کولت آذ اوستاد آیریلمازین «گئجه یاری» آدلی شعرینی تقدیم ائدیر:

یارب اؤلورم داده یئتیر سئوگیلی یاری،
اوممیدیوخوم گؤرمه گه ایستکلی نیگاری،

وئرمیشدی ازل گون منه یاروعده‌ی وصلت،
قویدو آیاق آلتیندا وفاسیز او قراری،

گوددوم گئجه گوندوز یولونو کیپریگ آغاردی،
یار گلمدی اولدوم یئنه غم غصه دچاری،

آلداتی منی نازیله یاندیم کوله دؤندوم،
آغلاتدی سیزیلداتی بو سئودا دیلی زاری،

دوشدوم چؤله مجنون سایاغی یار آدی دیلده،
گؤردوکجه منی ناله ائدیب کؤینگی ساری،

عشقین یئرین آلماقدادی یارب آجی نیفرت،
قویما دولانا ترسه‌سینه چرخ مداری،

پیس گونده آتیب خوش گونومون آشناسی گئتدی،
قاندیم کی وفاسیزگؤزه لین یوخدو چیخاری،

آگاهسان آللاه منیم اسرار دیلیمدن،
ای خالق ائلیین قارلی قیشی گولو باهاری،

سندن سونرا یوخ دادرسیم رحم ائله یارب،
قویما اولا گؤزیاشیمی روخساریمه جاری،

زیندانه سالان یوسفی آزادائلین سن،
یعقوبده قیسمت ائلدین صبروقراری،

حللاج انالحق دئدی یارب سنه خاطیر،
قیسمت ائلدین حللاجا آخیر سر داری،

یاریم دوروب اغیاریمیلن اوزاوزه باخدی،
منده اوزومو دوتموشام آللاه سنه ساری،

ترک ائتدی منی گئتدی رقیبیله دولاندی،
باخدی منه گولدی ائله دی عمرومو یاری،

جان رشته‌سینی اوزده قارا خالینه وئردیم،
لیلاج کیمین منده اودوزدوم بوقوماری،

جان ایسته‌دی مندن او وفاسیز دئمدیم یوخ،
اخلاصیله قویدوم آرایا داری نداری،

بیگانیه خاطیر منی سیندیردی او نامرد،
اوممید یوخوم بیرده باشیم قالخا یوخاری،

رسوالیغا چکدی منی صنعان کیمی گئتدی،
ترک ائیلدیم آغلار گوزونن اول گول عوزاری،

بختیم منه یار اولمادی یار چیخدی الیمدن،
ساز ائیله دی بیگانیله سازیله تاری،

یار یوخ اومودوم یوخدواؤزومننده اوزولدوم،
تک سنسن اومودوم منه سن رحم ائله باری،

یوخ گولدورنیم،نئیله ملی آغلادانیم چوخ،
ای گلشن ائدن عشقیله ابراهیمه ناری،

یوخدور گلنیم همدم اولا غملی گونومده،
ساقی ده ائدیبدیر منی پیمانه خوماری،

آل جانیمی اؤلدور منی پیس گونلره سالما،
درگاهیوا اوز قویموشام آللاه گئجه یاری،

یارب سنی وئرم قسم عاشیقلره خاطیر،
آیریلمازا قیسمت ائله سن اودلو دیاری،