Kult.az سعید مغانلینین "سنسیز یالنیز قالیب تبریز"آدلی شعیرینی تقدیم ائدیر:
بیزه گلنده
اؤزون گل
اؤزونو گتیرمه
ایچیندهکی قیزی شهوت کوچهلرینده آزیت
داغ گؤیرچینلرینین ایزلری ایله گل
ظولم اودورکی، سن مشرف اولان یوخومدان هؤولهسک اویادالار منی.
گلنده دیکدابان باشماغینی گئیمه
چاریق جورابلا گل
سنسیزگل
کوچه باشینداکی الی باتوملو پولیسلره باخما
خیابان لوتولارینا شوخلوق ائلهمه
قارا بیرگؤزلوک تاخارسان
گؤزلرینی گؤرمهسین هئچکیم
سنین گؤزلریندن یوزور مأمورلار، منیم یئرآلتی یوخولاریمی
تکجه گؤزلرینی منه ساخلا
بیزه گلنده،
اؤزونو ده گتیرمه
ساچلارینلا، گؤزلرین منی گؤرر
آیلا، گونشی قاپی دالیندا قوی
قوجا پوستچو هارا یوللاییر، یوللاسین
من سنی، ایکی فینجان چای ایچیمی قدر گؤرمهلییم
گلنده ایچیندهکی قیزی گتیرمه
ائله اؤزون گل
سنی بو شعرین سون اوجوندا گیزلهدهجهیم
دسته آچارینی تووالئتین دلیینه توللا
سنین گؤزلرینه هر یئر آچیق اولمالی
قاپیمیزدا گؤیو آیاقلارینین آلتینا سرمیشم
و پنجرهدالیندان گؤی قورشاغینی میسمارلامیشام
گلنده قونشو قیزلاریلا سالاملاشما
منیمله، سئویشمهیینی دویارلار دوداقلاریندان
من ایچیمدهکی اوغلانین خوتونو آلدیم
سنده قیزلیغینی ساری پیشییه آت
۴۲ مئتیرلیک بو کیبریتلیک آپارتماندا
گؤز-گؤزه، دوداق-دوداغا
سنین ساچلارین اولسون منیم اللریم
بیر ده باشماقلارینی گتیر نه اولور
سنین اوستو آچیق صندللرینی جوتلهمهیه غریبسهمیشم.
تورکجه بیر قزئتده آلارسان
قزئت اورتادا اولاندا، یعنی مدنیت چاغیدیر
دوداقلارینیدا سیلمهیه کارا گلر
باشماقلارینیدا...
سونرا شعر گمیریتدهیهجهیم
شعارلارینی قوساجاغام
وسونوجو سن دوغولاجاقسان دوداقلاریمدان
و کامپیوتریمده یاشایاجاقسان بیرعؤمور.
نه اولار، احمد کایانین ماوی اوتوبوسونو دا گتیر
آرازین آتلارینیدا
من ده سنه رشیدبهبوداوون بوتون بوغازینی پای وئرهرم
رشید دوستومون بوتون باروتونو.
نارینجی تاکسیلارا قاپیمی گؤستر
و قنوو قیراغیندا کی آلا گؤز پیشییه بیر قارینج اَییل
تکجه ساری قزئتلره حبیبساهیرین انتیحار ائتدییینی بیلدیرمه
دئمه بیریا آجیندان اؤلدو
وگوهرمرادین، پاریس خیابانلاریندا کی دونموش جسدینی طاهیره خالایا ایضاحلاما
دئنن دوکتور ساعدی سالام یوللادی
کوچهده نیظامی کامیونون دیش قیجیرتماسیندان هورکمه
او اوینایاجاغیمیز شاهمات چؤللویونون عسگرلرینی گتیریبدیر
یول آغزیندا آتیلمیش، بیرتئلفون بوتکاسیندان دوستلارا زنگ آچ
و یاخین کافینئتدن اَر توغرول اَتساین یاهو دات کاما مئیلآت
پیس دئییلم
سلولدا جانلارینا دوعالار ائدیرم
تکجه مسواکیمی وئرمهدیلر
و بَتَرحامامسیزلامیشام
باشیم گیدیشیرو قولتوقلاریمین ایسی باش چارتدادیر
بیر ده سودویوم قان قیرمیزی دیر
بیرشئی دئییل بؤیرومده بئش اون تپیک گؤیرتیسیوار
گلنده اؤز ال یازمانلا بیر تیکه شعر گتیرمنه
بیرده ایلک تانیشلیق هدیهنی، هذا کیتابی دده قورقود قویسالار، منه سود، خورما، تمیزسو، قزئت، شامپو، وبیرکیچیک حولو یوللایارسان
بیرده نادیرایلاهینین شعرساچلاریندان بیرتئل.
