Kult.az گونئی آذربایجان‌لی یازی‌چی ع. ن- چاپارنین "کولک‌لي گئجه" آدلی حکایه‌سینی تقدیم ائدیر:

باياقدان ياغميش قار، کوله‌يين اللرينده اويناغان کيمي، گؤزلري‌نين اؤنونده اوْيناخلاييردي. کوْمبا- کوْمبا قار قوپاسيندان قوْپان قارلار، کولک نفسي ايله جانلانيرميش کيمي، اوجا بوْي روحلارا دؤنوردولر. بو قارانقولوقدا فضادا يالنيز ميدان اوْخويانلار، محض قاردان تؤره‌نن آغ- آپباغ روحلار ايديلار.

آرا بير، بولوتلارين هوجوموندان فاصيله دوشرهامان، آي اؤز سوْلغون قيافه‌سيني سمانين اؤن رتبه‌سينده ايتتيهام رديفينه چکه‌رک ساريمتيل- ساريمتيل گؤز اوخشاييردي.شاعيرين گؤزلري روحلار عالميني يارا- يارا، سوْلغون بنيزلي، ساريمتيل آيا ديکيلي قالميشدي. اوره‌ييندن قايناييب، ديلي‌نين اوجونا آخان سؤز مصراعلاري يانيغلي- يانيغلي فضاني سيزديريردي:

«نه قارانليق‌دي بو زيندان، نه سوْيوق،

نه اوچون آي بو قده‌ر رنگي سوْلوق »!

کولک يامانجاسينا دؤيور، ايستيقامت هئيکلينه دؤنن خيردا بوي آغاجلار، شيققينا مصراعلار ناغارات کيمي‌هايلانيرديلار. بو يانيق اوره‌کلرين عکس صداسي کيمي‌ايدي. بوز دوْناقلاري آغاجلارين بوداغيندان آسيلي‌ايدي. شريت‌دن آسيلان قاتي سيچيم تئل‌لري، آغاجلارين گؤوده‌لرينه هؤرولموشدو. حيط ده حياتين واريني ثبوت ائده‌ن خيردا بوْي آغاجلار، شاعيرين قانيندامي، جانيندامي قاتيشار- اوْنو ايچدن، قاينادا- قاينادا دئييديريردي:

جان وئرير

بير نئچه زنجيرلي

آمان » !

***
سن نه قده‌ر توتقونسان بو گئجه!

يوخ، جئيرانيم، منه هئچ اويارديمي توتقونلوق؟ فضا بئله‌دير! گؤرورسن. پنجره‌‌دن حيطه بير باخ. بئله بير کولک‌مي اوْلموشدو بو ايلده هئچ؟
– توتاليم فضا بئله‌دير. بونون سنه نه دخلي آخي؟

– يوْخ دئمه بونو. جئيران.

– گل، چاي گتيرميشم ايچ. ايندي سحر اوْلار. هله، ياتماييبسانداکي!

– ندي، اوْ- شعري؟ ياديندامي اوْخويارديم سنه. ساهيردن دئييره‌م «حبيب ساهير»دن.

– هه، باي و شاعير- داي.

– اؤزودور. باجاريرسانمي‌ ايندي... اوْخو.

– ... – ...

– دي تئز اول...

– آخي‌هاميسيني خاطيرلايا بيلميرم. شاعيري ده بو يامان حاله... اوْتوروب سامان اوسته، فيکره داليب... گل دئييم. گل دئييم کيملر اوچون ياز- بري گل/ ياز، شاليکارليغي وصف ائيله بير آز/ پالچيق ايچره چاليشان قيزلارا ياز...

***

کولک اوْولداييردي، آي بولوتلارين اللرينده‌ن قوتارار يئره ائنيب، پنجره‌نين اؤنونده دايانميش‌دي. ايکي گنج، ايکي حيات يوْلداشلاري خيسين- خيسين سسلريني کوله‌يين اوْولتوسونا قوشاراق سيتقينا- سيتقينا اوْخويوردولار:

«نه قارانليق دي بو زندان، نه سويوق

نه اوچون آي بو قده‌ر رنگي سولوق»!

کوله‌يين نفسي ايله يارانيب، اوْيانان ارواح، ظولمت‌دن سالينميش گئجه يوْللاري ايله گؤيلره اوچوردولار. محيط ده حياتين واريني ثبوت ائده‌ن خيردا بوْي آغاجلار شيققينا- شيققينا سيزلاييرديلار...