Kult.az گونئی آذربایجان‌لی شاعر داود عبدینین تبریزین تاریخی بازارین‌دا چیخمیش یانغین زامانی هرنه‌لرین یانقیندا الدن وئرن "ایکی قاپیلی" سارایی‌نین آل‌ـ‌وئرچی‌لرینه حصر ائتدیی "اۆزولمه قارداش" آدلی شعرینی تقدیم ائدیر:

ساری قیرمیز-آل دۏنلو آلاولار یاللی گئدیر گؤزومون اؤنونده
سانکی تویا چاغریلیب‌لار "ایکی‌قاپیلی" تینینده
اود، اودا چکیر وار‌ـ‌یوخومو
و سیلیر دالاندان گۆل‌‌ـ‌چیچک عطرینی، سئوینج‌له یاشام آدلی قوخونو
سانکی دۆشمان کؤکسومه ساپلامیش اوخونو
اود بۆرویور بازارین هر یئرینی
و ییخیر اومودلا قورولان بیر گنج گلین‌له اوغلانین ائوینی
کیمیسی صاباحیندان نییاران
کیمیسی دیزینه دؤیوب، سؤندوروجولره یالواران
اودلار یوردو، اودلارا قوربان گئتمه‌سین
و قارانقوشلار دومانلی شهردن کؤچمه‌سین
باشینی دیک توت، آتام ‌ـ قارداشیم
اۆزولوروک دردینله دیلداشیم
آنجاق اونوتما؛ بوراسی تبریزدیر
قوجا شرقین بئشیگی
چکیلیب بوردا ائلین قایغیسی ـ کئشیگی
کیشی‌لیک‌ـ‌اینسانلیق هله اؤلمه‌ییب بو شهرده
همن اودلار کۆلوندن قارانفیل‌لر گۆل آچاجاق یاخین سحرده....