اؤزون دئمیشدینکی کیشی زینداندا کیشیلهنر
منده آجلیغا فیکیرلهشیرم
کیشیلیکده چتین ایمیش سولماز
یادیندادیر اوگونلری، ۲۱ آذر گونلرینی دئییرم
دوستاق قاباغینا بیر سن گلمیشدین بیر ده آتان
و آتان کارخانا سندینی گیروو قویدو، سنین یولوندا
اوقدهر گولوشدوک سنین گؤزلریندن بیر ساعاتلیق یاش گلدی
آغ قارا فیلیملره بنزهییردیک او گون
آتان ایلک اؤنجه بیر شوکولات وئردی، و دئدی: جوجه پان تورکیست
بو ایتهامی اونلار دا دئدیلر
سن اشاره ائتدینکی، قوجا کمونیست سؤزونو آرایا چک
ومن تکجه بیر ماوالا فیکیرلهشیردیم و بؤیرومون آغریسینا
ایکی دوست قاپی آغزیندا الیمی سیخدی
بیرآنا آغلاییردی
و بیر قوجامان کیشی چلیینی یئره دؤیوردوکی هامینی بوردان چیخارمایینجا گئدن دئییلم
اللرده ائو سندلری یئللهنیردی
بیردوست ماشین دالیندان گؤز ووردو
بیری بیزی گؤرجک باشینی یئره دیکیب سووشدو
و بیر کیشی بودلارینی لئهستان صندلی اوسته یایاراق
-«آغاداداش نهتئز آزار دیدی به» دئدی
دیشلرینی قیجیردا-قیجیردا باشآیاق بیزی سوزدو.
صادق هدایتین خئنزئر-پئنزئری یایما دوشدو
وتبریز آتان سنی سوزدو
سن منی
و من بوتون جاماعاتا سئوگیایله نفرت آراسیندا باخیردیم
تکجه تاکسی شوفئری «فقط بخاطرتو» ترانهسینی بیزه فخرله تقدیم ائدنده، من باشیمی آشاغا سالدیم
و سنین آتان دوغرودان قاریشدیردی.
من آلما ایله نار یاراسینا دوز سپمهیه جومموشدوم
دیلنچیسیز شهرده هروئیین یولچولارینین نئینیم-نئینیم جومالارینا
دیلسیز خالقین مدرن فاجعهسینه دوووروردوم
بیز همنآپارتمانین، بؤیوک بیرسایزینا چاتدیق
۴۲۰ مئتیرلیک بئکار گؤزهللیک
البتهکی بیر جوت ماوی گؤز، بوتون آسمانی غصب ائتمهیه کفایت ائدر
و بیزیم دنیزلر قیزی، چایلار ایلاههسی، ساوالاندان گلن سیجاق و سرین سولارین آللاهی، آناهیتا گیلین ائولرینه چاتیر، تبریزین بوتون دولانباج کوچهلری
هَمَن کوچه باشینداکی ائینالینین قیرمیزی داشلارینا، یاندی-قیندی وئریر تیکینتیلر دؤشونده ال قوزایان تورکیه یو.پی.وی.سیلری
گؤی گؤیلویونه چالیر آلا گؤزلرین
بوجاقداکی تلویزیوندا شبنم قیسابارماق شعر اوخویور
و پنجره دالینداکی رادیو، یالانچی سیاستچیلرین، آمازون اوتورومونو آچیقلاییر، و آزادلیق یاخیندادیر، دئیه باغیریر
هرنه آنورمالدیر
تکجه سولماز و شبنم قیسابارماغین باخیشمالاری داوام ائدیر
چؤپو چؤپ اوستوندن گؤتورولمهمیشدی دونیانین
تام طبیعیدیر حیات
بوتون کاناپهلر بوش
وایندی زَکیمورئن سیزیلداییر
پردهلر آراسیندان یئل اؤزونو قوجاغیمیزا تپیر.
