کولت. آذ کیان خیاوین "نه یاخشی یوخسان سئوگیلیم " شعیرینی تقدیم ائدیر

نه یاخشی یوخسان سئوگیلیم

انایین بیر سئوگی جغرافیاسیندا یاشاییرام

و هئچ ده غریب دئییلم

باشقا بیر یاشامدیر آرتیق وطن‌سیز اولماق!…

نه یاخشی یوخسان سئوگیلیم کیتاب یازمیرام

یایین اورقان‌لاری‌نین

باش ویجدان‌سیزلارینا باش ایمیرم

ان بؤیوک بیر یالنیزلیغین حرکت‌سیز سورگون- دیدرگینییم

اوزاغام تکنولوژی‌نین آنتی سوسیاللیغیندان

اوزاغام سوسیال بیلیملر دونیاسیندا اؤزونه آلان بولان‌لاردان…

نه یاخشی یوخسان سئوگیلیم

درد باتمانلا گلیب میثقاللا چیخمیر

سن‌لی- سن‌سیز کئچینیر کوسموسون دوزنی

سن‌لی- سن‌سیز کئچینیرم گؤزل اؤیرنجی‌لریمله

بورنو دئشیک آیاق قابی‌لار ایچیندن

باش بارماق‌لاری گؤرونن آریق قیزلار، اوغلان‌لار…

نه یاخشی یوخسان سئوگیلیم

بیزدن اولمایان اؤلکه‌نین یوکسک گؤره‌و‌لی‌لری

بیزدن گیزلی‌هانکیسا قونویلا باغلی گرگین دوشوننده من دوشونمورم

نه ایراندا ایشسیز وار

نه ایشید عسگرلری

نه پورتره پرده‌سینه کؤچورولموش سوریا‌لی اوشاق‌لار

نه افغان‌لی تعجیزه معروض قالان‌لار

نه ائلیمیز، نه دیلیمیز

نه اورتا‌دان یئددی یئره بؤلونموش بایراغیمیز وار

نه ایشغال آلتیندا اولان تورپاغیمیز

نه ننه امجه‌یی کسن‌لر

نه آنا دؤشونو دیشله‌ین ناخلف‌لر

نه دونیایا فرمان وئریر آمئریکا

نه ده اونا هده بیچیر

یاری دوغو یاری آسیا روسیا

نه سن وارسان نه ده من

نه ده من سن‌سیز گؤرورم

اینسان‌لار نئجه یاشامین قاچینیلماز چلیشکیسی‌یله سازیشیر…

نه یاخشی یوخسان سئوگیلیم

سن اولسایدین

بوتون یئر اوزونو قوجاقلایاردیم!…

نه یاخشی یوخسان

نه یاخشی داها دئمیرم

بوتون بو سورون‌لار بئینیمی‌دلیر

ایندی بو سؤزو قوی قاپانا

گؤر نئچه کیلو گلیر!…