آنا صحیفه ادبیات |
« آلما »
بالاجا، دوُزلو قیْز اوُشاغینین اللرینده ایکی قیْرمیزی آلما وار ایدی.
گۆنۆن لاپ ائله باتان چاغلاریْندا ائیواندا دنَلی ساچلارین چیگنینه سالیْب، یوْرغون اوْتورموش آناسینین یانیْنا گلدی.
آنا قیْزین اللرینه باخیب گۆلۆمسهیهرک دئدی :
« قیـْزیم اوْنلارین بیرینی وئر منه. »
قیْز بالاجا آددیْملاری ایله دالی-دالی گئدیب آلمالارین هرهسیندن بیر بالاجا دیشلهییب یئدی.
آنا اۆزۆلهرک اۆزۆن چئویریب قیْزا ساری باخماق ایستهمدی، دوْغروسو بوُ آجی اوْنون اۆرهگینی یاندیْردی. گؤزلری دوْلدو آما اؤزۆن سیْندیرماماق اۆچۆن آغلامادی. قاپییا ساری باخیْب آه چکهرک درین بیر فکره گئتمیشدی.
گؤزۆنۆن اؤنۆنده بیر شئی حس ائتدی. بیر بالاجا ال اوْنو سیلکهلهییردی، اینجه، گؤزل سسی ایله چاغیْریردی:
« آنا..... آنا... آ....نا
بوُ آلما-نی آل با، بوُ، بوُندان شیریندیر»
ائشیتدیگی سؤز، گؤزۆنده گؤل باغلایان سوُلاری دالغالاندیردی. بوُ دؤنه اؤزۆنۆ ساخلایا بیلمهییب هؤنکۆر-هؤنکۆر آغلادی، ساچلاریـْنا دن دۆشمۆش ، ائیواندا اوْتوران یوْرغون آنا.
فرخ جرایدی (یورغون)
تاریخ
2019.07.04 / 20:44
|
مولف
آیتاج آراز
|