-بویور نازلیم-« بویور ایلهش اورهییمده بیر آلماسوی
قوی استیبداد اوتاغیمیزا چؤکسون»
و بیز سئویشمه تحصنینی داوام وئرک
بو پنجشنبه آخشامیندا، ناز بالینجلاری سئویشمه قوخوسو بورویوبدور
کاش جومه گونلری دالبادال تیکرار اولسون
و پیچاقلار تکجه قارپیز دیلیملَمهیه بیلوولنسین
بویور نازلیم
قوی دول دنیزلرین گؤزو آغارسین
سن بو آپارتماندا یاشامایاجاغینا اینان
سن بوتون سوبای اوغلانلارین شاه آچاریسان
سن دالغالارین قالابالیغیندا سویون
سویون
سن اؤلدون
هئچ بیر اؤلونو یاشیل تابایله، قیرمیزی ساچ کئشی ایله باسدیرمایاجاقلار
ایلک اؤنجه بیلَرزیکلرینی چیبیدمالی
بو آیین بئلهلییینه باخمایین
بوتون گؤردویونو راپور وئریر
بوتون زیندانلاردا بیردوست جاسوسدور
سیزآللاه گونشی سویوندورمایین
گونش بویلودور
گؤرمورسوز دیکدابان باشماغینی دَییشمیش
اونون یئرینه ایکی اوزلوآیلاری دوغرایین
و دوغرانتیسیندان اولدوز-مولدوز قاییرین
بویور نازلیم
باخ گلن-گئدن سسیدیر
و بیر کیشی بؤرکو، تپهسیندن دوشور
مرضیه لئچهیینی باشیندان آچیر
و اوختای کؤینک دویمهلرینی بیر-بیر واراقلاییر
مرضیهنین یاناقلاری قیزاریر
اوختایین اللری تیترهییر
مرضیه خیاباندا گولـلهنیر
اوختای باغیرساقلارینی توپورور.
بئلهدیر حیات
بئلهدیر ساری چیچهییم
و سن یوخلایان یئرده داش-داشا سؤیکنمیش
بو گوناورتا ایستیسینده، اوغولوار اوخدا دئمیر
من صمده چاتیرام
داشلاری اوخویا- اوخویا فریدونا چاتیرام، ۱۲۹۸- ۱۳۲۶
و دوشیزه ناکام۱۳۶۰- ۱۳۷۹...
سن بورداسان می؟
قیزا بهسن فریدونون یانیندا نهگزیرسن
اودادستان اولماسایدی سنه اینانمازدیم
و صمد عمی جانین
و امامیه امام زاداسی
من ائله یئتمیشلردهده گلمیشدیم دئموکرات دادستانینا بشرحاقلاریندان گیلئیلنمهیه
ماهنی قوشماغا دئییل
من آللاها اینانیردیم
من تکجه قوربان گونو اوروج توتموردوم
سن مارکسدان دانیشاندا ایچیم-ایچیمی یئییردی
من سارترین کیتابینادا ال ووراندا، یئددی غوسول سویونا فیکیرلهشیردیم
سن منه بیر آسمان پای وئردین، بیردیشلنمیش قیزیل آلما، و بیر آناتا شوکولاتی،
و من ایندیده بیلمیرم
اوگوندن نییه اینامیم شالموز پارچا کیمی سویا گئدیر...
داها بوتون کیشیلره سؤیلهیهجهیم، سنین یئرینی
سن منی اینجیدیرسن
گونش سونسوز بیچینچینی اینجیدن کیمی
سن بو اوتاقدا کیملرله یاتیبسان قیزا
ساغیندا حاجی قدیرآغا
سولوندا چاخیرچی ایبیش
آیاق آلتیندا، نه یاخشی کی مشروطهچی پاشا وار
باش یاندا، فدایی سارخان
بلکه ستارخاناوغلو بابکده سنینله گؤزلشیر، اهمال-اهمال
بیلیرسن، امامیه دئدییین دروازاسیز قبریستان کیمی بیر سارایدیر
دیلنچیسی شور گؤز
وزیری شور گؤز
تکجه، بئش-اون دئموکرات فداییسینه اورهییم توختاقدیر
دای بوتون قیزلارا دا سؤیلهیهجم سنین یئرینی
بوتون قزئتلرده یازدیراجاغام آدینی
من، منی دینسیزلییه یؤنهلدهنی بیآبیر ائدهجم
کاش قاپاق لاری آذانلا باشلانان اورهییمین آچارینی سنه وئرمیردیم
کی سن گؤیلون سیخیلاندا منیم اینام دیرکلریمی تپیکلهمهیه گلمهیهیدین
من بوتون گؤروشلریمیزه قمهسیز گلمیشدیم
من تهرانین شوش مئیدانیندان آلدیغیم چوماقلاری
میانانین قیزکؤرپوسوندن چایا توللادیم
من میندییم قاتار بیلیتیمیده کرج چؤللویونده رئللره تابشیردیم
من سنین گؤروشونه"تورکون قیزیل کیتابیلا"گلدیم.
