کولت. آذ گونئی‌لی یازار اومید نجارینین ترجمه ائتدیی صادق هدایتین"اوچ داملا قان... "- حکایه‌سینین داوامینی تقدیم ائدیر:

کئچه‌ن باهار واهیمه‌لی بیر حادثه باش وئردی. بیلیرسن‌می، بو فسیل‌ده بوتون جان‌لیلار مست اولورلار. سانکی باهارین کولیی جان‌لیلار آراسین‌دا بیر دلی‌لیک هیس‌سی یارادیر. بیرینجی دفعه ایدی کی، بیزیم نازینین باشینا عشقین شورو گلمیش‌دی و جانین‌دا تیتره‌مه‌لر عمله گلیردی، قم‌لی-قم‌لی ناله چکیردی. ائرکک پیشیکلر اونون زاریلتی‌سینی ائشیدیب گؤروشونه گلیردیلر. ساواشدیق‌دان سونرا نازی اونلارین بیرینی، هامی‌سین‌دان گوج‌لو و سسی ده گور اولانی اؤزونه یولداش سئچ‌دی. عشق اعلانین‌دا جان‌لیلارین قوخوسو چوخ اؤن‌م‌لی‌دیر، اونا گؤره ده ائولرین تمیز پیشیکلری جوتلرینین یانین‌دا یاخشی گؤرونمورلر، عکسینه، دیوار اوستون‌ده یئرییه‌ن پیشیکلر، سوله‌نه‌ن آریق و اوغرو پیشیکلر وار کی، اونلارین دری‌سی اصل-نجابتینی گؤستریر، داها چوخ دقتی جلب ائدیر. سحرلر و خصوصیله گئجه بویو نازی و ائرکک دوستو عشق نغمه‌سی اوخویوردولار. نازینین یومشاق جانی اوزانیب قیسالیردی و شادلیق نغمه‌سی اوخویوردو، بو ایش سحرین گؤزو آچی‌لانا قدر داوام ائدیردی. سونرا نازی قاریشیق توکلری ایله یورغون-آرغین، اما خوشبخت هالییلا اوتاغا داخیل اولوردو.

گئجه‌لر نازینین عشق اویونلاری اوزون‌دن یوخوم گلمیردی، سونون‌دا جانا گلدیم، بیر گون بو پنجره‌نین اؤنون‌ده ایشله مشغول ایدیم، باغچادا یاتمیش آشیق-مشوقو گؤردوم. من بو گؤردویون سلاحلا اونلاری اوچ آددیملیغین‌دان نیشان آلدیم. سلاح بوشال‌دی و گولله نازینین آشیقینه دی‌دی. سانکی بئلی قیریل‌دی، بیردن آتیل‌دی و سسی چیخمادان دالان‌دان قاچ‌دی و باغین دیواری یانین‌دا دوش‌دو، اؤلدو.

اونون قاچدیغی ایستیقامت‌ده قان دامجیلاری گؤرونوردو. نازی اونون ایزینی تاپماق اوچون اورا-بورا وورنوخوب آخیردا تاپ‌دی، قانینی قوخلایا-قوخلایا اونون مئییتی اوستونه گئت‌دی. ایکی گون گئجه-گوندوز باشی اوستون‌ده کئشیک چک‌دی. هردن علی ایله اونا توخونوردو. سانکی اونا دئییردی کی، دور، ایلک باهاردی. نیه سئویشمه واختی یات‌می‌سان؟ نیه ترپه‌نمیرسن؟ دور... دور...! نازی اؤلمک ندیر بیلمیردی و بیلمیردی کی، آشیقی اؤلوب.

او گونون سحری نازی آشیقینین مئییتی ایله بیرلیک‌ده یوخا چیخ‌دی. هر یئری گزدیم، هامی‌دان سوروشدوم، اما فای‌داسیز ایدی. گؤره‌سه‌ن، نازی من‌دن کوسموش‌دو؟ گؤره‌سه‌ن، اؤلوب‌دور؟ گؤره‌سه‌ن، سئویشمه‌سی آرخاسینجا گئدیب؟ بس او بیرینین اؤلوسو نئجه اولدو؟

بازار گونو همین ائرکک پیشیین سسینی دویدوم، سحره کیمی میول‌دادی. او بیری گئجه یئنه ده بئله اولدو، اما سحره یاخین سسی کسیل‌دی. اوچونجو گئجه یئنه سلاحی گؤتوردوم و پنجره‌نین اؤنون‌ده‌کی کوکنار آغاجینا طرف بیر گولله آتدیم. گئجه‌ده پارلایان گؤزلری بل‌لی ایدی، اوزون بیر زاریلتی سسی گل‌دی، سونرا سس کسیل‌دی. سحر آغاجین آلتینا اوچ داملا قان تؤکولموش‌دو. او واخت‌دان سونرا هر گئجه گلیر، همین سسله زاریییر. باشقالارینین یوخوسو آغیردی، ائشیتمیرلر. کیمه دئییرم، گولور، اما من بیلیرم، امینه‌م کی، بو سس همین او اؤلدوردویوم پیشیین سسی‌دیر. او گئجه‌دن سونرا گؤزومون یوخوسو قاچیب. هارا گئدیرم، هان‌سی اوتاق‌دا یاتیرام، گئجه بویو بو اینساف‌سیز پیشیک او قورخونج ناله‌سی ایله اؤز جوتونو سسلییر.

داوامی وار