کولت. آذ شاعر عباس بارزنین شعرینی تقدیم ائدیر:

تنگ اولور باشیما تک لیک ساری،عالم گئجلر
بیر نفر اولمادی منله اولا همدم گئجلر

عشقه بیگانه اولانلار نه بیلیر کیم نه چکیر
چکمه سین من چکنی اهل جهنم گئجلر

بیر منم ،بیر بو قلم،بیرده بو ویرانه کونول
اوچوموزده گلیریک ناله یه با هم گئجلر

کیمسه بیلمز اورگیم سیررینی دونیادا منیم
یاز قلم دورما کی سنسن منه محرم گئجلر

یارالی کونلومه کوندور وورولان یاره لره
مهربان یار الی ایستیر قویا مرهم گئجلر

نه وئریر گوندوزو مهلت منه هیجران ستمی
نه قویار باش یئره بیر لحظه قویام غم گئجلر

عشقینه صادق اولان جهدیله همت کمرین
درد و غم چکمه یه باغلار بئله محکم گئجلر

منده مجنون کیمی زنجیریده گوررم اوزومو
اوندا کی زولفون اولار گوزده مجسم گئجلر

من چکن غم یوکونو بیر گئجه چرخین بئلینه
قویسالار،پشت فلک غمدن اولار خم گئجلر

پرده لی قویدو سوزون بارزه فاش ائیلمه دی
سرلر اورتویو بو قورخولو مبهم گئجلر