سحرین یاشیل ماهنیلاریلا
من سسیمده گارمون سیزیلتیسی
ساعات قاباغیندان سنه زنگ آچدیم
تبریزین آلاتورانلیغیندا
من سسیمی مدرن بیر پیانو آهنگینه بنزهدیردیم
من چوخدان دئمیشدیم "تهران خداحافظ"
اونو دا سن دئمیشدین کی سید بابامیز ایگیرمی بئشلرده دئدی،
"نادیره"لی سید
من دیلیم توتار-توتماز دئدیم سالام تبریز
و آتان تئلفون آرخاسیندان یوخولو میزیلدادی-علیکالسلام عاغیلسیز!
او گوندن قورخموشام تبریزین عظمتیندن
نه اولارکی، آتان تبریزین شوکولات آللاهیدیر
من بوتون آللاهلاری آرخادا قویموشدوم
من"ضَربَ زیدٌ عمراً" مانیفستیندن ویدالاشمیشدیم
نه اولارکی آتان وطن مارکسیتلرینین پیغمبریدیر
من بوتون ایسملرله تپیک دؤیوش اوینامیشدیم
من هئچ بیر ایستین قاباغیندا دایانمامیشدیم
من، تزهجه سن وئردیین ددهقورقود کیتابینداکی دَلی دومرولون سئوگی دری سینه گیرمیشدیم
من تبریز خیابانلاریندا یالقوزاق قالدیم
تکجه اَیری-اَیری باخانلارا، -لعنت اولسون اوساری قولوخانا، دئیه میزیلدانیردیم.
البتهکی قورخوردوم
بورا گولوستان باغیدیر نه اولارکی بوردا فریدونو دارا چکمیشلر
بو کؤهنه ترمینالین ازدحامیدا اورک وئریجیدیر
تکجه بیرشئیدن یانیب تؤکولورم
ماوال آتلی اولدو من پییادا
من یئرآلما، یومورتا و بیر بارداق ایستی سوده قوناق اولموشدوم تبریزین قاینالتیسیندا
ومن هله قاینانامی گؤرمهمیشدیم
تبریزین بئچهسی زنگ چالیردی
و من ساعات قاباغیندا، ساعات سککیزین زنگی چالیناندا سنه زنگ آچدیم یئنیدن
الو مرحبا سولماز منم سعیدمقانلو
و من اونوتموشدوم سسیمی گارمونا بنزهدَم
و سیزین ائوینیزی تبریز رادیوسو باشینا گؤتورموشدو
آنا لایلاسی تک، تانیش اینیلتی
سالام آ یاییلاقلار، سالام آ داغلار
سحروز خئیر عزیز هموطنلر اوخویور آشیق عبدالعلی
من عبدالعلینی نه تانییردیم
و موغان لهجه سینده دئدیم-قیزا صابباحین خئیر
سنین سسینده روبابه موراداووانین اینیلتیسی دویولوردو
موغانا ایزی دَیمهین اورکک جئیرانلارین قاچیش سسی ایدی بلکه
«نه یاراشیرسان موغانا جئیران»
قارسیز قیشلاقلارین قوزو ملیرتیسی
سالامسیز، کالامسیز نه چتین سووال وئردین-«منی چوخ سئویرسن، تورکجه میزی»
من هؤولهسک استغرالله ربی....
