کولت. آذ گونئی آذربایجانی شاعر یاقوب نیکزادین شعرینی تقدیم ائدیر:

منه سیرادیغین ساختا سئوگینی
ساریدیغین کال دویغونو...
گل!
آل!
آپار !
اوره ییم یاماق گؤتورمور.
سنه تای
چوخلاری قیزیلجا دَیمیش
اوستومه شوتویور بیر پارا آدلا
یالین اللریمدن یاردیم دیله ییر
بوغومتول هارایلا
پورسوموش اوزله.
هله چوخو
آنا امجه یین کسیب
قیندا زهرلنمیش دیلین اوینادیر
اوزوک گیزله دیر
من چتین اویارام بو اویونجاغا
کؤهنه بویاغا

چوخ بویلو، بوخونلو سئودالانمیشین
قیلیغی الیمده
ایزلریمه ایزی قونوب
تنتیمیش اوره یی منه باغلی دی
سؤزومدن آسیلی.
من
چوخلارین چییینیمده آپارمیشام
داش مازارا
تورپاق قوناقلیغینا
سوکوت چؤکموش گئجه لرده
الیمی
هووخورا ـ هووخورا
گوندوزلرین گومراهلانمیش ایستی سی له
قووور گؤزلو اوغلان، قیزی
یار ـ یاراغا مئیلی قونموش گلین لری
نازلی ـ دوزلو یولداشلاری
آغیلین کسمه سین سنه اینانام
سنه
بیر اوووج دا دوعا یئتیشمیر
سن داشین آت پوزغون دانیشیقلارین
دوشمه باشقا خییاللارا
سن
اییردیغینی من توخوموشام.