین باشقا بیریسی توتوب. بیر زامانلار اؤز مهریبانلیغییلا سنه قوت وئره‌ن، حضور گتیره‌ن دوغما گؤزلره باخدیق‌دا سویوق بیر بوشلوغا دوشورسن. بوز باخیشلار ایلیینه ایشلییر، دامارلارینا دولور، بوتون ظریف حسلرینی آمانسیزجاسینا دوندورور... و... سئوگی اؤلور...»

ق- بونلاری دوشوندوکجه، آچیق پنجره‌دن ایچری بوی‌لانان کولک، اونون ایپک تئللرینی اوخشاییر، ایلیق نفسیله یاشلانماغا باشلامیش گؤزل اوزونده‌کی نارین گؤز یاشلارینی قوروتماغا چالیشیردی.

بو مومکون‌دورمو؟ سئوگی ده اؤله بیلرمی؟!

مین ایللردیر کی، اینسانلار بو سوالا جواب آختاریرلار. ساکیت آخشاملاردا حیات صحیفه‌لرینی ورقلیرکن، بیزی ترک ائد‌نلری، اؤز خوشوموزلا ایتیردیکلریمیزی و ووسایینا چاتمادیقلاریمیزی دوشونوروک. یوخوسوز گئجه‌لرده، بوز کسیلمیش یاتاق‌دا اوزاناراق صینقین کؤنلوموزون شیکایتینی دینلییر، بیر واختلار بیزه قاناد وئره‌ن، ایچیمیزی تیتره‌دن، میثیل‌سیز سئوینج گتیره‌ن کئچمیشلری خاطیرلاییریق.
بلی... بعضا محبت اینسانین بوتون اینستینکلرینی اؤزونه تابع ائدیر، گؤرمه‌یه، ائشیتمه‌یه، فیکیرلشمه‌یه قویمور. محبت، هئچ ده دوشوندویوموز کیمی آبستراکت مفهوم دئییل‌دیر! او – جان‌لی‌دیر؛ دوغولور، یاشاییر و اؤلور... او، بیز اونا اؤیرشه‌ن زامان، لاقید و بیگانه قالان زامان اؤلور. محبت وردیشی سئومیر، چونکی وردیش – سوکونت، عادیلیک و سویوقلوق دئمک‌دیر. محبت‌سه - آلوودور، احتیراس‌دیر، حرکتدیر! او، دییشکنلیگیله بیر حال‌دان باشقا حالا کئچه‌ن ماددنی خاتیرلادیر و بو موختلیف‌لیگیله بیزی گاه سئوینمه‌یه، گاه دا قمله‌نمه‌یه وادار ائدیر.

دئییرلر کی، محبت‌دن نیفرته بیر آددیم‌دیر. بلکه ده... بس، بیگانه‌لییه نئجه؟ سئوگی اؤلونجه اونون یئرینی نه توتور؟ ندیر بو بوش‌لوغو دولدوران؟ نیفرت‌می؟ آغریمی؟ بلکه ده، ائله بو بوشلوقدور روحوموزو چکیب سونسوز قاران‌لیقلارا آپاران؟

ق- نه بو سواللارا جواب، نه ده یاشاماق اوچون اؤزون‌ده گوچ تاپا بیلیردی. بیرجه اونو بیلیردی کی، بیر زامانلار اونلار بیر-بیرینی چوخ سئویردیلر و چوخلاری اونلارا حسد آپاریردی: اؤز عشقینه قوووشمایانلار، قوووشوب آیریلانلار و هله سئوگینین نه اولدوغونو بیلمه‌یه‌نلر...