من سنه نسیمیدن بویاناکی شعرلری اوخوماغا کرهزده نیردیم
سنه کی ساهیردن بری کی بوتون شعرلری آینالی یا آغلایبسان
سنه کی شهریارین «جانم بقربانتیین» نزول شأنی سن
سنه کی گیلاس یارپاغینین یئرینه
تبریز گؤیونو لای لای کیتابلارینین آراسیندا ساخلاییرسان
سنه کی بوتون شعر اوتوبوس لارینین سون دوراغیسان
بیلیرسن کی سن سیز قاری کؤرپوسو اوچغون دور
سن سیز شاهناز دا چیرکیندیر
بوقونقاباشی نه قدهر سنله گؤزل اولا بیلر
من تهران دروازاسینی سنینله دؤزه بیللم
سن عئینالی کیمی قیزیل بایراق، شاه گؤلوکیمی یاشیل، و گؤزلرین کیمی ماس ماوی
گؤزلرین، گؤزلرین گؤزلرین آلاگؤزلرین
آزقالیر جانیمی آلا گؤزلرین
گؤزلرین، گؤزلرین، تئروریست دیلر، سولماز خانیم
من ابراهیم تاتلی سسی، سنین گؤزلریندن سونرا سئودیم
باریش-ی دا مانچووا گؤره
یوخسا بوغازدا غنانین حؤکمو بللیدیر
او دا ماوی ماوی ماس ماوی، گؤزلری مونجوق ماویسینه گؤره.
تاریخ منده بئله باشلانیر، گؤزلریندن اؤنجه، و گؤزلریندن سونرا
و من گؤزلریندن مین ایل سونراکی دمیرتوفنگ چاغیندان باشلانمیشام
اودورکی یوخولارینا اوغورولوغا گلنده توفنگ چیینیمدن دوشمور
گؤزلریندن اؤنجه، آغاج کوتانلارینی اؤکوزلره باغلاییردیلار، و تورپاغین باکیرلییی دمیرکیمی بیر شئیه حسرت قالیردی
اینسان بیر-بیریله شانالاشیردی
یئر شوخوم پرچیمسیز قالیردی، اونداکی لاستیکلری حیس ائتمهمیشدی تپه دؤشلری
بوغدادان فتیر دویولوردو، قمهدن شهوت،
کی سن شرف وئردین بیزیم داغلارا
و داغدان یاراندی بابک قالاسی و آت گؤلونون گؤزتچیسی ساوالان،
گؤزلریندن سونرا بوغدادان آنا بیسکوئیتی، حوا ماجراسی، اؤپوش توللاییشی و قمهلردن آلما ایله عشق یاراندی
سن اولدون کی قانادی سینمیش اوچاقلار اوچا بیلدیلر،
ماوی موشک لر آی کورهسینه بالابان سسینی، قاسیماوون فرغانهسینی یاللی گئتدیلر.
سن اولماسان کیم ارک قالاسینا اؤپوش توللایاجاقدی
سن اولماسایدین هئچ بیر آشیق آلماسی پیچاق یانیندا قزئت اوخومازدی،
سن اولماسایدین نئجه آغلادی توفنگ اللرینده دؤیوش کیشیلری
سن آغلاماغا ماهنا ایدین.
سنسیز مَلهفهلر قوجاغلاشما قوخوسو وئره بیلمزدی
و من قارا گئیینمیش عاشقانهلریمی کیمه یازاجاقدیم.
سن فرمان وئردین من ده شاعیراولدوم،
کاش بویوروردون سیاستچی اولوردوم
یا دا خیابان باشیندا دایانان افیون اوغلانلاریندان بیری
ایندی یالان دانیشماغا یئر یوخ دور
یادیندادی ارک قاباغیندا ساری بیرکیشیدن انقیلاب یولونون موباریزلری کیتابینی آلاندا، سن چاتدین
دئدین کی-یولا دوشوبسن حاجیم!
و من سئوینیردیم یولا دوشمهییمدن،
نه دادلی ایمیش بوکوفر.
سهندین سازیمینسؤزو، سحرین ماویلرینی ساهیرین سحر ایشیقلانیر کیتابلارینی و پیشهورینین دانیشیقلارینی سن آلدین منه.
من ده باها اولدوغوندان، گؤزومو تیکدیم یئرده کی سینیق موزاییکلره
و شاهنازا کیمی هامیسینی سایدیم
۸۶۷ دنه سینیق موزاییک.
و بناب کبابینا البته کی سن قوناق ائلهدین.
گؤن کارخاناسینی سووشاندان سونرا، کلیسا قاباغیندا کی بیلمم کیمسهجییه سؤیوش توپوروردون.
