آنا صحیفه ادبیات |
کولت. آذ رامیز رؤوشهنین "بوشالدی دونیانین سن اولان یئری…" آدلی شعیرینی تقدیم ائدیر:
بوشالدی دونیانین سن اولان یئری
دونیانین
سن اولان یئریندن ایندی
توزلانا-توزلانا ماشینلار کئچیر،
نازلانا-نازلانا خانیملار کئچیر،
جوانلار کئچیر
توپوروب سیگارئت کؤتوکلرینی.
دونیانین سن اولان یئریندن آنجاق
من کئچه بیلمرهم.
باش آلیب قاچارام گئجهلر ایله،
اوزون یوللار ایله، کوچهلر ایله،
دونیانین سن اولان یئریندن ائله
باش آلیب قاچارام، قاچا بیلمرهم.
یئنه ده، آچیلار سحر قفیلدن،
یئنه ده، سؤکولر قیزیل دان یئری.
بوتون یئر اوزونون هر طرفیندن
گؤرونر دونیانین سن اولان یئری.
دونیانین سن اولان یئرینه بیر گون
یاغیش یاغاجاق.
گئجه کؤینیینده، اورکک-اوتانجاق،
چیخارسان ائشییه، گؤزلرسهن منی،
اوشویه-اوشویه گؤزلرسهن منی.
قوشولوب آغلارسان
یاغان یاغیشا،
الیمدن نه گلر؟..
منی باغیشلا!..
…نه سن کیرییرسن، نه یاغیش کسیر،
یاغیشا قاریشیب آخارسان، کیری.
آغلایا-آغلایا بو یاز گئجهسی
اریییب یاغیشا چیخارسان، کیری.
باخدیقجا قورخورام
یاغان یاغیشا،
آغلایا بیلمیرم…
منی باغیشلا!..
تاریخ
2019.07.10 / 19:47
|
مولف
Axar.az
|