کولت آذ گونئی‌لی یازار اکبر رضاپورون حکایه‌سینی تقدیم ائدیر:

باجیم مندن چوخ بؤیوک ایدی. کند ده چایدا یویوناندا منی‌ده یویوندوراردی. قاییداندا ائوه، هره‌میزین چیینینده بیر یوک پالتار گلردیک. ساچ لارینین اوجو بوز باغلاردی باجیمین. باخاردیم بوزلارا؛ سوروتله‌نردی یئرده.

شهرده بوتون ایگیدلرین گؤزو باجیم دا اولارمیش؛ ساچلاری نین آرزوسوندا.

عمومی حامامدا قوجا آرواد الین چکدی باجیمین ساچلارینا: "فیلان قدره آلارام دئدی ساچلاریوی".
فیلان قدره بیر حه‌یط آلابیلردیک.
آنام دئدی: "یوخ، هئچ بیلیرسیز من نه قدر زحمت چکمیشم او ساچلارا؛ جانیمی قویموشام".

ایگیدلرین بیری باجیمی الیمدن آلدی. ساچلارین دا گیزلتدی. اوشاغی اولدوقجا باجیمین، لایلالارینا من ده قولاق آساردیم. بیرینجینه بیر جور لایلا، ایکینجینه آیری جور، اوچونجونه... دؤردونجونه. بئشینجی ده
ایگیتلرین بیری ده منی آپاردی، باجیمین لایلالاریندا الیمدن آلدی. باجیمین یئددی قیزی اوْلدو.

باجیمین باشی سانجی ائلردی. دئییردیلر اۆرۆ (غده سی) وار؛ ات ایله دری نین آراسیندا. اۆرلاری گؤتورمک اوچون، باجیمین ساچلارین دیبدن قیرخیردیلار. باخیردیم ساچلارینا توکولوردو یئره.

شهرین بوتون ایگیدلرینین گؤزو باجیمین قیزلاریندا اولوردو. هره‌سی بیر جور گؤزل؛ ساچلاری بئللرینده.