آقشین ائوره‌ن قوزئی آذربایجانین ایستعدادلی شاعرلریندن، کامران یونیس ایسه پئشکار آکتیورلارینداندیر.

آخار. آذ خبر وئریر کی، سئویلن آکتیور ایستعدادلی شاعریمیزین یئنی «شاه تهماسیبه مکتوب» شعیرینی سسلندیریب.

سؤزوگئدن شعیرین متنینی و ویدئوسونو تقدیم ائدیریک:

شاه تهماسیبه مکتوب

نیزه‌لرین اوجونا ایلیشه‌ن کفه‌ن پارچاسی

صولح بایراغی تک یوکسه‌لر باشیمیزین اوستونده:

باخ، اؤلوم آلتی بئله بیزی صولحه چاغیریر،

اؤلوم صولحو باغیریر، شاه!

غفیل قیلینجلار دوغرایار آتلارین کوت سسینی،

قاپیلار هر گون داریخار، گؤزلیر ایت سسینی.

بیردن قبیرلر دولدورار بوش تورپاق کیسه‌سینی

الینی دونیادان چکیب ائوینه گئدر الله.

شاه!

اینسان تورپاقچون دؤیوشر. آتلار نالیندان ییخیلار

اؤلموش آتین آیاغیندان بیزه باخار آیپارا

– یعنی گؤیلر یئره ائنر... گؤیلر گلر دؤیوشه

گؤره‌ن نئجه اولار بیر گون تورپاق آیاغا قالخیب

اینسانلارین اوغروندا گئجه-گوندوز دؤیوشسه؟

من ده تورپاق ایستدیم بیر اوشاغین دیبچیینه تؤکمه‌یه...

سونرا قیلینجلار دوغرادی آتلارین کوت سسینی،

قاپیلار هر گون داریخدی، گؤزلدی ایت سسینی.

بیز ده معشل یاندیردیق اؤنوموزو گؤرمکچون

عکسینه، توستو قالخیب توتدو گؤزلریمیزی.

نال سویوغو گئجه‌ده بیر سوالیم وار سنه،

بؤیوک شاه حضرتلری:

بوغ‌دانین اورتاسین‌داکی خط

چؤریی یاری بؤلمه‌لی اولدوغوموزا ایشاره دئییلمی؟