کولت.آذ شاعیر دومان یالچینین شعرینی تقدیم ادیر:

زامان گولوشونو اکیبدی یئره
آغزیندا دیشلری بیر-بیرین تؤکور
أینی کؤینه یینه بیراز دارالیب
شالواری قیچیندا یاخاسین سؤکور.

گور سسی شهَری سالاما سوخور
الینده قزئتلر رنگینی سولور
سؤزلری عاغلینی گولوشه سریب
دوداغیندا دردین گؤزلری گولور.

آه...الی قارنیندا شهَری گزیب
کوچه قوجاغیندا دینجینی آلیر
معده سی اؤزونه توی-بایرام توتوب
یوخسوللوق ماهنیسین مورگولو چالیر.

یئردن قورو چؤرک پاراسی تاپیب
یئمه‌یینی اؤپوب آغزینا تپیر
پاییز جیبلرینده گیلاوئر اسیر
الیله غئیرتین قزئته سپیر.

ازلدن عاغلینی دانیر بلکه‌ده
دلیخای دونیادا سئوینج آراییر
گؤزلرینده حایات اؤزونو بوغوب
داغینیق تئللرین ظولوم داراییر...