کولت. آذ گونئی آذربایجان‌لی گنج شاعر چاغلا نوروشین شعیرلرینی تقدیم ائدیر:

سئوگیلیم،

منی آختارماق ایستییرسن‌سه،

خیابانلاردا،

یئتیم اوشاغین اللرین‌ده،

قیرمیزی گولون اوستون‌ده

یاتان توزام.

بیلمیرم یاشامی

من نئجه،

هارا یوزام...

سئوگیلیم،

من ایللردیر کیتابخانالاردا

کیتابلارین

یوخویا کئچمیش سطرلرییه‌م.

گئجه-گوندوز

چالیشان فهله‌لرین

آلنین‌داکی ترییه‌م.

سئوگیلیم،

من،

من چوخ یاخین‌دایام

منی اوزاقلاردا آختارما!..

بیر گلین کؤچور...

خیال ائویم‌دن بیر گلین کؤچور،

گؤزلری بولودتک دولوب‌دور اونون.

وفاسیز دونیادا دوغولان گون‌دن،

غم-کدر قلبین‌ده اولوب‌دور اونون.

خیال ائویم‌دن بیر گلین کؤچور،

الین‌ده سارالیب، سولوب‌دور گولو.

جیس‌می یالان یئره آیاق اوسته‌دیر،

ایچین‌ده‌کی روحو اؤلودور، اؤلو.

خیال ائویم‌دن بیر گلین کؤچور،

آتاسیز، آناسیز، قارداش‌سیز گلین.

یئتیم آرزولودور، یئتیم دویغولو،

ماتم‌لی اویناییر سیرداش‌سیز گلین.

خیال ائویمدن بیر گلین کؤچور،

دؤوره‌سین اؤزگه‌لر آلیب‌دیر، ندن؟

یوخدور بیر کیمسه‌سی، قالا قایدینا،

اؤزو-اؤز قایدینا قالیبدیر، ندن؟

او گلینین آدی بیلمیرم ندیر.

آنجاق اوزانلارین دیلینده‌دیر او.

گئدیر یاد ائوینه، گؤزون‌ده نمله،

ایندی بیر آغ آتین بئلین‌ده‌دیر او.