کولت. آذ گونئی‌لی یازار اومید نجارینین ترجمه ائتدیی صادق هدایتین"اوچ داملا قان... "- حکایه‌سینین داوامینی تقدیم ائدیر:

دونه‌ن باغ‌دا آددیملاییردیم. عباس بو شئیری اوخویوردو. بیر قادین، بیر کیشی، بیر گنج قیز اونو گؤرمه‌یه گلمیش‌دیلر. من اونلاری گؤرموشدوم و تانیییردیم. گنج قیز بیر دسته گول گتیرمیش‌دی. او قیز منه گولومسییردی. هیسس اولونوردو کی، منی سئویر. ائله محض منه گؤره گلمیش‌دی. آبباسین چوپور اوزو هئچ گؤزل دئییل. او قادین هکیمله دانیشارکه‌ن، من گؤردوم؛ عباس گنج قیزی کنارا چکیب اونو اؤپدو.

...ایندییه‌جه‌ن کیم‌سه منی نه گؤرمه‌یه گلیب، نه چیچک گتیریب. بیر ایلدیر. سونونجو دفعه سیاووش منی گؤرمه‌یه گلمیش‌دی. سیاووش منیم ان یاخشی دوستوم‌دو. بیز قونشویدوق. هر گون بیرلیک‌ده دارولفونونا گئدیب قاییداردیق. درسلریمیز حاق‌دا دانیشاردیق و تنففوس زامانین‌دا اونا تار اؤیردردیم. روخساره سیاووشون عمی‌سی قیزیی‌دی و منیم نیشانلیم ایدی، همیشه بیزیم مجلیسلره گلردی. سیاووش روخساره‌نین باجی‌سینی آلماق ایستییردی. ترس‌لیک‌دن بیر آی اؤنجه کبینکسمه‌ده سیاووش خسته‌له‌ن‌دی. من ایکی اوچ دفعه حالینی سوروشماغا گئتدیم، اما دئدیلر کی، اونونلا دانیشماغا هکیم قاداغا قویوب. نه قدر ایسرار ائلدیم، عینی سؤزو دئدیلر.

یاخشی یادیم‌دادی، ایمتاهانا یاخین ایدی، آخشام ائوه قایی‌دان‌دا کیتابلاری‌می مکتب دفتری ایله ماسانین اوستونه آتدیم، پالتارلاری‌می دییشمه‌یه گلدیک‌ده بیر گولله سسی ائشیتدیم. اونون سسی او قدر یاخین ایدی کی، منی قورخویا سال‌دی. بیزیم ائو خندیین آرخاسین‌دادی و ائشیتمیشدیم کی، بیزیم یاخینلیغیمیزدا اوغرو اولوب. سلاحی رف‌دن گؤتوردوم و هئیأته گلدیم، پیلله‌لردن سونرا داما چیخدیم، اما گؤزومه نسه، کیم‌سه دیمه‌دی. قایی‌دان‌دا یوخاری‌دان سیاووشگیلین ائوینه باخدیم، سیاووشو بیر کؤینک و بیر دیزلیکله هئیأتین اورتاسین‌دا گؤردوم. تعجبله "سیاووش سن‌سه‌ن؟" - دئدیم. او منی تانی‌دی: "گل ائوه، ائوده هئچ کیم یوخ‌دو" - دئدی. "گولله سسینی ائشیتدین؟" - دئدیم. باشی ایله ایشاره ائل‌دی کی، گل، من تله‌سه‌رک آشاغی دوشدوم و قاپیلارینی دؤیدوم. اؤزو گل‌دی قاپینی اوزومه آچدی. باشینی آشاغی سالمیش‌دی، یئره باخاراق "سن نیه منی گؤرمه‌یه گلمدین؟"- دئدی. "من ایکی-اوچ دفعه سنی یوخلاماغا گلدیم، اما دئدیلر هکیم ایجازه وئرمیر" - دئدیم. "ائله فیکیرلشیرلر کی، من خسته‌یه‌م، اما سهو ائدیرلر" - دئدی. بیر داها "بو گولله سسینی ائشیتدین؟"- دئیه سوروشدوم. جاواب وئرمه‌دن علی‌می توتوب منی کوکنار آغاجینین آلتینا آپاردی و بیر شئی گؤستردی. من یاخین‌دان موشاهی‌ده ائتدیم، یئره اوچ داملا تزه قان تؤکولموش‌دو. سونرا منی اؤز اوتاغینا آپاردی، بوتون قاپیلاری باغلادی، ایشیغی یاندیردی و گلیب منیمله اوز-اوزه اوتوراجاق‌دا اوتوردو. اونون ساده اوتاغینین دیوارلاری ماوی رنگ‌ده ایدی. اوتاغین بیر طرفینه تارینی قویموش‌دو. بیر نئچه کیتاب و مکتب دفتری ده ماسانین اوستون‌ده ایدی. سونرا سیاووش علینی اوزادیب رف‌دن سلاحی چیخارت‌دی و منه گؤستردی. کؤهنه سلاحلاردان و دسته‌سی سدف‌لیلردن ایدی. سلاحی شالوارینین جیبینه قوی‌دو و دئدی: منیم بیر مایا پیشییم وار ایدی، آدی نازی ایدی، بلکه ده اونو گؤرموشدون. عادی بوز پیشیکلردن ایدی. زنن ائدردین ایری گؤزلرینه بیر جوت سورمه چک‌می‌سه‌ن. آرخاسین‌دا گؤزل جیزگیلر وار ایدی. سحرلر مدره‌سه‌دن قایی‌دان‌دا نازی قاباغیما قاچاراق میولداردی. اؤزونو منه سورتردی. یئره اوتوران‌دا باشیما، بئلیمه دیرماشاردی. بورنونو اوزومه ووراردی، آلنی‌می یالایاردی و اونو اؤپمییمچون ایسرار ائدردی. سانکی مایا پیشیک ائرکک پیشیک‌دن داها مکرلی، مهببت‌لی و هسساس‌دیر. نازینین من‌دن باشقا، آشپازلا دا یاخشی موناسیبتی واریی‌دی، چونکی یئمکلر اوندان گلیردی. اما او، ناماز قیلدیغینا، پیشیین توکونه گؤره اوندان اوزاق گزیردی. بلکه ده نازی اؤزلویون‌ده دوشونوردو کی، آداملار پیشیکلردن زیرک‌دیلر و بوتون یئمکلری، ایستی یئرلری اؤزلری اوچون ساخلاییرلار و پیشیکلر گرک او قدر یالتاق‌لیق ائتسینلر کی، بونلاری الده ائده بیل‌سینلر.

