کولت. آذ شهریارین خاطره‌لرین‌دن بیرینی تقدیم ائدیر:

گونش باتمیش، آخشامین سس‌سیزلیگی یاواش-یاواش تبریز شهرینین اوستونه چؤکمه‌یه باشلامیشدی. رسمی ایداره‌لرین باغلانماسییلا کوچه‌لرده ائولرینه گئدن مأمورلارین، هابئله آلیش-وئریش‌دن دؤنه‌نلرین آیاق سسلری ائشیدیلیردی.

شهریار «بانک کیشاوارزی»ده (کند تصرواتی بانکین‌دا) یوروجو بیر گون کئچیرمیش، تئزلیکله ائوه چاتیب آناسینین گؤزل یئمکلرله بزدیی سوفره آرخاسین‌دا اوتورماغی دوشونوردو.

ائولرینین یئرلشدیی کوچه‌یه دؤندویو زامان دونه‌ن گئجه یاریمچیق قالان شعری یادینا دوشدو… او آندا هم یورغون‌لوغونو اونوتدو، هم ده آناسینین حاضیرلادیغی لذت‌لی یئمکلری…
دایاندی و یاریمچیق قالمیش شعرینی جیبین‌دن چیخارتدی. کوریینی دیوارا سؤیکه‌ییب همین شعری تاماملاماغا باشلادی. آخشام دوشوب تبریزی قاران‌لیق بورودویو آنلاردا او دا شعرینین سون میصراعسینی یازدی.

سئوینجله ائوین قاپی‌سین‌دان ایچری گیردی. بو سئوینج هیس‌سی یاش‌لی آناسینین بیشیردیی دادلی یئمکلری دادماق ایستیین‌دن دوغموردو؛ شعرینی بیتیرمیش‌دی، – جوشقوسو بون‌دان ایر‌لی گلیردی. سوفره‌یه اوتورمازدان اول جیبین‌دن چیخارتدیغی سون شعرینی آناسینا اوخوماغا باشلادی. شعرینی اوخویوب قورتاردیق‌دان سونرا آناسینین اوزونه باخدی، اونون سیماسین‌دا هر زامان اولدوغو کیمی، تبسسوم یوخ ایدی.

حالبوکی آناسینا هر شعرینی اوخودوق‌دا اونون سئوینجینی هیسس ائدردی. دایانا بیلمه‌ییب سوروشدو: – آنا، یوخسا خسته‌له‌ن‌می‌سه‌ن؟
آناسی فارسجا خسته اولمادیغینی سؤیله‌دی. بو جوابی ائشیدن شهریار تمامیله چاشیب قالدی. آناسی ائوده فارس دیلین‌ده دانیشیردی. آغلی کسندن بری ائوده هر کس تورکجه دانیشیردی. هله رحمت‌لیک آتاسی بونا چوخ دقت ائدردی.

شهریار حیرت دولو باخیشلارلا آناسین‌دان سوروش‌دو: – آنا، نیه فارسجا دانیشدین؟ یاش‌لی قادین اوغلونون اوزونه باخمادان اوریین‌ده‌کی قوس‌سه‌سینی دیله گتیردی: – سن تورکجه شعر یازیرسان کی، من ده سنه تورکجه جاواب وئریم؟ ائویمیزده حبس ائتدین تورکجه‌نی. اوت کؤکو اوسته بیتر. تورکجه ایله بؤیودون، فارسجا یازیرسان. بون‌دان سونرا شعرلرینی دینله‌مه‌یه‌جه‌یه‌م!

شهریارین رنگی قاچ‌دی، الین‌ده‌کی فارسجا یازدیغی سون شعرینین بارماقلاری آراسین‌دان یئره دوشدویونو بئله حس ائتمه‌دی. یاواش-یاواش یان طرف‌ده‌کی اوتاغا کئچدی. فیکری قارماقاریشیق اولموش‌دو.

اوزونه بیر آنا سیلله‌سی دیمیشدی. یئمیی اونوتدو. خیاله‌ن کئچمیش گونلره قاییت‌دی. آتاسینین الین‌دن توتوب حیدر بابا داغی اتکلرین‌ده‌کی کندلری دولاشدیغینی خاطیرلادی.

خوشگینابی، گول‌لوجه‌نی، قاییشقورساغی، وانگؤزللری گزینتیلری یادینا دوش‌دو. دینلدیی تورکجه‌نین شیرین لهجه‌سی ، ماشاللاه، زهنینین گیزلی قاتلارین‌دان بیر-بیر چیخیب بئینینه حاکم اولوردو…

ایلشدیی دیوانا اوزان‌دی. اؤز-اؤزونه اینلییرجه‌سینه دانیش‌دی: – تورکجه یازاجاغام… بون‌دان سونرا تورکجه یازاجاغام!..
و …«حیدر بابایا سلام» آدلی اثر تورک دونیاسین‌دا قیسا مدت‌ده گئنیش شؤهرت تاپ‌دی، سؤزون یاخشی معناسین‌دا دیللره دوش‌دو ، روبابه خانیمین یانیق‌لی، نیسکیل‌لی سسله اوخودوغو ماهنی اورکلری تیترت‌دی.

شعر صنعتین‌ده فارسجادان اوستالیقلا ایستیفاده ائد‌ن محمدحسین شهریار آناسینین خبردارلیغین‌دان سونرا تورکجه شعرلر یازماغا باشلادی.