کولت. آذ زلیمخان یاقوبون "زارافات گلمه‌سین سنه بو دونیا..." آدلی شعیرینی تقدیم ائدیر:

زارافات ائیله‌مه، قوربانین اولوم،
بو دونیا زارافات میدانی دئییل.
قاریشقا یئریشی راحت یئریش‌دی،
بو میدان کؤهله‌ن آت میدانی دئییل.

اوینادیب چوخ شئیی اومار، اویناما،
ائتسه ده روحونو خومار، اویناما،
سن بو قوماربازلا قومار اویناما،
زارافات گلمه‌سین سنه بو دونیا.

چوخ یئرده قبرینی قازان اولاجاق،
باشین قایناماق‌دان قازان اولاجاق،
سانما یاشاماغین آسان اولاجاق،
زارافات گلمه‌سین سنه بو دونیا.

یوخسوللوق یوخسولون باغرینا اوخدو،
مده‌سی توخلارین مزه‌سی توخ‌دو.
فیل وار، قاریشقاجا حؤرمتی یوخ‌دو،
زارافات گلمه‌سین سنه بو دونیا.

چوخ یئرده مکرلی اویون اولاجاق،
شیر، پلنگ چئوریلیب قویون اولاجاق،
هله نئچه دفعه تویون اولاجاق،
زارافات گلمه‌سین سنه بو دونیا.

اؤمرونو قار یئییب، قیش آپاراجاق،
خیرمان‌دان دنینی قوش آپاراجاق،
دونیادان علینی بوش آپاراجاق،
زارافات گلمه‌سین سنه بو دونیا.

قئیبتین قویوسو، هیله‌نین تورو،
سنه دیری-دیری گؤسترر گورو.
باشین وار، باش‌سیزدان باشینی قورو،
زارافات گلمه‌سین سنه بو دونیا.

شیطان دورا-دورا شرلنر دوه،
قاتیر قویروغون‌دا هرلنر دوه.
کینین‌دن ییخیلار، تیرلنر دوه،
زارافات گلمه‌سین سنه بو دونیا.

موغامی آغلاماق، والی آغلاماق،
والین دا قیریلمیش حالی آغلاماق.
فیشقیریق چالماغین دالی آغلاماق،
زارافات گلمه‌سین سنه بو دونیا.

یاسین یئددی‌سی وار، اوچو، قیرخی وار،
قبیر یئرینین ده حاقی، نیرخی وار،
اؤلوم‌دن سونرا دا مین جور قورخو وار،
زارافات گلمه‌سین سنه بو دونیا.

اور‌یه چکیله‌ن داغ‌دی، دویون‌دو،
هر گون خیردالانان عؤموردو، گون‌دو،
گؤر بو دییرمان‌دا کیملر اویون‌دو،
زارافات گلمه‌سین سنه بو دونیا.

زلیمخان، گوناهین یئددی قات اولار،
حیاتین قان دولو بیر حیات اولار.
زارافات ائیله‌سه‌ن، شاهین مات اولار،
زارافات گلمه‌سین سنه بو دونیا!