یالنیز او واخت نازینین طبیعی هیسسلری اویانیردی کی، بیر قان‌لی خوروزون باشی علینه کئچیریردی و اونو بیر ییرتیجی حیوانا چئویریردی. گؤزلری برلیردی. دیرناقلاری اوزانیردی و هر کیم‌سه کی، اونا یاخینلاشسای‌دی اونو خورولتولارییلا اؤزون‌دن اوزاقلاش‌دیریردی. یورولان‌دان سونرا قان‌لی باشی ایشتاهلا یئمه‌یه باشلاییردی و نئچه دقیقه سونرا اونون تیکه‌لری آرخاسینجا گزیردی و ایکی-اوچ ساعت صونعی مدنیتینی اونودوردو، نه کیم‌سه‌یه یاخینلاشیردی، نه ناز ائدیردی، نه یالتاقلانیردی. اوندا کی، نازی دوستلوق ائتمک ایستییله یاخینلاشیردی، دئمه‌لی، ایچین‌ده نسه وحشی بیر سیرر گیزله‌نیردی. بیزیم ائوی اؤز ائوی کیمی بیلیردی و اگر بیر باشقا پیشیک اورا یاخینلاشسای‌دی، خصوصیله مایا اولسای‌دی، اونو اؤز قریبه سسلریله اوزاقلاش‌دیریردی.

ناهار زامانی نازینین چیخاردیغی سس سیرتیق‌لیق ائد‌ن زامانین‌دان بیر آز فرق‌لی ایدی. آجلیق‌دان ناله ائد‌ن زامان دا باشقا واختلارداکین‌دان فرقله‌نیردی. و اونلارین آهنگی بیر-بیرین‌دن فرق‌لی ایدی. بیرینجی اورکاغری‌دان چیغیرتی، ایکینجی کینی اوجباتین‌دان اولان چیغیرتی، اوچونجو خاسیتینه گؤره چیخاردیغی سس ایدی کی، بونو دا اؤز جوتونون یانینا گئتمک ایسته‌یه‌ن‌ده ائدیردی. اما نازینین باخیشلاری هر شئی‌دن معنالی ایدی، بو باخیشلاردا اینسان هیسسلری اوخونوردو. اینسان اؤزون‌دن سوروشوردو؛ بو قیل‌لی باشین ایچین‌ده بو سیموولیک یاشیل گؤزلرین آرخاسین‌دا، گؤره‌سه‌ن، هان‌سی فیکیرلر و ائهتیراسلار دالغالانیر؟