کولت. آذ گونئی‌لی یازار اومید نجارینین ترجمه ائتدیی صادق هدایتین"اوچ داملا قان... "- حکایه‌سینین داوامینی تقدیم ائدیر:

بو گون ائوده ساکیت‌لیک ایدی، پیشیین گئجه‌لر اوتوردوغو یئری نیشان آلدیم. گؤزلرینین پاریلتی‌سین‌دان بیلیردیم هاردا اوتورور. گوله‌نی آتان‌دان سونرا پیشیین ناله‌سینی ائشیتدیم و یوخاری‌دان اوچ داملا قان تؤکولدو. سن کی، اؤز گؤزونله گؤردون! سن کی، شاهیدسن! بو آرادا اوتاغین قاپی‌سی آچیلدی، روخساره و آناسی ایچری گیردی.

روخساره‌نین الین‌ده بیر دسته گول واردی و من قالخیب "سلام" - دئدیم. اما سیاووش گولوم‌سه‌یه‌رک دئدی:

- البته کی، میرزه احمد خانی من‌دن یاخشی تانیییرسینیز، تانیتماغا گرک یوخ‌دو، اؤزو شهادت وئریر کی، اوچ داملا قانی اؤز گؤزو ایله کوکنار آغاجینین آلتین‌دا گؤروب‌دو.

- بلی، من گؤرموشه‌م.

سیاووش یاخینا گل‌دی و قهقهه چکه‌رک گول‌دو، الینی آتیب منیم جیبیم‌دن سلاحی چیخاردی و ماسانین اوستونه قویدو. "بیلیرسینیزمی، میرزه احمد خان تکجه گؤزل تار ایفاچی‌سی و یاخشی شاعر دئییل، هم ده یاخشی اووچودو، یاخشی نیشان آلا بیلیر" - دئدی.

سونرا منه ایشاره ائل‌دی، من ده قالخیب دئدیم:

بلی، بو گون آخشام سیاووش‌دان دفتریمی آلماغا گلدیم، تفریح اوچون کوکنار آغاجینی نیشان آلدیق. اما او اوچ داملا قان پیشیین دئییل، حاق قوشونون‌دو! بیلیرسینیزمی، حاق قوشو یئتیمین مالین‌دان اوچ بوغدا یئییب‌دی و هر گئجه او قدر زارییار کی، بوغازیندان اوچ دامجی قان دامجیلایار، یا دا پیشیک قونشونون بولبولونو توتموشدو و اونو گوله‌له‌دیلر، او بوردان کئچمیشدی. ایندی گؤزلیین، سیزه بیر یئنی تصنیف اوخویوم. تاری گؤتوروب کؤکلدیم و بو شعیری اوخودوم:

یئنه آخشام اولدو، حییف

دونیا باش‌دان آیاغا قارالدی.

بوتون مخلوقلار اولدو آرام،

بیر منیم اضطراب و غمیم آرتدی.

دونیانین مزاجین‌دا خوشلوق یوخ

اؤلومدن باشقا غمیمه یوخ علاج.

آنجاق او کونج‌ده،

کوکنار آغاجینین آلتین‌دا

تؤکولوب یئره اوچ داملا قان.

بوراسینا چاتان‌دا روخساره‌نین آناسی فرق‌لی حالت‌ده اوتاغی ترک ائلدی. روخساره قاشلارینی دویونله‌ییب دئدی:

- بو، دلیدی!

سونرا سیاووشون الینی توتوب هر ایکی‌سی قهقهه چکه‌رک چؤله چیخ‌دیلار و قاپینی آرخالارینجا باغلادیلار.

حیطه چاتان‌دا من پنجره آرخاسین‌دان اونلاری فنرین ایشیغین‌دا گؤروردوم، بیر-بیرینی قوجاقلاییب اؤپدولر.