بیر زامانلار بیر یول‌چو داغلارین اتکلرین‌ده، قالین بیر قار طبقه سیله اؤرتولو، آز ایستیفاده اولونان بیر جیغیرلا تکباشینا یورویوردو. قار داها دا برک یاغیر، یول گئده‌رک داها تهلوکه‌لی اولماغا باشلاییردی.

نهایت، یولچو سویوغا دؤزه بیلمه‌یه‌جک حالا گلدی و یئره ییخیلدی. اما بختی وارمیش، عینی یول‌دان ایکینجی بیر یول‌چو کئچیردی و او بیرینین دورومونو گؤرونجه چوخ اوزولدو. اونو یئردن قالدیردی و اؤزونه گتیره‌جک بعضی شئیلر وئردی.

داها سونرا ایلک یول‌چو یئنی گلنین الینی اللرینین آراسینا آلدی و اونا اولان بورجونو حیات‌دا اولدوغو مدت‌ده اونوتمایاجاغینا دایر آند ایچدی.

ایکینجی یولچو خفیفجه گولومسدی و هئچ نه سؤیله‌مه‌دی.

ایلک یولچو سونرالار ائوینه چاتدیقدا، باش وئره‌نلری هامییا نقل ائدجیینی سؤیله‌دی. بو اینسانی داورانیشی هر طرفده دانیشاجاق، گله‌جه‌یه قالماسی اوچون یازییا آلاجاق و شعیرله وصف ائد‌جکدی.

او بیری بیر داها گولومسه‌دی و هئچ نه سؤیله‌مه‌دی.

بیرلیکده یوللارینا سرعتله داوام ائتدیلر، اما جیغیر گئتدیکجه داها تهلوکه‌لی بیر حالا گل‌دی، قار طبقه‌سی قالینلاشماغا باشلادی و یولچولاردان بیری سنده‌له‌دی. قیشقیراراق یانینداکینین علین‌دن توتوب اؤزونه طرف دارت‌دی و ایکیسی ده دیبسیز بیر اوچوروما یووارلانیب گؤزدن ایتدیلر.

اون مین ایل ده کئچسه ده، هئچ کیمین اونلارین عاقیبتیندن خبری اولمایاجاق - او جمله‌دن، ایکینجی یولچونون بؤیوک یاخشیلیغیندان.