من کی گئدیردیم عاشیق اولدوغوم یئرین گؤروشونه و تام خلسه ایچینده ایدیم.
تکجه بنؤووش کنارهلی یایلیغینین آلتیندان سوزولن ساری ساچلارین منه گؤستریردی دوزلوک یولونو-هذا صراط المستقیم
کیچیک بیر قاپیدان ایچهری گیردیک،
ایتالیا معمارلیغیندا تیکیلمیش بالاجا بیر بینا،
اوزون دیرکلر، اَیمه تاغلار، گؤیو گؤزهل، یئری چلیم سیز بیرمقبره، کی هئچ یئره یاراشمیر.
من فاتحه وئردیم سن اوخشاما سؤیلهدیین.
اونونلا قیراق-قیراغا صمدین قبری،
سن دئدین بو امامیه بیر دونیادیر.
و صمد باشینی آشاغی سالمیشدی.
من فاتحه وئردیم، سن آیاوشاقلارالاله ماهنیسینی اوخودون،
سونرا بابک قراجهداغی ستارخانین اوغلو، محمد بیریا مدنیت ناظیری، فیرقه دادستانی فریدون ابراهیمی۱۲۹۸ آستارا، ۱۳۲۶ گولوستان باغی تبریز،
من فاتحه اوخودوم سن مارش ایرهلینی،
من آذربایجاندانیشیرین تیکهسینی اوخودوم، سن فدایی مارشینی.
وفریدون بیزه گولوردو،
سن دئدین،- بلکه ایندی بیزی تبریک ائدیر.
منه ائله گلدی بوتون مزارلار بیر شئی سؤیلهمهیه قالخیرلار،
اؤلولر فیلمی گؤزومون قاباغیندان کئچدی،
و کئفلی اسکندر سایاغی چیغیردیم،-دورون ائهی... اؤلولر، آیاغا قالخین.
هامی قالخدی سندن سونرا.
تکجه سن ایدین اؤنومده اوزانمیشدین،
دینمز، دانیشماز، بیر جوت ماوی گؤز، ایکی ساچاق قیزیلی ساچ و بیر جوت یاشیل یای باشماغی.
سنین باشماقلارینی جوتدهدیم والیمده کی قزئتله سیلدیم.
فریدون، بیریا و صمدعمی اوچ آغیز، اوچ اورهک، اوچ آند ایچمیش فیشنگ
خور قروپو کیمی بوتون قبریستانلا اوخویوردولار: ساچین اوجون هؤرمزلر، ساری گلین، ساری گلین
سنی منه وئرمزلر، ساری گلین، ساری گلین.
دئمیشدیم، یاتدیغین یئری بوتون سئوگیلیلره سؤیلهجهیم،
فریدون ابراهیمینین مزاریندان اون مئتیر قوزئیه، سونرا بئش آددیم باتییا،
اوچ دؤورهسی دمیرلنمیش مزارین اورتالیغیندا سنسن: دوشیزه ناکام ... سولماز تبریزلی، دوغوم:۱۳۶۰ تبریز، اؤلوم۱۳۷۹ خزر دنیزی قیزا دورسانام بیریا بابا فاتحه اوخویور،
فریدون اوردوموز-اوردوموز مارشینی، صمد عمی آی اوشاقلار الاله ماهنیسینی، من ایسه یالقیز آغاجا بنزهییرم کی کولک اورتادان سیندیرمیشدی.
صندللرینی جوتلهیهرک، مزارین اوسته بیر دیشلنمیش آلما بیر شوکولات و ایکی جوت ماوی گؤز کی، گؤیله سئویشمهیه کیفایت ائدیر.
-سیزینله تانیش ائدیرم آداخلی خاتین، خزرین قانسیز شهیدی سولماز تبریزلی، بو مزارین گؤزلرینی اونوتمایین شاعیر دوستلار، ساری ساچلارینی آیاقلامایین لوطفن و باشماقلارینین آلتینا بیر قزئت سرین.
گؤزلرین آلا گؤز ماهنی
گؤزلرین اؤلوم ائنسوکلو پئدیاسیدیر
و قادینلیغین تاریخین ایکینجی یاریسی
اوشویورم منی باغرینا باس
لعنت اولسون او ماوی گؤزلرینه
سن اؤلومله یاشامین دؤنوش نؤقطهسیسن
قوجاغین امنیتدیر،
گؤزون تروریست!
